Ձեր վստահելի աղբյուրը

Ինչպե՞ս խուսափել սննդային թունավորումներից Ամանորին: Հարցին այսօր անդրադարձավ ՀՀ առողջապահության նախարարության Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Նունե Բակունցը:

Բանախոսի առաջին խորհուրդը սննդամթերքը պատրաստելիս մաքրության ապահովումն է:

«Ամենակարևորը մաքրության հնարավորինս ապահովումն է խոհանոցում, խոհանոցային պարագաների, մեր ձեռքերի»,- ասաց նա` հավելելով, որ սալաթներ կամ այլ ճաշատեսակներ պատրաստելուց առաջ մաքուր լվանալ բանջարեղենն ու միսը, ինչպես նաև այդ ամենը կտրատել առանձին դանակով:

«Միանգամից մի քանի տեսակ ճաշատեսակներ պատրաստելուց խառը մթերքներ կտրատելուց, նույն գդալով խառնելը ևս անվտանգ չէ»,-նշեց նա:

Մասնագետը նաև խորհուրդ է տալիս հում և եփած սննդամթերքը իրարից հեռու պահել, որպեսզի հումը չաղտոտի եփածը: Բացի այդ, ըստ Ն.Բակունցի, պետք է հում մթերքը, հատկապես միսը լավ եփել, որ մանրէները ոչնչանան:

«Թե հում, թե պատրաստի սննդամթերքը պետք է պահել իրենց համապատասխան ջերմաստիճանային պայմաններում: Իսկ այն պատրաստեք ու մատուցեք թարմ վիճակում, այսինքն՝ սեղանին դնելուց անմիջապես առաջ»,- հորդորեց տվեց Ն.Բակունցը:

Այսպիսով, մասնագետը խորհուրդ է տալիս տոնական օրերին ուտել միայն թարմ սննդամթերք, ինչպես նաև չչարաշահել ալկոհոլը:

«Աշխատեք Ամանորը տոնել, այլ ոչ թե ուտել»,- ասաց Ն.Բակունցը: