Ձեր վստահելի աղբյուրը

Տաքսու վարորդները պատրաստվում են բոյկոտել լիցենզավորման կարգում կառավարության կողմից կատարված փոփոխությունը: Այսօր լրագրողների հետ հանդիպմանն այս մասին հայտնեց անհատ ձեռներեց տաքսու վարորդ Մխիթար Օհանյանը:

Նշենք, որ կառավարության կողմից կատարված փոփոխության համաձայն վարորդներն ամսական պետք է 12.000 դրամ հարկ վճարեն:

«Մեր պահանջները ոչ մի կերպ չբավարարվեցին՝ կապված կայանատեղիների բացակայության և կարգուկանոն հաստատելու հետ: Մենք էլ պահանջում ենք կասեցնել օրենքի այս նոր փոփոխությունը: Ի վիճակի չենք վճարել 12000 դրամ, գումարած 5000 հարկային վճար: Եթե ցանկանում ենք դառնալ անհատ ձեռներեց, ապա հավելյալ պիտի 100000 դրամ էլ վճարենք»,-ավելացրեց Մ. Օհանյանը:

Հնադիպմանը ներկա Ավտովարորդների պաշտպանության լիգայի նախագահ Տիգրան Հովհաննիսյանն էլ ասաց, որ Տրանսպորտի և կապի նախարարության հետ նախկին հանդիպումների ժամանակ իրենց խոստացել են օրենքում փոփոխություններ կատարել. «Մեզ ասացին, որ այս օրենքը թող ընդունվի, հետո մենք փոփոխություններ կանենք, հիմա պահանջում ենք, որ անեն իրենց խոստացած փոփոխությունները, քանի որ վարորդներն ի վիճակի չեն վճարել 12000 դրամը»:

Ասուլիսին ներկա վարորդները նշեցին, որ այս պահին իրենց միակ պահանջն է անժամկետ կասեցնել օրենքը: Նաև տեղեկացրեցին, որ իրենց պահանջը կառավարությանը կներկայացնեն հինգշաբթի օրը և բողոքի ակցիա կանեն: