Ձեր վստահելի աղբյուրը

Տեսակետների ազատ արտահայտմանն ի պաշտպանություն գործող 95 կազմակերությունների միավորող IFEX համաշխարհային ցանցը խորն անհանգստոթյուն է հայտնել այն հարցի վերաբերյալ, որ Ադրբեջանի «Լրագրողն երի ազատության և անվտանգության ինստիտուտի» (IRFS) ղեկավար էմին Հուսեյնովը ստիպված է թաքնվել Բաքվում Շվեյցարիայի դեսպանատանը: Այս մասին հաղորդում է ադրբեջանական «Թուրան» լրատվական գործակալությունը:

Հայտարարության մեջ շեշտվում է, որ Հուսեյնովը վաղուց արդեն զբաղվում է Ադրբեջանում տեսակետների ազատ արտահայտման և ԶԼՄ-ների ազատության պաշտպանությամբ: Վերջին տասնամյակի ընթացքում նա հանդես է եկել հարյուրավոր լրագրողների, բլոգերների և ազատ ակտիվիտսների պաշտպանությամբ: Սակայն վերջին վեց ամիսների ընթացքում Էմինն ի վիճակի չէ շարունակել այդ կարևոր աշխատանքը:

IFEX-ը հիշեցնում է, որ 2014 թվականի ապրիլին` Եվրոպայի Խորհրդում Ադրբեջանի նախագահության ժամանակաշրջանում, ոստիկանությունը խուզարկություն է անցկացրել «Լրագրողների ազատության և անվտանգության ինստիտուտի» գրասենյակում՝ առգրավելով համակարգիչներն ու փաստաթղթերը և փակելով գրասենյակը: Այդ ժամանակվանից ի վեր Էմին Հուսեյնովը թաքնվում է Բաքվում Շվեյցարիայի դեսպանատանը՝ կեղծ մեղադրանքների հիման վրա ձերբակալությունից խուսափելու համար: Նրա նկատմամբ առաջադրվել են մեղադրանքներ Ադրբեջանի Քրեական օրենսգրքի երեք հոդվածներով՝ 308 (իշխանության չարաշահում), 213 (հարկերից խուսափում) և 192 (ապօրինի գործունեություն):
«Մենք գտնում ենք, որ այդ մեղադրանքները քաղաքական դրդապատճառներ ունեն: Միջազգային այլ կազմակերպությունները, ներառյալ ԵԱՀԿ-ն, քննադատել են այդ դրանք»,- տեղեկատվական գործակալությունը մեջբերում է կազմակերպության հաղորդագրությունը:

Ինչպես նշում է «Թուրանը», հաղորդագրության մեջ նաև ասվում է, որ Էմին Հուսեյնովի և «Լրագրողների ազատության և անվտանգության ինստիտուտի» հետ կապված միջադեպը միակը չէ: 2014-ի դեկտեմբերին ձերբակալվել է հետաքննող լրագրող Խադիջա Իսմայիլովան: 2014-ի սեպտեմբերին IREX –ի Ադրբեջանի գրասենյակում խուզարկություն է կատարվել, իսկ համակարգիչները, փաստաթղթերը և էլեկտրոնային այլ կրիչներ բռնագրավվել են:

ԱՄՆ-ի Կալիֆորնիա նահանգի ներկայացուցիչ Դանա Ռոհրաբախերը իր հերթին ևս քննադատել է ամերիկացի դիվանագետներին Հուսեյնովին աջակցություն ցուցաբերելուց հրաժարվելու համար, գրում է «Ազատություն ռադիոկայանի» եվրոպական ծառայությունը: «Շատ ցավալի է որ շվեյցարացիներն ավելի խիզախ գտնվեցին, քան ամերիկացիները»,- գրում է Ռոհրաբախերը:

Այնուհանդերձ Պետքարտուղարության պաշտոնյան «Ազատություն ռադիոկայանի» հետ զրույցում նշել է, որ ամերիկացի պաշտոնատար անձինք ներգրավված են Ադրբեջանի հետ «լուռ դիվանագիտության» մեջ՝ կոչ անելով թույլատրել Հուսեյնովին լքել երկիրը և շարունակելու են փնտրել հնարավորություններ՝ այդ հարցը բարձրացնելու համար: Համաձայն նյութի՝ Հելսինկյան հանձնաժողովի ներկայացուցիչ Քրիս Սմիթը ևս կոչ է արել Իլհամ Ալիևին թույլ տալ իրավապաշտպանին հեռանալ երկրից:

«Լրագրողների իրավունքների պաշտպանության կոմիտեն» նույնպես հանդես է եկել հայտարարությամբ: «Ադրբեջանի համար խայտառակություն է, որ լրագրողները և իրավապաշտպանները ստիպված են եղել ապաստան գտնել օտար հողում»,- ընդգծում է CPJ-ի Եվրոպայի և Կենտրոնական Ասիայի ծրագրի համակարգող Նինա Օգնյանովան:

Պատահարին անդրադարձել է նաև Eurasianet.org հրատարակությունը` նշելով, թե Հուսեյնովի ներկայությունը դեսպանատանը Շվեյցարիային անհարմար դրության մեջ է դրել Ադրբեջանի առաջ: «Շվեյցարական Ахро ընկերությունը նպաստել է Տրանսադրիատիկ նավթամուղի կառուցմանը` Ադրբեջանից մինչև Արևմտյան Եվրոպա, իսկ Ադրբեջանի պետական նավթային ընկերությունը ներկայումս վերահսկում է Շվեյցարիայի «Էսսո» ընկերության գազակայանները»,- ասված է նյութում:

Նյութում նաև ասված է, որ դեռևս պարզ չէ` ինչու է Շվեյցարիայի կառավարությունը Հուսեյնովի գտնվելու վայրի բացահայտման որոշում կայացրել: Ենթադրվում է, որ այդ քայլն Ադրբեջանի վրա ճնշման ավելացման նպատակ ուներ:
«Մենք դեռևս մեկնաբանություններ չունենք Էմին Հուսեյնովի հարցի առնչությամբ: Եթե անհրաժեշտություն ծագի, հաղորդագրություն կտարածենք»,- «Կովկասյան հանգույցի» թղթակցին ասել է Ադրբեջանի գլխավոր դատախազության մամուլի ծառայության աշխատակիցը, իսկ երկրի նախագահի աշխատակազմը խուսափել է մեկնաբանություններից: «Ես տեղեկություն չունեմ: Սխալ կլիներ մեկնաբանել այն, ինչի մասին չունեմ տեղեկություն` որտեղ է նրա ապաստարանը, որտեղ է թաքնվում: Ամեն դեպքում, ըստ իմ տեղեկությունների` նա թաքնվում է հետաքննությունից, իսկ թե ուր, ինձ հայտնի չէ»,- ասել է Ադրբեջանի նախագահի աշխատակազմի բաժնի ղեկավարի տեղակալ Ալի Հասանովը:

Հիշեցնենք, որ ադրբեջանցի իրավապաշտպան Էմին Հուսեյնովը, փախչելով երկրի իշխանություննրի բռնաճնշումներից, 2014-ի օգոստոսի 18-ից հարկադրված է պատսպարվել Բաքվում` Շվեյցարիայի դեսպանատանը, այն բանից հետո, երբ նրան հրաժարվել են օգնել ԱՄՆ-ի դեսպանատանը:

Նախորդող`
Foreign Policy. Էմին Հուսեյնովը «բանտարկված է» Բաքվում Շվեյցարիայի դեսպանատանը