Ձեր վստահելի աղբյուրը

2014 թվականին Կոնվերս Բանկի գործունեության բոլոր ցուցանիշներով գրանցվել է զգալի աճ: Այս մասին այսօր լրագրողների հետ հանդիպման ժամանակ ասաց Կոնվերս Բանկի գործադիր տնօրեն Տիգրան Դավթյանը` ներկայացնելով 2014 թ-ի ֆինանսական արդյունքները:

Նրա խոսքերով` բանկի զուտ շահույթը 2014 թվականին աճել է ավելի քան 5 անգամ` կազմելով 2,380 մլրդ դրամ, իսկ առանց մասնահանումների շահույթը կազմել է 3.2 մլրդ դրամ` նախորդ տարվա համեմատ աճելով 56%-ով: Նշվեց նաև, որ գործառնական եկամուտը կազմել է 9.7 մլրդ դրամ՝ նախորդ տարվա համեմատ աճելով 29.4% -ով: Ընդ որում` զուտ գործառնական ոչ տոկոսային եկամուտը կազմել է 3.4 մլրդ դրամ՝ 2013թ-ի համեմատ աճելով 44.6% -ով:

Տ.Դավթյանն ասաց, որ 2014թ-ին բանկի կապիտալի շահութաբերությունը կազմել է 10.4%, ակտիվների շահութաբերությունը` 1.6%: Նրա խոսքերով` վերջին շրջանում բանկային համակարգում շահութաբերությունը նվազելու միտում ունի, ինչը կապված է ՀՀ կենտրոնական բանկի կողմից վարվող քաղաքականության, Բազելյան կոմիտեի կողմից առաջարկվող նորմատիվների ներդրման հետ:

«Վերջին տարիներին այս ցուցանիշը ընդհանուր բանկային համակարգում նվազում է, կարծում եմ, որ սա դեռ կնվազի, քանի դեռ խստանում են պահանջները բանկերի նկատմամբ»,- ընդգծեց Կոնվերս Բանկի գործադիր տնօրենը:

Ինչ վերաբերում է բանկի ակտիվներին, ապա նախորդ տարի դրանք կազմել են 149 մլրդ դրամ՝ նախորդ տարվա համեմատ աճելով 22.5% -ով, պարտավորություններն էլ կազմել են 126 մլրդ դրամ` աճելով 23.1% -ով, իսկ բանկի ընդհանուր կապիտալը կազմել է 23 մլրդ դրամ՝ նախորդ տարվա համեմատ աճելով մոտ 20% -ով:

Տ.Դավթյանի խոսքերով` թեև 2014թ-ը բավականին ծանր տարի էր բանկային համակարգի համար` հատկապես տարեվերջին, այդուհանդերձ, Կոնվերս բանկի վարկային պորտֆելը աճել է 17%-ով` կազմելով 97 մլրդ դրամ: Հաճախորդների նկատմամբ պարտավորությունները նույնպես աճ են արձանագրել և կազմել են 98 մլրդ դրամ՝ 2013թ-ի համեմատ աճելով 16.3%-ով:

«2014թ-ի վերջին գրանցվեց հաճախորդների արտահոսք բանկային համակարգից, մասնավորապես, ավանդների վերադարձ և այլն, սակայն Կոնվերս բանկում նմանատիպ երևույթներ չարձանագրվեցին: Ավելին` հաճախորդներից ներգրավված ավանդները տարեվերջին աճել են 16,3%-ով: Այս ցուցանիշը արձանագրում է հաճախորդների Կոնվերս Բանկի նկատմամբ ունեցած վստահությունը՝ անգամ հաշվի առնելով տարեվերջյան բարդ ֆինանսական իրավիճակը»,-ասաց Տ.Դավթյանը:

Անդրադառնալով փոխանցումներին, Կոնվերս բանկի գործադիր տնօրենը նշեց, որ նախորդ տարի արագ փոխանցման համակարգերով կատարված փոխանցումների ծավալը կազմել է 62 մլրդ դրամ՝ արձանագրելով 33% -ի աճ:

Նշենք նաև, որ 2014թ-ին բանկի կողմից գործարկվել է Կոնվերս Տրանսֆեր համակարգը, որին միացել են նաև հայաստանյան այլ բանկեր: Տ.Դավթյանի խոսքերով` այս համակարգը մեծ դերակատարություն ունեցավ փոխանցումների աճի վրա:

«Այսօր բավականին մեծ քանակությամբ բանկեր միացել են այդ համակարգին: Սա հայկական առաջին արագ դրամական փոխանցումների համակարգն է»,- ընդգծեց նա` հավելելով, որ աճել է նաև արագ փոխանցման համակարգերով կատարված փոխանցումների ծավալը, որը կազմել է 62 մլրդ դրամ՝ 2013-ի ցուցանիշը գերազանցելով 33%-ով:

2014թ-ին 5.5%-ով աճել է նաև բանկի պլաստիկ քարտերի քանակը` կազմելով 128,939 հատ: Ի դեպ 2011թ-ի համեմատ այն գրեթե երկու անգամով ավելացել է:

Խոսելով 2014 թ-ի հաջողությունների մասին` բանկի գլխավոր տնօրենը կարևորեց նոր պրոդուկտների ներդրումը։ Մասնավորապես, նախորդ տարի Կոնվերս բանկը ներդրել է Converse Transfer արագ դրամական փոխանցումների սեփական համակարգը, ինչպես նաև` Հայաստանում առաջին մոբայլ բանկ ու մոբայլ վճարումների համակարգը:

«Թվային տեխնոլոգիաները գտնվում են Կոնվերս բանկի ուշադրության կենտրոնում: 2014-ին գործարկել ենք նաև eCommerce առցանց առևտրի համար նախատեսված համակարգը, Visa Virtual քարտը՝ գնումները համացանցում ավելի հեշտ կատարելու համար, Visa Isic համատեղ բրենդային քարտը: Բացի այդ, 2014-ին բանկն անցել է քարտերի 3-D secure սերտիֆիկացում»,- ասաց Տ.Դավթյանը: