Ձեր վստահելի աղբյուրը

Այլ կերպ դժվար է հասկանալ տարվա սկզբից սահմանում գրանցվող դիվերսիաների և զոհերի քանակը. երեք օրը մեկ՝ զոհ ունենք: Զոհերն էլ կա՛մ դիվերսիայի արդյունքում են, կա՛մ դիպուկահարների կրակոցներից: Սրանով Ադրբեջանը մի քանի խնդիր է ուզում լուծել: Նախ, ամեն կերպ հաճոյանալ թուրքիայի իշխանություններին՝ ցույց տալով իր հավատարմությունը մեծ եղբորը:

Երկրորդ. որքան հնարավոր է համը հանել մինչև Ապրիլի 24-ը: Այնպես որ պետք է հարյուր անգամ ավելի զգոն լինել, քանի որ դիվերսիաների դեպքերը, ամենայն հավանականությամբ, ավելանալու են, շատանալու են նաև դիպուկահարների կրակոցները:

Երրորդ. Ադրբեջանի իշխանություններն իրենց զոհված զինվորներին չեն հաշվում, իրենց կողմից ծառայում և զոհվում են ինչպես ադրբեջանցիներ, այնպես էլ էթնիկ տարբեր խմբերի ներկայացուցիչներ, բայց դա մի կողմ. փաստն այն է, որ Ադրբեջանի իշխանությունների համար զինվորը մարդահաշիվ չի, այնպես որ երբ մերոնք հայտարարում են, որ ամեն զոհված հայ զինվորի դիմաց Ադրբեջանը տասնապատիկ ավելի զինվոր է կորցնում, հարց է առաջանում. է, մեզ ի՞նչ, եթե Ադրբեջանին ոչինչ. ո՛չ իրենց բանակն է թուլանում կամ քչանում, ո՛չ մեր նկատմամբ դիրքորոշումն է փոխվում:

Չորրորդ. Ադրբեջանը ցույց է տալիս միջազգային հանրությանը, որ թքած ունի բոլոր տիպի պայմանավորվածությունների և խոստումների վրա, որովհետև ինքը նավթ ունի և դաշնակից՝ ի դեմս Թուրքիայի, որոնց վրա միշտ կարող է հենվել: Ժամանակն է, որ միջազգային հանրությունը կոշտ սանկցիաներ կիրառի ագրեսորի վարք դրսևորող Ադրբեջանի նկատմամբ:

Ի՞նչ կարելի է անել. ժամանակակից աշխարհը մեդիա-աշխարհ է, ժամանակակից իրականությունը մեդիա-իրականություն է, դրանում էական նշանակություն ունի այն, ինչ ներկայացվում է մեդիայի միջոցով, ոչ թե այն, ինչ տեղի է ունենում իրականում:

Այնպես որ հայկական և հայամետ բոլոր մեդիառեսուրսները պետք է աշխատեն Ադրբեջանի այս տարվա և մյուս բոլոր դիվերսիաները հնարավորինս լայն ներկայացնեն, քննարկեն, փաստարկեն, թարգմանեն և անընդհատ հիշեցեն, հիշեցեն, հիշեցեն հակամարտության կարգավորմամբ զբաղվող միջազգային կառույցներին: Աշխարհում ամեն ինչ չափն է որոշվում՝ ասելու, ցուցադրելու, փաստարկելու, հիշեցնելու:

Մովսես Դեմիրճյան