Ձեր վստահելի աղբյուրը

Գերմանաբնակ թուրք ռեժիսոր Ֆաթիհ Աքինը նախօրեին Մոսկվայում ներկայացրել է Հայոց ցեղասպանության մասին պատմող իր «Սպի» ֆիլմը: Ռիա նովոստիին տված հարցազրույցում նա պատմել է, թե ինչու որոշեց նկարահանել այդ թեմայով ֆիլմ, որն իր հայրենիքում համարվում է արգելված, և ինչպիսի արձագանքներ է ստացել:

«Որոշեցի անդրադառնալ այդ թեմային, քանի որ ինձ համար անհարմար էր այն իրավիճակը, որը ստեղծվել էր Թուրքիայում Հայոց ցեղասպանության թեմայի շուրջ, որի մասին արգելված է խոսել: Որպես ռեժիսոր, ես կարծում եմ, որ սխալ է նման մոտեցումը և որոշեցի բարձրացնել այդ հարցը, որպեսզի քննարկում լինի»,- պատմել է նա:

Ռեժիսորի խոսքով, Թուրքիայում շատ երիտասարդներ չգիտեն, թե ինչպիսի սարսափելի իրադարձություն է տեղի ունեցել 100 տարի առաջ:

«Թուրքիան Ցեղասպանությունը չի ճանաչում, բայց այնտեղ արդեն հասունացել է քաղաքացիական շարժում, որը աճում և աճում է, և, հնարավոր է, իմ ֆիլմը խթանի, որ այդ շարժումն ավելի բազմամարդ դառնա»,- ընդգծել է նա:

Ֆիլմի շնորհանդեսը Ստամբուլում կայացել է դեկտեմբերին: Երևանում կայացել է ֆիլմի փակ դիտում, իսկ արդեն կինովարձույթ դուրս կգա այս ամսվա ընթացքում:

Ֆաթիհ Աքինի խոսքով, Թուրքիայում ֆիլմի շնորհանդեսը եղավ հրաշալի և միաժամանակ տխուր. «Հրաշալի, որովհետև ֆիլմի դիտումից հետո մարդիկ կիսվում էին տպավորություններով, քննարկում էին, իսկ տխուր, քանի որ մենք չկարողացանք պայմանավորվածություն ձեռք բերել կինոթատրոնների հետ լայն վարձույթի հարցի շուրջ: Մարդիկ վախենում էին սադրանքներից և բախումներից»: 

Փետրվարի 2-ին Մոսկվայի եկեղեցական համալիրում տեղի է ունեցել Ֆաթիհ Աքինի հանդիպումը Թեմակալ Առաջնորդ Եզրաս Սրբազանի հետ: Այս մասին տեղեկանում ենք Նոր-Նախիջևանի և Ռուսաստանի հայոց թեմի պաշտոնական կայքից:

Զրույցի հիմնական թեման եղել է Հայոց ցեղասպանությունը:

«Ես վստահ եմ, որ ձեր այս նախաձեռնությունը գալիս է ի սեր ձեր ժողովրդի, որովհետև ճշմարտությունը կոծկելու քաղաքականությունը փակել է շատերի հոգու դռները, և նրանք չեն տեսնում ապագան, որը կարող է լինել լուսավոր, եթե ընդունեն սեփական մեղքը, խոստովանեն կատարած չարագործությունը և հարևանների հետ ապրեն խաղաղ»,-ասել է Եզրաս Սրբազանը:

Հանդիպման վերջում Ֆաթիհ Աքինն ասել է. «Չնայած ես չեմ կարող խոսել ամբողջ թուրք ժողովրդի անունից, բայց ես անձամբ ներողություն եմ խնդրում այն մեծ ցավի համար, որը իմ նախնիները պատճառել են հայերին և կուզեի ձեզ դիմել ավետարանական խոսքով. «Հայր, ներիր նրանց, որովհետև չգիտեն` ինչ են անում»:

«Սպի» ֆիլմի գործողությունները տեղի են ունենում 1915 թ.` Հայոց ցեղասպանության ժամանակ և դրան հաջորող մի քանի տարիների ընթացքում: Գլխավոր հերոսը` Նազարեթ Մանուկյանը, կորցնում է ընտանիքը, իսկ տարիներ անց պարզում, որ իր երկվորյակ դուստրերը փրկվել են: Հայրը մեկնում է փնտրելու իր զավակներին: Ի վերջո նա գտնում է, սակայն աղջիկներից միայն մեկին: 15,5 մլն եվրո բյուջեով և 138 րոպե տևողությամբ «Սպի» դրամայի նկարահանումները սկսվել են 2013 թ. մարտին և իրականացվել են Հորդանանում, Գերմանիայում, Կուբայում և Մալթայում: Ժապավենի պրոդյուսերների թվում են հայազգի Ռուբեն Դիշդիշյանը և Արամ Մովսեսյանը: Ֆիլմի սցենարի հեղինակներն են Ֆաթիհ Աքինը և Մարտիկ Մարդինը:

Նախորդող հրապարակում՝
«Ով ասել է, թե Հայոց ցեղասպանությունը հայտնի իրողություն չէ, ղալաթ է արել». Ծագումով թուրք ռեժիսոր Ֆաթիհ Աքին