Ձեր վստահելի աղբյուրը

Ամերիկյան հայտնի Wall Street Journal պարբերականը հրապարակել է «Freedom House» իրավապաշտպան կազմակերպության նախկին ղեկավար Դեյվիդ Քրամերի (David Kramer) «Հանցագործ ռեժիմը ձեռնոց է նետում Միացյալ Նահանգներին» վերնագրով հոդվածը, որում նա սուր քննադատության է ենթարկում Ադրբեջանում մարդու իրավունքների և, մասնավորապես, խոսքի ազատության դեմ բռնությունների վերջին ալիքը և կոչ է անում ԱՄՆ կառավարությանը գործնական քայլեր ձեռնարկել այդ երկրում իրավիճակը շտկելու և Ալիևի վարչակազմի առաջատար անդամներին պատասխանատվության ենթարկելու համար։

Հոդվածը ներկայացնում ենք որոշ կրճատումներով.

«Դեկտեմբերի 18-ին Ազատություն ռ/կ ադրբեջանական «Ազադլիգ» ծառայության հետ հարցազրույցում ԱՄՆ Պետքարտուղարի օգնական Թոմ Մալինովսկին (Tom Malinowski) նախազգուշացրել էր Ադրբեջանի կառավարությանը, որ «քաղաքացիական հասարակության նկատմամբ հետապնդումները» կարող են վատթարացնել ԱՄՆ հետ այդ երկրի երկկողմ հարաբերությունները։ Ութը օր անց դատախազները և ոստիկանությունը մայրաքաղաք Բաքվում ներխուժել էին Ազատություն ռ/կ գրասենյակ, ձերբակալել և հարցաքննել աշխատակիցներին, բռնագրավել գույքը և փաստաթղթերը և կապարակնքել գրասենյակը։

Սա ուղղակի մարտահրավեր է Միացյալ Նահանգներին և Օբամայի վարչակազմը պետք է Իլհամ Ալիևի ռեժիմին պարտադրի այս քայլերի հետևանքները։

Ադրբեջանում քաղբանտարկյալների թիվը երկու անգամ ավելին է, քան Ռուսաստանում և Բելառուսում միասին վերցրած, իսկ վերջիններս էլ անշուշտ ժողովրդավարության ամենավառ օրինակները չեն։

Լեյլա և Արիֆ Յունուսների ձերբակալությունը ամենից շատ աչքի ընկնող օրինակներն են։ Լեյլա Յունուսի առողջությունը կալանավայրում արագորեն վատթարանում է, նրան արգելում են ստանալ բժշկական օգնություն։

Մի շարք այլ իրավապաշտպաններ դաժանորեն ծեծի են ենթարկվում իբր գտնվելով ազատության մեջ։

Մի շարք ամերիկյան և այլ միջազգային հասարակական կազմակերպություններ ստիպողաբար փակվել են, այդ թվում IREX, National Democratic Institute, Transparency International և Oxfam հայտնի կազմակերպությունները։

Կոշտ հակաամերիկյան ելույթներով է հանդես գալիս Ալիևի աշխատակազմի ղեկավար Ռամիզ Մեհդիևը։

Եվրոպայի Խորհրդի Մարդու իրավունքների հանձնակատար Նիլս Մույզնիկսը (Nils Muiznieks) նույնպես քննադատել էր Ադրբեջանի կառավարության գործողությունները` հայտարարելով, որ մարդու իրավունքների դեմ ոտնձգությունները «բոլորովին անընդունելի» են։

Ի՞նչու է Ալիևի ռեժիմը կարծում, որ կարող է անպատիժ մնալ այս իրավախախտումների համար։ Որովհետև մինչ այս նա իրոք մնացել է անպատիժ։ Նախագահ Օբաման պետք է հաշիվ ներկայացնի Ալիևին երկու կարևոր քայլ կատարելով։

Նախ, մարդու իրավունքների դեմ ոտնձգությունների համար պատասխանատու պաշտոնյաները պետք է զրկվեն ԱՄՆ մուտքի արտոնագիր ստանալու իրավունքից, և նրանց ֆինանսական կարողությունները պետք է սառեցվեն այնպես, ինչպես դա թելադրում է Ռուսաստանի դեպքում 2012թ ընդունված Մագնիտսկու ակտը։ Նախագահ Օբաման այդ իրավունքը ունի։

Երկրորդ, Միացյալ Նահանգները պետք է կոչ անի քաղաքական առաջնորդներին բոյկոտել Եվրոպական օլիմպիական խաղերը, որոնք կայանալու են այս տարի հունիսին։ Այս խաղերի աջակիցներ BP, Procter & Gamble և McDonald’s ընկերությունները պետք է նորից կշռադատեն իրենց մասնակցությունը այս միջոցառմանը։

Քանի դեռ Ալիևի ռեժիմը իր սեփական ժողովրդին այսքան վատ է վերաբերվում և արհամարհում է Միացյալ Նահանգներին, այն պետք է հասկանա, որ այս գործողությունների համար պետք է պատասխանատվություն կրել»։