«Հայերի ներկայությունը Իտալիայում 1915-2000թթ.» գրքի շնորհանդեսը՝ Վենետիկում

Հասարակություն 17:09 03/02/2015

Վենետիկում հունվարի 30-ին կայացել է կայացավ Իտալիայի հայերի միության նախկին նախագահ, Միլանի ու Տրենտոյի համալսարանների սոցիոլոգիայի դասախոս, պրոֆեսոր Հակոբ Մանուկյանի «Հայերի ներկայությունը Իտալիայում 1915-2000թթ.» գրքի շնորհանդեսը:

Միջոցառմանը ելույթ է ունեցել Իտալիայում ՀՀ դեսպան Սարգիս Ղազարյանը: Նա իր խոսքում մեծապես կարևորել է գրքի հրատարակումը՝ այն համարելով լուրջ ներդրում իտալահայ համայնքի կյանքը ներկայացնող փաստագրական գրականության մեջ: Դեսպան Ղազարյանը նկատել է, որ պրոֆեսոր Հակոբ Մանուկյանի «Հայերի ներկայությունը Իտալիայում 1915-2000թթ.» գիրքը հրատարակվել է Հայոց ցեղասպանության 100-րդ տարելիցի նախաշեմին և մանրամասն պատկերում է Իտալիայում ապաստան գտած, Ցեղասպանությունը վերապրածների կյանքը:

Դեսպանն անդրադարձել է իտալահայ համայնքի 20 դար ունեցող պատմությանը՝ այն դիտարկելով որպես կարևորագույն ներուժ Հայաստանի և Իտալիայի միջև երկկողմ հարաբերությունների ամրապնդման հարցում: Դեսպանը խոսել է նաև 20-րդ դարում Իտալիայի Հանրապետության զարգացման գործում իտալահայ հասարակական գործիչների ավանդի մասին:

Ելույթներ են ունեցել Վենետիկի քաղաքապետարանի մշակութային վարչության տնօրեն Ռոբերտո Էլլերոն, թղթակից Էդուարդո Պիտալիսը և գրքի հեղինակ Հակոբ Մանուկյանը:

Իտալիայում ՀՀ դեսպանության հովանավորությամբ կայացած շնորհանդեսը, որին ներկա են եղել Վենետիկի քաղաքապետարանի, հասարակական շրջանակների և հայ համայնքի ներկայացուցիչներ ու լրագրողներ, կազմակերպվել էր Հայկական մշակույթի ուսումնասիրության և վավերագրման Վենետիկի կենտրոնի կողմից:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: