Ձեր վստահելի աղբյուրը

Արարատի փոքրիկ բնակիչ, 3-ամյա Գոռն այսօր բոլորիս օգնության կարիքն ունի: Մոտ մեկ ամիս առաջ փոքրիկի մոտ գլխուղեղի ուռուցք է հայտնաբերվել: Գոռի ծնողները, տատիկը, ով մանկաբույժ է, նկատել են, որ երեխան քայլելուց հետո շատ շուտ հոգնում է, բացի այդ` գլխապտույտ ունի: Ծնողներն իրենց հանգստության համար երեխային անմիջապես տարել են բժշկի, սակայն հետազոտության արդյունքը ծնողներին սարսափեցրել է` փոքրիկի գլխուղեղում հայտնաբերվել է բավականին մեծ ուռուցք:

Panorama.am-ի հետ զրույցում հուսահատ հայրը, 30-ամյա Գրիգոր Մուսիկյանը, նշեց, որ ախտորոշումից անմիջապես հետո` ամանորի նախաշեմին փոքրիկին տեղափոխել են Երևանի «Սուրբ Աստվածամայր» բժշկական կենտրոն, որտեղ նրան վիրահատել են (շունտավորել)` գլխում տեղադրելով ժամանակավոր սարք, որի միջոցով հնարավոր կլինի իջեցնել երեխայի գլխուղեղի ճնշումը, իսկ ուղեղում առկա հավելյալ հեղուկն էլ տեղափոխել օրգանիզմ: Սակայն շունտավորումը դեռ սկիզբն է: Փոքրիկը հիմա էլ չի կարողանում քայլել, երեխայի վիճակը ամեն վայրկյան վատանում է: Բժիշկները ծնողներին հայտնել են, որ փոքրիկը շատ քիչ ժամանակ ունի երկրորդ անհրաժեշտ վիրահատության համար, որը պետք է կատարվի Լենինգրադում, քանի որ Հայաստանում նման բարդության վիրահատություններ չեն կատարվում:

Կապ հաստատեցինք նաև Գոռին վիրահատած բժշկի հետ: «Սուրբ Աստվածամայր» բժշկական կենտրոնի նյարդավիրաբուժական բաժանմունքի վարիչ Մարգար Մարտիրոսյանը Panorama.am-ի հետ զրույցում նշեց, որ Գոռն իրենց մոտ է տեղափոխվել կատաստրոֆիկ վիճակում:

«Մենք կատարել ենք ամոքիչ վիրահատություն` շունտավորում, որը թույլ է տվել այդ կատաստրոֆիկ վիճակը կայունացնել, ինչպես նաև հնարավորություն տալ, որպեսզի ծնողները կարողանան երեխային տեղափոխել արտերկիր երկրորդ վիրահատություն կատարելու համար: Նման վիրահատությունները կատարվում են արտերկրում, քանի որ Հայաստանում դեռևս այդ փորձը չունենք, նման սարքավորումներ էլ չկան: Բացի այդ, ուռուցքի հեռացումից հետո երեխան պետք է քիմիա կամ ճառագայթային թերապիայի կուրս անցնի, իսկ մեզ մոտ այդ բուժումը դեռևս այն մակարդակին չէ: Ծնողներին տվել ենք տեղեկանք, որ կարողանան միջոցներ գտնել` երեխայի բուժումը արտերկրում կազմակերպելու համար»,- ասաց Մարգար Մարտիրոսյանը` հավելելով, որ ըստ իրեն` երեխայի վիճակը մոտ 2-3 ամիս հնարավոր է կայուն պահել, բայց դա չի կարող երկար շարունակվել:

«Մենք մեր հնարավորություններն օգտագործել ենք` երեխայի վիճակը կայունացնելու համար»,- ասաց Մ.Մարտիրոսյանը:

Գրիգոր Մուսիկյանը նշեց, որ ինքը կապ է հաստատել անվանի նյարդավիրաբույժ, պրոֆեսոր, Սանկտ Պետերբուրգի Պոլենովի անվան նյարդավիրաբուժության գիտահետազոտական ինստիտուտի մանկական կլինիկայի ղեկավար Վիլյամ Խաչատրյանի հետ: Վերջինս պատրաստ է կատարել այդ վիրահատությունը: Նշենք, որ Վ.Խաչատրյանը Սերյոժա Ավետիսյանի կյանքը փրկելու համար եկել էր Հայաստան, այդ ընթացքում էլ Գոռի ծնողները հանդիպել են բժիշկի հետ:

«Միակ մարդը, որ հույս է տվել փրկել երեխայիս կյանքը, դա Վիլյամ Խաչատրյանն է: Նա ասել է, որ ամեն ինչ կանի երեխայիս համար»,- ասաց Գ. Մուսիկյանը:

Նրա խոսքերով` Սանկտ Պետերբուրգում  երկրորդ վիրահատության համար անհրաժեշտ է 10 հազար ԱՄՆ դոլար, բացի այդ անհրաժեշտ է գումար հետագա բուժումների համար: Ընդհանուր առմամբ` երեխայի կյանքը փրկելու համար անհրաժեշտ է շուրջ 20 հազար դոլար:

«Դեռ պարզ չէ` ինչ տեսակի ուռուցք է: Աստծուն միայն խնդրում ենք, որ ուռուցքը բարորակ լինի»,- ասաց հուսահատ հայրը:

Գրիգորը նշեց, որ այս պահի դրությամբ երեխային օգնելու համար բացված հաշվեհամարին շուրջ 900 հազար դրամ է փոխանցվել: Հայրն ասաց, որ շատերն են խոստացել օգնել, սակայն դեռ հստակ չէ, թե որքան գումար կհավաքվի. «Մեզ համար ամեն վայրկյանը կարևոր է: Եթե գումարը լինի, նույն պահին էլ երեխային կտեղափոխեմ Լենինգրադ: Չարագործ ուռուցք է, չես իմանա, թե ինչ կանի»:

Գոռը Մուսիկյանների առաջին երեխան է: Գոռի մայրը գտնվում է ութ ամսական հղիության շրջանում: Փետրվարի 20-25-ին ընտանիքը սպասում է իրենց երկրորդ երեխայի ծնվելուն. «Միայն Գոռիս կյանքը փրկենք, Աստծուց խնդրում եմ, որ բոլոր երեխաները միայն առողջ լինեն»:

Նշենք, որ «Օգնենք փոքրիկ Գոռին» Facebook-յան էջում տեղադրված է 3-ամյա Գոռ Մուսիկյանի վերաբերյալ հետևյալ գրառումը. «Ցավոք Գյումրիի սպանդից ողջ մնացած Սերյոժայի կյանքը հնարավոր չեղավ փրկել: Աստված հոգիդ լուսավորի փոքրիկ հրեշտակ: Սա մեր բոլորի ցավն է, սգում է ողջ ազգը, այդ թվում փոքրիկ Գոռի ծնողները, ովքեր ՆՈՒՅՆ հիվանդանոցում, կողք կողքի պայքարում էին իրենց որդու կյանքի, բայց աղոթում նաև Սերյոժայի փրկության համար: Ցավոք Սերյոժային փրկել չհաջողվեց: Այսօր մեծ սուգ է բոլորիս ընտանիքներում: Բայց մենք կարող ենք մեր բարի քայլով օգնել, որ այդ ցավը կրկնակի չդառնա մեր մյուս փոքրիկ հայրենակցի` Գոռի ընտանիքում: Սիրելիներս Գոռին Լենինգրադ տեղափոխելու վերջնաժամկետը մոտենում է իր ավարտին, բայց վիրահատության գումարը դեռ չի հավաքվել: Երեխայի վիճակը ամեն վայրկյան վատանում է: Օգնենք, որ գոնե այս փոքրիկը փրկվի»,-ասված է գրառման մեջ:

Էջում ներկայացված են նաև հետևյալ լուսանկարները.

Գոռին օգնելու համար բացվել է հատուկ հաշվեհամար ՎՏԲ բանկում.
AMD 16048274808600
USD 16048274808601
EUR 16048274808602
RUR 16048274808603
Հեռ. 098 33 68 27, 095 33 68 27 Մուսիկյան Գրիգոր (հայր)