Ձեր վստահելի աղբյուրը

 «Հայաստանը, որը հենց նոր է մտել ԵվրազԷս, անմիջապես ֆինանսական օգնություն է ստացել Եվրամիությունից»,- գրում է Ռուսական «Գազետա.ռու» կայքը: Աղբյուրը նշում է, որ գրեթե 78 միլիոն եվրո նախատեսված է սահմանների ամրացման, օրենսդրության մոտարկման և աղքատության հետ պայքարի համար: Ըստ «Գազետայի»՝ փորձագետները կարծում են, որ «երկու աթոռներին նստելը» պայմանավորված է ՌԴ տնտեսության թուլացմամբ:

Հղում տալով հայկական ԶԼՄ-ներին՝ «Գազետան» նշում է, որ հունվարի 16-ին կնքված համաձայնագրով ԵՄ-ն Հայաստանին կտրամադրի 77,5 միլիոն եվրո:

Ընդհանուր գումարից, ըստ աղբյուրի, 25 միլիոն եվրոն նախատեսված է գյուղատնտեսության համար և աղքատության հաղթահարման, 10 միլիոն եվրո՝ զբաղվածության ապահովման և մասնագիտական ուսուցման ոլորտին, 21 միլիոն եվրո՝ քաղծառայության բարեփոխման և կոռուպցիայի դեմ պայքարի համար: Սահմանների կառավարման և միգրացիայի ոլորտին կհատկացվի 4 միլիոն եվրո, որը ԵՄ հետ վիզային ռեժիմի դյուրացման համաձայնագրի շրջանակներում կլինի: Քաղաքացիական հասարակության ամրապնդման հարցում կտրամադրվի 6 միլիոն եվրո: Երևանի մետրոպոլիտենի վերանորոգման համար՝ 5 միլիոն եվրո կհատկացվի, իսկ Երևանի ջրամատակարարման սարքավորումների վերազինման համար՝ 5,5 միլիոն եվրո:

«Գազետան» նշում է, որ ֆինանսական օգնության տրամադրման մասին պայմանագիրը կնքվել է դեռ մեկ ամիս առաջ, երբ արդեն հայտնի էր դարձել ՀՀ մուտքը ԵՏՄ: Իսկ հունվարի 16-ին պարզապես հատուկ արարողությամբ տրվեց պայմանագրի մեկնարկը:

«Գազետան» գրում է, որ մինչև ԵՏՄ մտնելը Հայաստանը հնարավորինս ձգձգել է անդամակցության բանակցությունները՝ դրանով շահելով ԵՏՄ տարածքում ապրանքների ներմուծման մաքսատուրքերի 1,13 տոկոսը: Աղբյուրն ընդգծում է, որ Հայաստանն ընդհանուր սահման չունի Մաքսային Միության հետ: Ըստ «Գազետայի»՝ դա հանգեցնում է մի շարք խնդիների, ինչպիսիք են երրորդ երկրների տարածքով Միության ապրանքների տեղափոխումը: Նմանատիպ խնդիրներն, ըստ աղբյուրի, թույլ չեն տա, որպեսզի Հայաստանը դառնա ԵՏՄ լիարժեք գործընկեր:

«Գազետան» նշում է, որ ԵՏՄ անդամ դառնալով, Հայաստանը մտադիր է գազի գնի իջեցման պահանջ ներկայացնել, իսկ դա նշանակում է, որ Երևանին խոստացված արտոնությունների մեծ մասն ընկնում է ՌԴ վրա: Այս ֆոնի վրա, «Գազետան» ընդգծում է, որ ԵՄ ֆինանսական օժանդակությունը խիստ համեստ է:

Անդրադառնալով Հայաստանի՝ ԵՏՄ-ին անդամակցության քաղաքական ասպեկտներին, աղբյուրը նշում է, որ այն ևս հարթ չի ընթացել: Պատճառն, ըստ «Գազետայի», ՀՀ մասնակցությունն է ԵՄ Արևելյան գործընկերության ծրագրին: «Գազետան» նշում է նաև, որ ՀՀ քաղաքացիները ևս դեմ են եղել ԵՏՄ անդամակցությանը, իսկ երկրի ընդդիմադիր ուժերը հանրահավաքներ են անցկացրել՝ «Ոչ ռուսական կայսրությանը» կոչերով:

ԵՏՄ-ին ՀՀ անդամակցության պատճառներից կարևորագույնն, ըստ աղբյուրի, ՀՀ անվտանգության քաղաքականությունն է, որում ՀՀ-ն համագործակցում է ՌԴ հետ:

«Գազետան» գրում է, որ ՀՀ նախագահը գերադասում է «և…և…» քաղաքականություն վարել: «Մենք չենք ուզում ընտրություն կատարել ընկերների միջև, այլ ցանկանում ենք հնարավորինս շատ ընկերներ ունենալ»,- հայտարարել է ՀՀ նախագահը 2014 թվականի ապրիլի 25-ին ԵՄ գագաթնաժողովին: Նշենք, որ սա միանգամայն համապատասխանում է ՀՀ վարած բազմավեկտոր արտաքին քաղաքականությանը:

Ըստ «Գազետայի» տվյալների՝ ԵՄ պաշտոնյաները կարծում են, որ ԵՏՄ-ն երկար կյանք չունի, հետևաբար, ակտուալ է մնում ԵՄ արևելյան հարևաններին դեպի ԵՄ նորմեր ներգրավելու հարցը: Միևնույն ժամանակ, «Գազետան» նշում է, որ Հայաստանն այժմ առավել քան հետաքրքրված է ԵՄ հետ հարաբերությունների պահօանմամբ ու խորացմամբ, ինչի պատճառը ՌԴ տնտեսական ծանր վիճակն է:

Ընդ որում, «Գազետան» հայտնում է այն մասին, որ Ղազախստանը ևս ԵՄ հետ համագործակցության պայմանագիր է ստորագրել և ինքնուրույն քաղաքականություն է վարում: Աղբյուրը նշում է, որ Աստանան հույս ունի ԵՄ հետ սերտ համագործակցության միջոցով դառնալ Առևտրի համաշխարհային կազմակերպության անդամ: