Թուրք հոդվածագիր. Դինքի սպանության 8-րդ տարելիցն է` դրա բացահայտման ուղղությամբ իրական քայլեր չեն կատարվել
Թուրքական «Բուգյուն» լրատվական կայքի սյունակագիր Ադեմ Յավուզ Արսլանն իր հոդվածում անդրադարձել է Թուրքիայի կառավարության ու Գյուլենական համայնքի պայքարին և հայկական հարցի ու Թուրքիայի արտաքին քաղաքականության օրակարգում գտնվող այլ հարցերի առնչությունն այդ պայքարին:
Հեղինակի համոզմամբ` այժմ Էրդողանի և նրա կուսակցության անդամների առաջնահերթությունը դարձել է Թուրքիայում կամ ԱՄՆ-ում հանդիպած ամերիկացի պաշտոնյաներին բողոքելը գյուլենական համայնքի ղեկավար Ֆեթուլլահ Գյուլենից: Նշելով, որ այս ամենն արդեն զզվեցնում է ԱՄՆ-ին՝ հեղինակը բերում է մի թարմ օրինակ՝ մեջբերելով ԱՄՆ նախկին դեսպան Ռիկարդիոնեի հայտարարությունը.
«Մենք ասում ենք՝ ցույց տվեք մի բան, որը ԱՄՆ-ի կամ Թուրքիայի օրենքների համաձայն ապօրինություն է համարվում և բերեք ապացույցներ: Ահաբեկչության հե՞տ են կապված, փո՞ղ են լվանում, մա՞րդ են առևանգում: Դրանցից ոչ մեկը չկա, վիզային օրենքի խախտում էլ չկա»:
Ըստ հեղինակի` կառավարությունը և նրան սպասարկող մամուլը նախկին դեսպանին էլ կապեցին գյուլենական համայնքի հետ, ինչպես անում են բոլոր այն դեպքերում, երբ ձախողվում են: Նույն մոտեցումը գործի են դրել նաև Հայկական հարցի դեպքում: Հայտնի է, որ հայերն ակտիվ նախապատրաստության մեջ են հարյուրամյակին ընդառաջ:
«Սպասվում էր, որ այդպիսի իրավիճակում Անկարայի դիվանագիտությունը, օգտագործելով ողջ կարողությունը, չեզոքացնելու էր սպասվող վտանգը: Բայց «պետական խելք»-ն իր մոտեցումով անտեսում է վտանգը: Ավելին, Թուրքիայի թեզերին ավելի մոտ գտնվող հանրապետականների՝ կոնգրեսի երկու թևերում ունեցած ազդեցության շնորհիվ որոշ բաներ կարելի էր ավելի հեշտ հաղթահարել: Սակայն Էրդողանը, նախընտրելով գործն անել խաղալ ազգայնական հենքի վրա, իր քայլերով գործերն ավելի է բարդացրել: Ապրիլի 24-ին Հայաստանի առաջնորդին Դարդանել հրավիրելն այդ քաղաքականության մի մասն է: Էրդողանը չի խորշում մի սխալի հետևից մյուսն անել: Ինչ էլ լինի բոլոր սխալները կարելի է բարդել գյուլենականների վրա»,- նշում է թուրք հեղինակը:
«Այսօր Հրանտ Դինքի սպանության 8-րդ տարելիցն է: Ցավոք այս տարիների ընթացքում սպանության բացահայտման ուղղությամբ իրական քայլեր չեն կատարվել: Դեկտեմբերի 17-ի կոռուպցիոն սկանդալը մոռացնելու ուղղությամբ ակտիվ ջանքեր գործադրող կառավարությունը հիմա էլ Դինքի և Մալաթիայի Զիրվե» հրատարակչության աշխատակիցների սպանություններն է կապում գյուլենականներ հետ: Դրա համար էլ 180 աստիճանով փոխվել են ձեռքերն արյունոտ մարդասպանների ցուցմունքները: Մյուս կողմից գործընթացի վերաբերյալ կարևոր տեղեկությունների տիրապետող մարդկանց իրենց հովանու տակ են պահում», -նշում է Արսլանն ավելացնելով, որ մինչև այսօր Դինքի դեպքն օգտագործողները շահարկման նոր ծրագրեր են մշակում:
«Կարճ ասած՝ ամոթը գնալով մեծանում է»,- եզրափակում է հոդվածի հեղինակը:
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
