Ձեր վստահելի աղբյուրը

Վերջին շրջանում Ադրբեջանի խորհրդարանի պատգամավոր Ֆազիլ Մուսթաֆան պարբերաբար ենթարկվում է հարձակումների ու մեղադրանքների տարափի Ֆեյսբուքի ադրբեջանալեզու, ինչպես և ռուսալեզու զանգվածի կողմից: Պատգամավորին տհաճ որակումներ են տալիս զուտ այն պատճառով, որ վերջինս իր էջում գրել էր` մինչև 1918-ն «Ադրբեջան» անունով պետություն չի եղել: Այս մասին հաղորդում է ադրբեջանական «Հաաքին.ազ» տեղեկատվական պորտալը:

Պորտալը ներկայացնում է տարածաշրջանի հակիրճ պատմությունը` շեշտելով, թե 1918-ի մայիսի 28-ին Հարավային Կովկասի արևելյան հատվածում հռչակվել է մուսուլմանական Արևելքում առաջին խորհրդարանական դեմոկրատական հանրապետությունը` Ադրբեջանի դեմոկրատական հանրապետությունը (ԱԴՀ)` Գյանջա մայրաքաղաքով:

«Ինչպես տեսնում ենք, «Ադրբեջան» անվանումը մեր երկիրը ստացել է միայն 1918-ին: Ով ինչ ուզում է, թող ասի, բայց պատմությունը նույնքան համառ երևույթ է, որքան փաստերը, և, ըստ էության, Մուսթաֆան իրավացի է»,- նկատում է պորտալը` միաժամանակ նշելով, թե ադրբեջանցիները գրեթե մեկ դար ժամանակահատվածում հարկադրված են եղել երեք անգամ այբուբեն փոխել: Առավել բարդ էր, ըստ հոդվածագրի, արաբատառ այբուբենից լատինատառին անցումը:

«Ինչպես 1918-1920 թթ., այնպես էլ Բաքվում սովետական կարգերի հաստատումից հետո «Ադրբեջան» անվանումն աշխարհագրական նշանակություն չի ունեցել Անդրկովկասի արևելքի նկատմամբ կիրառության առումով, քանի որ շրջանառության մեջ է դրվել զուտ որպես պետական կազմավորման անվանում: Արևելյան Անդրկովկասը մինչ այդ երբևէ Ադրբեջան չի կոչվել: «Ադրբեջանցիներ» հասկացություն Առաջին համամիութենական մարդահամարում գոյություն չի ունեցել: Նույն այդ մարդահամարի ցուցակներում Անդրկովկասի մուսուլման թյուրքական բնակչությունը ներկայացված էր հավաքական «թյուրք» անվան ներքո, քանի որ առավել առարկայական առաջարկ սովետական իշխանություններն այդ պահի դրությամբ չունեին. այդ ժողովուրդը ոչ մի կերպ աչքի չէր ընկնում: «Ադրբեջանցի» հասկացությունը հայտնվել է միայն Ստալինի որոշումից հետո»,- հավաստիացնում է պորտալը:

«Այո, մենք երիտասարդ պետություն ու ազգ ենք, բայց մենք դրանով պետք է հպարտանանք` ինչպես ամերիկացիները ԱՄՆ-ով»,-եզրափակում է հոդվածագիրը:

Նյութեր թեմայի շուրջ`
Ադրբեջանի խորհրդարանի պատգամավորին սպառնում են` երկրի «ազգային հերոսների» կեղծ լինելը բացահայտելու համար
Պատմության մեջ Ադրբեջան անունով պետություն չի եղել. ադրբեջանցի պատգամավոր
Ադրբեջանը ռազմական հարուստ պատմություն չունի, և իրեն է վերագրում Թուրքիայի պատմական հերոսական դրվագները. ադրբեջանցի պատգամավոր
Ադրբեջանի պատմության դասագրքերում հայերից բացի նոր թշնամի է հայտնվել` վրացիները
Ինչպես է Ադրբեջանը կեղծում պատմությունը. Ռուբեն Գալիչյան