Ձեր վստահելի աղբյուրը

Եվրոպական խորհրդարանի մեծ թվով պատգամավորներ պահանջում են ազատ արձակել Ադրբեջանի հետաքննող լրագրող Խադիջա Իսմայիլովային։ Խորհրդարանականներն իրենց աջակցությունն են հայտնում Խադիջա Իսմայիլովային, ով, ինչպես հավատացած են շատերը, կալանավորվել է քաղաքական շարժառիթներով։

Եվրոպական խորհրդարանի 40 պատգամավորներ ստորագրել են Ադրբեջանի նախագահ Իլհամ Ալիևին և արդարադատության նախարարին ուղղված նամակի տակ։

Նամակում ասվում է, որ Իսմայիլովայի ձերբակալումն ու կալանավորումը անարդար է և վնաս է հասցնում Ադրբեջանում մարդու իրավունքների և մամուլի ազատությանը։ Պատգամավորները կոչ են անում ազատ արձակել լրագրողին, ապահովել արդար դատավարություն, դադարեցնել հետաքննող լրագրողների ահաբեկումը։

Եվս մեկ նամակ ուղղվել է մարդու իրավունքների հանձնակատարին, որը հիշեցում է Ադրբեջանին իր միջազգային պարտավորությունների մասին՝ որպես ԵԱՀԿ-ի և Եվրոպայի խորհրդի անդամի։ Խորհրդարանականները կոչ են անում հանձնակատարին՝ միջամտել Իսմայիլովայի գործին և ապահովել նրա ազատ արձակումը։

«Եվրոպական խորհրդարանի 40 անդամներ միացան Խադիջային ազատ արձակելու համաշխարհային կոչերին։ Կառավարությունը և Ադրբեջանի նախագահը պետք է հասկական, որ պետք է ազատ արձակեն Խադիջային։ Խադիջայի աշխատանքը բխում է ադրբեջանական հանրության շահերից, որը ճանաչվում է ինչպես Ադրբեջանում, այնպես էլ արտերկրում»,-ասել է «Կազմակերպված հանցավորության և կոռուպցիայի լուսաբանման նախագծի» տնօրեն Փոլ Ռադուն։