Ձեր վստահելի աղբյուրը

«ԱՄՆ-ը աջակցում է Լեռնային Ղարաբաղի հակամարտության շուրջ բանակցային կարգավորման գործընթացին»,- այսօր լրագրողներին տված իր առաջին ասուլիսի ժամանակ հայտարարեց ԱՄՆ նորանշանակ դեսպան Ռիչարդ Միլսը:

Ըստ դեսպանի՝ խնդրի լուծումը որևէ դեպքում չի կարող հիմնված լինել բռնության, պատերազմի վրա. «Մեզ համար խիստ անհանգստացնող է լարվածությունը և նաև հռետորաբանությունը, որ Լեռնային Ղարաբաղի հարցի շուրջ է ձևավորվում: ԱՄՆ-ը աջակցում է Մինսկի խմբի գործընթացը, որպես լուծման լավագույն ուղի»:

Միլսը, սակայն, հարկ համարեց նշել, որ Մինսկի խմբի գործընթացը միջնորդական առաքելություն է. «Դա գործընթաց է, որտեղ Մինսկի խումբը կողմերից որևէ մեկին չի կարող որևէ բան պարտադրել»:

Ռիչարդ Միլսը նշեց նաև, որ ԱՄՆ-ը և Մինսկի խմբի համանախագահները հանդես կգան բռնության կիրառման դատապարտումով, քանի որ սա, իր խոսքերով, հանդիսանում է «կողմերի ստանձնած պարտավորությունների խախտում»:

«ԱՄՆ հարաբերություններ ունի Ադրբեջանի հետ, հարաբերություններ ունի Հայաստանի հետ: Ես Ադրբեջանում ԱՄՆ դեսպանը չեմ, Ադրբեջանի հետ այդ մասով չեմ կարող մեկնաբանություն ներկայացնել, սակայն մենք մեր գործընկերների, երկու գործընկեր պետությունների, երկու բարեկամների հետ շատ հստակ ասում ենք, մատնանշում ենք, որ հակամարտության լուծման համար միայն խաղաղ տարբերակը կարող է լինել՝ Մինսկի խմբի գործընթացի շրջանակներում»,- ընդգծեց Ռիչարդ Միլսը:

Լրագրողների այն հարցին, թե ինչ հարաբերություններ կհաստատի դեսպանությունը Հայաստանի ոչ իշխանական քաղաքական ուժերի հետ, Միլսը նշեց, որ սովորաբար դեսպանություննրը կապեր են պահում քաղաքական դաշտում առկա բոլոր ուժերի հետ:

«Հայաստանի ժողովրդավարության ուժեղ կողմերից մեկն այն է, որ կա ընդդիմություն, և ընդդիմությունը կարող է ազատ խոսել, ազատ արտահայտվել, կարող է ազատ շփումներ ունենալ նաև դեսպանությունների հետ, և սա կարևոր է: Ինչ վերաբերում է ՀՀ նախագահի երեկվա ելույթին, ես այն չեմ մեկնաբանի: Ես ԱՄՆ Լուիզիանա նահանգից եմ ինքս, որտեղ քաղաքական դաշտում ընդունված է միմյանց վատ բառերով դիմելը»,- հայտարարեց Ռիչարդ Միլսը:

Դեսպանը, սակայն, հույս հայտնեց, որ ժողովրդավարության պարագայում եթե նախագահի կողմից հարկերի հետ կապված հետաքննություն է առաջ քաշվում, այն պետք է լինի մանրակրկիտ, թափանցիկ և երկրի օրենքներին համապատասխան:
«Կարծում եմ՝ նախագահ Սարգսյանը գիտի այս մասին, և եթե իրեն մտահոգող բաներ լինեն, մենք պատրաստ ենք առաջ քաշել դա կառավարության մոտ»,- ասաց ԱՄՆ արտակարգ և լիազոր դեսպանը:

Նախորդիվ`
Հույս ունեմ հայերենով ասուլիս տալ. ՀՀ-ում ԱՄՆ նորանշանակ դեսպան