Ձեր վստահելի աղբյուրը

Թուրքիայում մի շարք հասարակական կազմակերպություններ դիմել են օտարերկրյա ղեկավարներին՝ կոչ անելով չմասնակցել Դարդանելի ճակատամարտի 100 ամյակի տոնակատարությանը, որն այս տարի առաջին անգամ անցկացվելու է Հայոց ցեղասպանության զոհերի հիշատակման օրը՝ ապրիլի 24-ին:

Թուրքայի «Մարդու իրավունքների միության» այլատյացության և խտրականության դեմ հանձնաժողովը, Իզմիրի ասորական եղբայրության, մշակութային և համերաշխության պլատֆորմը, «Նոր Զարթոնք» կազմակերպությունը, www.suryaniler.com մշակութային պլատֆորմը, «Zan» սոցիալ-քաղաքական տնտեսական հետազոտությունների հիմնադրամը համատեղ հայտարարություն են տարածել: Այս մասին տեղեկացնում է «Ագոս» շաբաթաթերթը:

Հայտարարության մեջ նշվում է, որ Թուրքիայի ղեկավարները, լայնամասշտաբ ջարդերի սկիզբ համարվող տարեթիվը հաղթանակի տոնակատարությունների վերածելով, անարգում են ցեղասպանության զոհերի հիշատակը և ստորացնում նրանց սերունդներին, հրաժարվում զոհերին պատշաճ հարգանք ցուցաբերել: Կազմակերպությունները կոչ են անել աշխարհի առաջնորդներին, որ հայտարարեն, թե իրենք չեն անարգի ցեղասպանության զոհերի հիշատակը:

«Մենք գիտենք, որ մի շարք պետություններ բացեիբաց չեն խոսում 1915-ի ցեղասպանության մասին: Բայց կրկին նրանցից մի քիչ խիղճ ենք պահանջում և ասում ՝ գնացե՛ք Երևան, որտեղ իսկապես ցավ կա»,-մամուլի հայտարարությունից հետո ասել է «Մարդու իրավունքների միության» փոխնախագահ Էրեն Քեսքինը: