Ձեր վստահելի աղբյուրը

Հարավային Օսիայում գտնվող ՌԴ նախագահի օգնական Վլադիսլավ Սուրկովը այսօր հայտարարել է, որ Ռուսաստանի Դաշնության և Հարավային Օսիայի միջև «Համագործակցության և ռազմավարական գործընկերության մասին» նոր համաձայնագիրը պատրաստ կլինի մինչև 2015 թ.-ի հունվարի վերջ: Սուրկովը նշել է, որ նոր համաձայնագրի նպատակն է ընդլայնել երկու պետությունների միջև ինտեգրացիան ու անվտանգության, բնակչության սոցիալական ապահովվածության մակարդակը: 

Հարավային Օսիայի հետ պայմանագիրը կսրի ռուս-վրացական հակասությունները

Հարավային Օսիայի նախագահ Լեոնիդ Տիբիլովը այսօր հայտարարել է, որ Ռուսաստանի և Հարավային Օսիայի միջև նոր պայմանագրի վրա աշխատում են երկու երկրների նախագահների աշխատակազմերը: Նրա խոսքով, նոր պայմանագիրը մշակվելու է Ռուսաստանի և Հարավային Օսիայի միջև 2008թ.-ին ստորագրված մեծ պայմանագրի հիման վրա: Վրաստանի ԱԳՆ-ը այսօր հանդես է եկել կոշտ հայտարարությամբ՝ Մոսկվայի և Ցխինվալի միջև նոր պայմանագրի հետ կապված: Վրաստանի ԱԳՆ-ի հայտարարության մեջ նշվում է, որ պայմանագրի ստորագրումը միջազգային իրավունքի կոպիտ խախտում է և ուղղված է Վրաստանի տարածքի բռնազավթմանը: Պաշտոնական Թբիլիսին նույն դիրքորոշումն էր հայտնել նաև Աբխազիայի և Ռուսաստանի միջև վերջերս ստորագրված ռազմավարական համագործակցության պայմանագրի հետ կապված: 

Նոր պայմանագիրը ենթադրում է Աբխազիայի և Ռուսաստանի միջև սոցիալական, տնտեսական փոխհարաբերությունների ընդլայնում, ինչպես նաև Աբխազիայի անդամակցում Ռուսաստանի կողմից ստեղծված ինտեգրացիոն կամ այլ կառույցներին: Պայմանագրի ամենակարևոր պահը վերաբերվում է համատեղ պաշտպանության մասին կետին, ըստ որի, կողմերից մեկի վրա հարձակումը նշանակում է հարձակում մյուս կողմի վրա:

Մոսկվան ստանձնում է երեք տարվա ընթացքում աբխազական բանակը արդիականացնելու պարտավորություն: Աբխազիայի և Ռուսաստանի միջև ստեղծվելու է միասնական սոցիալ-տնտեսական տարածք, իսկ Աբխազիայի բնակչության կենսամակարդակը և տարեց բնակչությանը կենսաթոշակները պետք է հավասարվեն Ռուսաստանի կենսաթոշակների մակարդակին: 

Ռուսաստանի ռազմական և տնտեսական ներկայությունը Հարավային Օսիայում

2008թ.-ի հնգօրյա պատերազմից հետո, Ռուսաստանը միջամտեց և թույլ չտվեց Վրաստանին գրավել Հարավային Օսիայի տարածքը և ճանաչեց Հարավային Օսիայի և Աբխազիայի անկախությունը: Այսօր ռուս-վրացական հարաբերությունների լարվածության ֆոնին այս նոր առաջարկությունը Մոսկվայի՝ Հարավային Կովկասում վերջնականապես և երկարաժամկետ ամրապնդվելու մասին է վկայում: Ռուսաստանը իր ֆինանսական աջակցությունն է ցուցաբերում Հարավային Օսիան և ռուսական ֆինանսավորման շնորհիվ հնարավոր եղավ շատ կարճ ժամանակաշրջանում վերականգնել պատերազմի հետևանքով հողին հավասարեցված Հարավային Օսիայի մայրաքաղաք Ցխինվալը:
Այս պահին Հարավային Օսիայի սահմանների անվտանգությունը ապահովում են ռուսական զորքերը, որոնք տեղակայվել են Հարավային Օսիայում: Ռուսական ռազմակայանները տեղակայված են Ցխինվալ քաղաքում և Ջավա ավանում: Ռուսական զորքերի թիվը այդ ռազմակայաններում հասնում է 4.000-ի: Ռազմակայանները զինված են «Տոչկա-Ու» և «Սմերչ» համակարգերով: Ցխինվալի և Ջավայի ռազմակայանները ենթարկվում են Ռուսաստանի Հարավային ռազմական շրջանի հրամանատարությանը: 

Ռուսաստանը ապահովում է Հարավային Օսիայի գազամատակարումը «Ձուարիկաու-Ցխինվալ» գազամուղի միջոցով, որը բացվել է 2009թ.-ին: Հարավային Օսիան Հյուսիսային Օսիայի, Ռուսաստանի հետ կապված է Ռոքիի թունելով, որի վերանորոգման աշխատանքները սկսվել էին դեռևս 2012թ.-ին և ավարտվել են այս տարի: 2112 մետր բարձրության վրա գտնվող թունելը անցնում է Կովկասյան Գլխավոր լեռնաշղթայով, իսկ թունելի ընդհանուր երկարությունը կազմում է 3730 մետր:

Բացի այդ, Հարավային Օսիայի բնակչության 90%-ը ունի Ռուսաստանի քաղաքացիություն: Ռուսաստանը նաև պետական բյուջեի հաշվին յուրաքանչյուր տարի ներդրումային ծրագրեր է իրականացնում Հարավային Օսիայում: Այս տարի ՌԴ-ի պետբյուջեից Հարավին Օսիայում ներդրումային ծրագրեր իրականացնելու համար հատկացվել է 2.8 միլիարդ ռուբլի: 

Այսպիսով, Ռուսաստանը նոր ռազմավարական պայմանագրեր կնքելով Աբխազիայի և Հարավային Օսիայի հետ արձագանքում է Վրաստանի ՆԱՏՕ-ական ձգտումներին և դաշինքի հետ ռազմավարական կապերի ընդլայնմանը: Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապատուրայը վերջերս Թբիլիսիում Վրաստանի պաշտպանության նախարար Մինդիա Ջանելիձեի հետ հանդիպման ընթացքում հայտարարել է, որ Վրաստանում ավելի շատ կլինի ՆԱՏՕ-ն, իսկ ՆԱՏՕ-ում՝ Վրաստանը: Կողմերը քննարկել են նաև Վրաստանի տարածքում ՆԱՏՕ-ի ուսումնական կենտրոնի բացումը, որտեղ պատրաստվելու են ինչպես Վրաստանի, այնպես էլ ՆԱՏՕ-ի անդամ երկրներից ժամանած զինվորականները:

Արտյոմ Բալասանով, վերլուծաբան

Նախորդող հրապարակումներ՝
 Հարավային Կովկասում նոր բաժանարար գծեր են առաջանում