Ձեր վստահելի աղբյուրը

Ստրասբուրգում` Եվրոպայի խորհրդարանում, անցկացվել է եվրոպական պահպանողականների և ռեֆորմատորների աշխատանքային խմբի նիստը կրոնի ազատության թեմայով: Այս մասին հաղորդում է Katolik.ru կայքը:

Հռոմի պապի բարեգործական կազմակերպությունը («Եկեղեցու օգնությունը կարիքի ժամանակ») կրոնի ազատության մասին իր` ընթացիկ տարվան վերաբերող զեկույցում նշել է, որ հետազոտվող 196 երկրներից 116-ում արձանագրվել են կրոնական ազատության խախտումներ:

55 երկրներում (28%) դավանանքի ազատության հնարավորությունը վատթարացել է: Դավանանքի պատճառով անհանդուրժողականության կամ նույնիսկ բաց ճնշումների բարձր մակարդակ նշվում է 20 երկրներում, որոնցից 14-ում դա կապված է արմատականության և իսլամական ծայրահեղականության հետ: Այդ երկրների թվին են դասվում Աֆղանստանը, Սաուդյան Արաբիան, Եգիպտոսը, Իրաքը, Իրանը, Եմենը, Լիբիան, Մալդիվները, Նիգերիան, Պակիստանը, Կենտրոնական Աֆրիկյան Հանրապետությունը, Սոմալին, Սուդանը և Սիրիան:

Մնացած 6 երկրներում՝ Ադրբեջանում, Բիրմայում, Չինաստանում, Էրիթրեայում, Հյուսիսային Կորեայում և Ուզբեկստանում, դավանանքի համար հետապնդում են իրականացնում անմիջապես հենց բռնատիրական վարչակարգերը:

Զեկույցի հեղինակներից մեկի խոսքերով՝ այս հաշվետվությունն ապացուցում է, որ դիտարկված ժամանակահատվածում համաշխարհային մասշտաբով վատթարացել է կրոնական ազատության իրավիճակը, և աճել է կրոնական համայնքները մեկուսացնելու ձգտումը: Փաստաթուղթը վկայում է, որ իշխանության ունեցող բազմաթիվ անձինք` քաղաքական գործիչներ, կրոնական ղեկավարներ, մտադրություն չունեն պաշտպանելու դավանանքի ազատությունը` դրանով իսկ չհարգելով մարդու այնպիսի հիմնարար իրավունքներից մեկը, ինչպիսին է դավանանքի ազատությունը:

Նշենք, որ օրեր առաջ Ադրբեջանի իրավապահ մարմիններին ներկայացուցիչները ձերբակալել են աստվածաբան, կրոնական գործիչ Էլշան Մուսթաֆաօղլիին: Դատարանը նրա նկատմամբ որպես խափանման միջոց սահմանել է չորս ամիս ազատազրկում: Մուսթաֆաօղլուին պահում են Ադրբեջանի ազգային անվտանգության մեկուսախցում։ Ոչ պաշտոնական աղբյուրների համաձայն՝ նա մեղադրվում է պետական դավաճանության համար:

Նյութ թեմայի շուրջ`
Ադրբեջանը կրոնական անհանդուրժողականության բարձր մակարդակով երկրների շարքում է. «Կրոնական ազատություն 2014»