Ձեր վստահելի աղբյուրը

ՀՀ կառավարությունը հանդիպում կկազմակերպի բողոքի ակցիաներ անցկացնող տարբեր տոնավաճառների ներկայացուցիչների հետ՝ քննարկելու նրանց բարձրացրած հարցերը: Այս մասին գործադիրի այսօրվա նիստում հայտարարեց ՀՀ վարչապետ Հովիկ Աբրահամյանը:

ՀՀ ֆինանսների նախարարի տեղակալ Վախթանգ Միրումյանը վարչապետի խնդրանքով ներկայացրեց «Շրջանառության հարկի մասին» նոր օրենքի շուրջ տնտեսվարողների հետ նախորդ տարի ձեռք բերված պայմանավորվածությունների կատարման ընթացքը:

Փոխնախարարը հայտնեց, որ նոր օրենքը, որն ընդունվել է նախորդ տարվա հունիսին, նախատեսում էր փոխզիջումային տարբերակ: Մասնավորապես, ըստ նրա, պետությունը շեշտակիորեն նվազեցրել է հարկային բեռը՝ սահմանելով փաստաթղթավորման պարտադիր պահանջ:

«Օրենքի կիրառումը նախորդ տարվա հոկտեմբերի 1-ից տեղափոխվեց մինչ փետրվարի 1-ը, ինչը պայմանավորված էր չկարգավորված հարցերով, որոնք գործընթացի իրականացումը դժվարացնում էին: Կային բազմաթիվ տնտեսվարողներ, ովքեր ՀՀ-ի տարածքից դուրս կատարում էին ապրանքային ձեռքբերումներ, սակայն տեղափոխությունը կատարում էին մասնագիտացված կազմակերպության միջոցով, ովքեր փաստաթղթով չէին աշխատում: Կառավարությունն այդ նպատակով ընդունեց նոր նախագիծ, որով կարգավորվեց այդ խնդիրը»,- ասաց Վ.Միրումյանը:

Նրա խոսքերով՝ մյուս հարցը վերաբերում էր գույքագրման սահմանված ձևին, որն ըստ տնտեսվարողների, մատչելի չէր. «Մենք վերանայեցինք նաև այդ ձևը և էականորեն հեշտացվեց ապրանքների գույքագրման կարգը, որը պետք է ներկայացնվի ընդամենը մեկ անգամ՝ ներկայացնելով ապրանքախմբի անվանումը և քանակը»:

Հաջորդ հարցը, ըստ Վ.Միրումյանի, վերաբերում էր օրենքի շուրջ իրազեկման խնդիրներին: Այդ ընթացքում, ինչպես վստահեցրեց նա, հասարակական կազմակերպությունները բազմաթիվ հանդիպումներ են ունեցել տնտեսվարողների հետ, իրազեկել նրանց՝ գործընթացը կազմակերպելու համար:

Հ.Աբրահամյանը նշեց, որ այսօր կազմակերպվելու է հանդիպում տնտեսվարողների հետ և փաստեց, որ կառավարությունը նրանց հետ ինչ պայմանավորվել էր, կատարել է:

Նշենք, որ այս պահին էլ ՓՄՁ-ների ներկայացուցիչները բողոքի ակցիա են կազմակերպում Կառավարության շենքի առջև: Նրանց պահանջն է մինչև փետրվարի 1-ը կասեցնել «Շրջանառության հարկի մասին» նոր օրենքը: Հիշեցնենք, որ առևտրականներն արդեն չորրորդ օրն է հավաքվում են կառավարության շենքի դիմաց: Նախօրեին նրանք բողոքի ակցիա էին անցկացրել նաև նախագահական նստավայրի առջև: Նրանք նաև նշում են, որ եթե այսօր կառավարությունից պատասխան չտան, ապա 10 օրով կփակեն խանութները և չեն վճարի հարկերը:

«Ակցիան օրինական է և տեղավորվում է ՀՀ սահմանադրության և օրենքի շրջանակներում»,-հայտարարեց ակցիային ներկա ՓՄՁ ներկայացուցիչներից մեկը:

Փետրվարի 1-ից ուժի մեջ մտնող «Շրջանառության հարկի մասին» ՀՀ նոր օրենքով առաջարկվում է փոքր և միջին բիզնեսի ներկայացուցիչների համար շրջանառության հարկի դրույքաչափը 3,5 տոկոսից նվազեցնել 1 տոկոսի, միաժամանակ, տնտեսավարողները պարտավորվելու են գործունեություն ծավալել հստակ փաստաթղթաշրջանառությամբ:

Նախորդող հրապարակումներ՝
Ակցիա՝ կառավարության մոտ. «Լինելու են մարդիկ, որ թողնելու, չլուդ գնալու են Հայաստանից»
Ակցիայի մասնակիցները, նախքան նախագահական հասնելը, դիմեցին պատգամավորներին