New York Times։ Ադրբեջանի նախագահ Ալիևի երկու երեսները
Ամերիկյան New York Times-ը իր կիրակնօրյա համարում խմբագրական հոդված է հրապարակել` սուր քննադատության ենթարկելով Ադրբեջանում խոսքի ազատության սահմանափակումները և լրագրողների նկատմամբ նախագահ Իլհամ Ալիևի վերջին բռնությունները և կոչ արել Միացյալ Նահանգներին և Եվրոպային ի վերջո ցույց տալ Ադրբեջանի բռնակալին, որ «իրենք չունեն որևէ պատրանք Ալիևի ով լինելու մասին»։
Հոդվածը ներկայացնում ենք կրճատումներով.
Ադրբեջանի նախագահ Իլհամ Ալիեւը Բաքվում ամերիկյան նախկին դեսպանի դիվանագիտական հաղորդագրություններում ներկայացվում էր Մայքլ Կորլեոնեի եւ Սաննի Կորլեոնեի երկու կերպարներով` իբրեւ միաժամանակ սառը հաշվարկներ եւ անասելի դաժանություններ անող «Կնքահայրը» ֆիլմի հերոսները։
Ալիեւը արեւմտամետ է մի շարք հարցերում եւ Արեւմունքը նրանով հրապուրվում է. նա փափուկ է, լավ է հագնվում եւ լավ անգլերեն է խոսում։ Նաեւ պատրաստ է իր նավթի եւ գազի պաշարները ուղղել դեպի Եվրոպա եւ Իսրայել։
Միեւնույն ժամանակ, Ալիեւը սարսափելի կոռումպացված է եւ նրա ավտորիտար վարչակարգը աշխարհում մարդու իրավունքների ամենավատ ցուցանիշերն ունի։
Անցյալ ամիս նա շարունակեց ազատ մամուլի եւ հասարակական կազմակերպությունների նկատմամբ իր արշավը, երբ ոստիկանները ԱՄՆ կողմից ֆինանսավորվող Ազատություն ռ/կ Բաքվի գրասենյակի վրա հարձակվեցին` իրենց հետ տանելով համակարգիչները եւ բոլոր փաստաթղթերը, իսկ աշխատակիցները կալանավորվեցին եւ հարցաքննվեցին։
Դրանից մի քանի շաբաթ առաջ կառավարությունը բանտարկեց հայտնի հետաքննող լրագրող Խատիջա Իսմայիլովային, ով հրապարակումներ էր պատրաստում Ալիեւի ընտանիքի բիզնեսների վերաբերյալ։ Իշխանությունները սկզբում նրան շանտաժի ենթարկեցին, հետո մեղադրեցին իր նախկին սիրեցյալին ինքնասպանության դրդելու մեջ` Օրուելի բոլոր կանոններով։
Ալիեւի հայրը` Հեյդար Ալիեւի կառավարում էր երկիրը 1963-ից ի վեր, սկզբում իբրեւ սովետական ղեկավար, ապա իբրեւ նախագահ` մինչեւ իր մահը 2003-ին։ Օգտագործելով նավթային եկամուտները` նրա որդի Իլհամը կայուն կերպով երկրում կառուցել է իր հոր անձի պաշտամունքը եւ վերընտրվել է երեք խնդրահարույց «ընտրությունների» միջոցով։
Արեւմուտքը պետք է հասկանա, որ ավտորիտար Ալիեւն է իրական Ալիեւը։ Քանի դեռ նա արագացնում է իր ընդդիմախոսների եւ ազատության որեւէ դրսեւորման դեմ բռնությունները, Միացյալ Նահանգները եւ Եվրոպան պետք է ավելի հստակեցնեն, որ թեեւ իրենք երբեմն ստիպված են լինում գործ ունենալ նրա հետ, այնուամենայնիվ իրենք չունեն որեւէ պատրանք Ալիեւի ով լինելու վերաբերյալ։
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
