Ձեր վստահելի աղբյուրը

«Հայ-վրացական հարաբերությունների անկյունաքարը էներգետիկ, առևտրային և տնտեսական հարաբերություններն են: Չնայած դրան կան նաև բարձր մակարդակի քաղաքական հարաբերություններ: Երկու երկրները ընտրել են տարբեր մոդելներ և տարբեր կառույցներին են ինտեգրվում, ինչը կարող է հանգեցնել առևտրային ռեժիմի հետ կապված որոշակի հարցերի»,-Panorama.am-ի հետ զրույցում անդրադառնալով Հայաստանի ԵՏՄ-ին անդամակցությունից հետո հայ-վրացական հարաբերությունների ապագային ասաց Վրաստանի հարցերով փորձագետ Ջոնի Մելիքյանը:

Նա նշեց, որ դեռևս 1990-ական թթ.-ից Հայաստանի և Վրաստանի միջև առկա է ազատ առևտրի մասին պայմանագիրը:

«Օրեր առաջ Վրաստանի էկոնոմիկայի նախարարն էր այցելել Հայաստան և ստորագրվեց հայ-վրացական սահմանին նոր կամրջի շինարարության մասին պայմանագիրը: Երկու կողմերը քննարկել են նաև միջպետական առևտրային հարաբերությունները: Հայաստանի ԵՏՄ-ին անդամակցությունից հետո առաջ եկող հնարավոր հարցերը հայ և վրացի գործընկերները կարող են հեշտությամբ լուծել»-նշեց Ջ.Մելիքյանը:

Նրա խոսքով, Հայաստանի ԵՏՄ-ին անդամակցելու պայմանագրի մեջ նշված է, որ նոր պայմանագրեր ստորագրելիս Հայաստանը պետք է համաձայնեցնի դրանք ԵՏՄ-ի անդամ մյուս երկրների հետ:

«Հայաստանը և Վրաստանը պետք է ակտիվ և սինխրոն աշխատեն, որպեսզի բոլոր նախկին տնտեսական պայմանավորվածությունները պահպանվեն»,- նշեց Ջ.Մելիքյանը:

Ջ.Մելիքյանը նշեց, որ Հայաստանը հայտարարարել է ԵՄ-ի հետ հարաբերությունների խորացումը շարունակելու մասին, ինչը լավ ազդեցություն կունենա հայ-վրացական հարաբերությունների վրա:

«Հայ-վրացական ենթակառուցվածքային ծրագրերը պետք է խթանեն հայ-վրացական հարաբերությունները և ավելացնեն Հայաստանի ու Վրաստանի միջև ապրանքաշրջանառությունը»,- նշեց Ջ.Մելիքյանը:

Նա հավելեց, որ Վրաստանը Հայաստանի համար առանցքային երկիր է և ենթակառուցվածքային համատեղ ծրագրերը հայկական և վրացական ապրանքները դուրս են բերելու Ռուսաստանի շուկա: