Բեռնաթափում տոներից հետո. խորհուրդ է տրվում ավելի թեթև սնունդ օգտագործել

Առողջություն 15:38 07/01/2015

Բեռնաթափում տոներից հետո. խորհուրդ է տրվում ավելի թեթև սնունդ օգտագործել

Ամանորի տոնական կերուխումից հետո հարկավոր է բեռնաթափման օրեր անցկացնել, քանի որ տոներից հետո բոլորն էլ բախվում են ավելորդ քաշի խնդրին:

Այդուհանդերձ, դիետոլոգները խորհուրդ չեն տալիս հատուկ դիետայի հետևել, պարզապես պետք է անցնել մեղմ սննդային ռեժիմի, օգտագործել ավելի շատ կաթնամթերք` մածուն, յոգուրտ, կեֆիր, հեղուկներ, աղցաններ, սահմանափակել մսային սնունդը, քանի որ այն ծանրաբեռնում է և լյարդը, և երիկամները: Բացի այդ, պետք է սահմանափակել կամ հրաժարվել ալկոհոլից, արագ մարսվող սննդից` շոկոլադ, քաղցրավենիք:

Բժիշկ-դիետոլոգները մի քանի խորհուրդներ են տալիս, որոնց հետևելով հեշտությամբ կարելի է բեռնաթափել օրգանիզմը և ինչու չէ` նաև վերացնել ավելորդ կիլոգրամները:

Դիետոլոգները նախ առաջարկում են ուտել հաճախակի, բայց քիչ: Խորհուրդ է տրվում ավելի թեթև սնվել, սննդակարգը պետք է բաղկացած լինի բանջարեղենից և մրգերից: Ուտելուց հետո մնալ կիսասոված վիճակում, որպեսզի չծանրաբեռնել ստամոքսը: Խորհուրդ է տրվում շատ քանակությամբ հեղուկներ ընդունել։ Սակայն դա չպետք է լինի գազավորված կամ բնական հյութի տեսքով, որոնք շաքար են պարունակում։ Ցանկալի է շատ օգտագործել սովորական ջուր, հանքային ջուր:

Ըստ դիետոլոգների՝ կարճ ժամանակում մեծ արդյունք երաշխավորող դիետաներից ամենատարածվածը մոնոդիետաներն են, այսինքն՝ այստեղ օգտագործվում է միայն մեկ մթերք: Օրինակ՝ կեֆիրով մոնոդիետան, սակայն այն պետք է օգտագործել ընդամենը 3 օր: Կեֆիրը օգտակար է և պարբերաբար նրա օգտագործումը կարգավորում է նյութափոխանակությունը: Կեֆիրային դիետայի ժամանակ դուք պետք է օրական ըմպեք 1.5 լիտր կեֆիր՝ առանց շաքարավազի և աղի:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: