![](https://panorama.am/news_images/47/140270_1/f55c4e00880d11_55c4e008810f2.thumb.jpg)
Վերջին վեց ամիսներին արդյունաբերության ծավալները փոքր, բայց աճում են. Կարեն Ճշմարիտյան
2014 թվականի 9 ամսվա տվյալներով, ՀՆԱ աճը կազմել է 3.9%՝ նախորդ տարվա նույն ժամանակահատվածի 2.8%-ի համեմատ: Այս մասին այսօր տարեվերջյան ամփոփիչ ասուլիսում ասաց ՀՀ էկոնոմիկայի նախարար Կարեն Ճշմարիտյանը:
Ներկայացնելով որոշ վիճակագրական տվյալներ՝ նախարարն ասաց, որ 2014թ-ին տնտեսական ակտիվության ցուցանիշը 2.3%-ից բարձրացել է մինչև 4.3% հունվար-սեպտեմբերին և հունվար-նոյեմբերին կազմել 3.8%` արդյունքում գերազանցելով նախորդ տարվա ցուցանիշը:
«Հունվար-նոյեմբերին աճ է արձանագրվել տնտեսության բոլոր ճյուղերում, բացի շինարարությունից»,- ասաց նա՝ հավելելով, որ շինարարության ծավալը նվազել է 5.4 %-ով:
Ինչ վերաբերում է արդյունաբերությանը, Կ. Ճշմարիտյանը հայտնեց, որ վերջին վեց ամիսներին արդյունաբերության ծավալները փոքր, բայց աճում են: Այսպիսով, ըստ նրա, արդյունաբերության ծավալն աճել 2.6%-ով (1160.5 մլրդ դրամ), ծառայությունները` 7.1%-ով (987.4 մլրդ դրամ), գյուղատնտեսությունը` 6.5%-ով (920.7 մլրդ դրամ), առևտրի շրջանառության ծավալը` 4.2%-ով (2076.5 մլրդ դրամ):
Նրա փոխանցմամբ՝ արդյունաբերության աճին հատկապես նպաստել են հիմնային մետաղների, սննդամթերքի, ծխախոտային արտադրատեսակների, ռետինե և պլաստմասսայե արտադրատեսակների, թղթի և թղթե արտադրատեսակների արտադրությունը:
Կ. Ճշմարիտյանը հայտնեց, որ այս տարի նախարարությունում կազմակերպվել են մի շարք քննարկումներ, որոնց նպատակն էր վեր հանել ոլորտների զարգացմանը խոչընդոտող խնդիրները և գտնել հնարավոր լուծումներ: Ընկերությունների կողմից բարձրացված հարցերը, ըստ նրա, վերաբերել են ՀՀ օրենսդրությանը, մասնավորապես` ավելացված արժեքի հարկի և եկամտահարկի մասին օրենքներին, ԱԱՀ-ի հետ վերադարձմանն, ծագման երկրի սերտիֆիկատի տրամադրման ընթացակարգերին, ինչպես նաև անհրաժեշտ որակյալ կադրերի բացակայությանն առնչվող խնդիրներին:
Նախարարի խոսքերով՝ հաշվի առնելով ընկերությունների կողմից ներկայացված առաջարկները` էկոնոմիկայի նախարարության կողմից մշակվել և սահմանված կարգով քննարկման փուլում են գտնվում շահագրգիռ գերատեսչությունների հետ «Ավելացված արժեքի հարկի մասին», «Եկամտային հարկի մասին», «Պետական տուրքի մասին» ՀՀ օրենքներում փոփոխություններ և լրացումներ կատարելու մասին օրենքի նախագծերը: Մյուս խնդիրների մասով իրականացվում է ինտենսիվ աշխատանք բոլոր շահագրգիռ կողմերի հետ:
Նշվեց նաև, որ ընթացքի մեջ են ՀՀ արտահանմանն ուղղված արդյունաբերական քաղաքականության ռազմավարության շրջանակներում հաստատված 8 ոլորտային ռազմավարությունների (կոնյակագործություն, գինեգործություն, ճշգրիտ ճարտարագիտություն, դեղագործություն ու բիոտեխնոլոգիաներ, ոսկեգործություն, ադամանդագործություն, ժամագործություն և թեթև արդյունաբերություն) գործողությունների ծրագրերը:
Կ. Ճշմարիտյանը նաև տեղեկացրեց, որ «Ժամանակավոր ներմուծում» ռեժիմի շրջանակում հավանություն են արժանացել 17 ընկերությունների 18 ծրագրեր, հետաձգվել են 6.8 մլրդ ՀՀ դրամ մաքսային արժեքով ապրանքների մաքսային վճարներ: «200 մլն ՀՀ դրամ գերազանցող ներդրումային ծրագրերի ԱԱՀ-ի երեք տարով հետաձգում» գործիքի շրջանակում հավանության են արժանացել 11 ներդրումային ծրագրեր` 29.6 մլրդ ՀՀ դրամ ներդրումային ակնկալիքով: Դրանք միասին ապահովելու են ավելի քան 900 նոր աշխատատեղ:
Լրահոս
Տեսանյութեր
![Նոր Սահմանադրության մասին Փաշինյանի հայտարարությունները հիմնազուրկ են ու մտացածին. Սահմանադրագետ](https://panorama.am/video_images/17/49954_1/photo_2024_07_05_16_43_08_v3.thumb.jpg)
Նոր Սահմանադրության մասին Փաշինյանի հայտարարությունները հիմնազուրկ են ու մտացածին. Սահմանադրագետ
![Հայաստանը շուտով Ռուսաստանում ունենալու է նոր դեսպան . Ալեն Սիմոնյան](https://panorama.am/video_images/17/49949_1/f6687d2af81fab_6687d2af81fec.jpg)
![Գնդակը գտնվում է ադրբեջանական կողմում. Ալեն Սիմոնյան](https://panorama.am/video_images/17/49941_1/f6687b8f87fc6a_6687b8f87fcab.jpg)