Ձեր վստահելի աղբյուրը

ՀՀ ֆինանսների փոխնախարար Վախթանգ Միրումյանն այսօր լրագրողների հետ զրույցում ասաց, որ ԱԺ նախկին պատգամավոր Հակոբ Հակոբյանի (Ճոյտ) ձերբակալության պատճառների մանրամասներին չի տիրապետում:

Հիշեցնենք, որ ըստ ֆինանսների նախարարության տարածած հաղորդագրության` ձերբակալված Հակոբ Հակոբյանը, ըստ Քրեական օրենսգրքի, զբաղվել է ապօրինի ձեռնարկատիրությամբ, որի արդյունքում անձանց կամ կազմակերպություններին կամ պետությանը հասցվել է խոշոր չափի վնաս, չարամտորեն խուսափել է հարկերը, տուրքերը կամ պարտադիր այլ վճարումները վճարելուց:

«Բոլոր այն դեպքերում, երբ հարկային պարտավորությունների չափը գերազանցում է Քրեական օրենսգրքով նախատեսված սահմանաչափը, որի համար արդեն նախատեսվում է քրեական պատասխանատվություն, ֆինանսների նախարարությունը քննչական վարչությունում գործը քննում է»,- ասաց փոխնախարարը` հավելելով, որ սա առաջին դեպքը չէ, երբ Ֆինանսների նախարարության տվյալ մարմինը քրեական գործ է հարուցում չարամտորեն հարկային պարտավորություններից խուսափողների հանդեպ:

Նա լրագրողներին ասաց, որ կարող են խնդրել այդ վիճակագրությունը, իրենց գործընկերները այդ տվյալները կտրամադրեն:

«Բոլոր այն դեպքերում, երբ առկա է հարկերից չարամտորեն խուսափելու փաստ, հարուցվում է քրեական գործ»,- ասաց Վ.Միրումյան:

Հարցին, թե կոնկրետ որ ժամանակահատվածում է Հ. Հակոբյանը խուսափել հարկերը վճարելուց, փոխնախարարը պատասխանեց, որ գործի մանրամասներին ծանոթ չէ:

Մեկ այլ հարցին, թե հնարավո՞ր է, որ քրեական գործի հարուցումը կապ ունի Հակոբյանի նկարահանած ֆիլմի հետ և այդ գումարները հենց հարկային պարտավորությունները չկատարելու արդյունքում են գոյացել, Միրումյանն ասաց․ «Կարողաները շատ են, բայց Ֆինանսների նախարարությունը կարող է նյութեր ուղարկել համապատասխան մարմիններին բացառապես հարկերից չարամտորեն խուսափելու համար»:

Լրագրողի դիտարկմանը, թե փոխնախարարը չի կարծո՞ւմ, որ Հ.Հակոբյանի ձերբակալությունը կարող է հարված հասցնել հայ կինեմատոգրաֆիային, Միրումյանը նշեց, որ բոլոր նրանք, ովքեր կխուսափեն հարկերից, կպատժվեն:

«Ցանկացած նման դեպք առաջին հերթին հարված է Հայաստանի Հանրապետությանը»,- ասաց նա:

Հիշեցնենք, որ ֆինանսների նախարարության տարածած հաղորդագրության համաձայն՝ Հակոբ Ռաֆիկի Հակոբյանը ձերբակալվել է 2015թ. փետրվարի 2-ին ՀՀ ՖՆ քննչական վարչության վարույթում քննվող N 83152012 քրեական գործով ՀՀ քրեական օրենսգրքի 188-րդ հոդվածի 3-րդ մասի 1-ին կետով, 188-րդ հոդվածի 2-րդ մասով, 38-205-րդ հոդվածի 1-ին մասով, 38-188-րդ հոդվածի 3-րդ մասի 1-ն կետով, 188-րդ հոդվածի 3-րդ մասի 1-ին կետով, 38-205-րդ հոդվածի 1-ին մասով, 38-205-րդ հոդվածի 2-րդ մասով նախատեսված հանրորեն վտանգավոր արարքներ կատարելու կասկածանքով:

Նախորդող հրապարակում`

Ֆինանսների նախարարությունը՝ նախկին պատգամավոր Հ. Հակոբյանի ձերբակալության մասին
Հակոբ Հակոբյանը ձերբակալվել է