Ձեր վստահելի աղբյուրը

 «Բարգավաճ Հայաստան» կուսակցությունը՝ Գագիկ Ծառուկյանի հայտնի վերջին ելույթով, փաստորեն, հայտարարեց «ամբողջական իշխանափոխություն» իրականացնելու մասին, ըստ որում՝ նշելով, որ դա արվելու է «քաղաքական բոլոր օրինական մեթոդներով»:

Ընթացիկ իրողությունների վերլուծությունը վկայում է, որ ԲՀԿ-ն իրականում գրեթե ոչինչ չի արել քաղաքական մրցակցության մեջ մտնելու և քաղաքական պատասխանատվություն ստանձնելու համար: Ուստի դժվար չէ գուշակել, որ հայտարարված «մոբիլիզացիան» առաջիկայում որևէ արդյունք չի տա:

Հայտնի է, որ «քաղաքական օրինական մեթոդները» ենթադրում են իշխանության նվաճում, բաժանում կամ փոփոխություն միայն մեկ եղանակով՝ ընտրություններով:

Թե ինչ արդյունքներ է գրանցել ԲՀԿ-ն համապետական ընտրություններում հայտնի է: Քչերն են սակայն կարևորություն տալիս այն փաստին, որ Հայաստանում շարունակ տեղի են ունենում ընտրություններ՝ տեղական մակարդակում, որոնց ԲՀԿ-ն պրակտիկորեն չի մասնակցում:

Այսպես օրինակ, գալիք ամիս՝ մարտի 15-ին, հանրապետության 25 համայնքներում ընտրություններ են տեղի ունենալու:

«Ամբողջական իշխանափոխություն» հռչակած ԲՀԿ-ն թեկնածուներ է առաջադրել միայն գյուղական 3 համայնքներում, ըստ որում՝ կուսակցական 3 թեկնածուներից 2-ն ինքնաառաջադրվել են, և միայն Սարակապ գյուղի համայնքապետի թեկնածու Արծրուն Խաչատրյանն է առաջադրվել ԲՀԿ-ի կողմից:

Պատկերը նույնն է նաև 2014-ին կայացած ընտրությունների դեպքում: Նախորդ տարի 124 համայնքի ղեկավարների ընտրություններում որպես թեկնածու գրանցվել է «Բարգավաճ Հայաստան» կուսակցության ընդամենը 10 անդամ, որոնցից միայն մեկն է առաջադրվել կուսակցության կողմից: ԲՀԿ-ական թեկնածուներից 7-ը հաղթանակ են տարել: Ըստ որում՝ թեկնածուներից 3-ը հաղթել են ոչ մրցակցային պայմաններում, այսինքն՝ եղել են միակ թեկնածուն:

Ընտրությունների արդյունքների վերլուծությունը ցույց է տալիս, որ ԲՀԿ-ն ՏԻՄ ընտրություններում հազվադեպ է մասնակցում, և ըստ էության, թեկնածուներ առաջադրում է միայն այն դեպքերում, երբ ակնհայտորեն առավելության հասնելու հնարավորություններ է տեսնում:

Այս համեստ ցուցանիշները վկայում են, որ ԲՀԿ-ն տեղերում իրականում լուրջ սոցիալական աջակցություն չունի, ուստի այդ պատճառով էլ խուսափում է քաղաքական մրցակցության մեջ մտնել: Համենայնդեպս ընտրությունների արդյունքները դա են վկայում: Հետաքրքիր է, որ նույն վարքագիծն են դրսևորում նաև ընդդիմադիր մնացած բոլոր ուժերը:

Հայտնի է, որ քաղաքական ուժը կարող է լուրջ հավակնություններ ունենալ միայն, երբ մասնակից է քաղաքական գործընթացներին բոլոր մակարդակներում՝ սկսած համայնքներից, ավարտված համաշխարհային օրակարգով:

Այն մոլորությունը, թե քաղաքական պայքար է միայն Ազատության հրապարակում հանրահավաք անելը, վաղուց արդեն պետք է անհրաժեշտ դասերը տված լիներ: Բայց չգիտես ինչու, մարդիկ գնում են նույն ճանապարհով, և գրանցում նույն արդյունքները:

Դժվար չէ կռահել, որ ԲՀԿ-ն կարճ ժամանակ անց քաղաքական իմաստով կհայտնվի ճիշտ այն տեղանքում, որտեղ հանգրվանել են ԱԺՄ-ն, ՀԺԿ-ն, ՀԱԿ-ը և մյուսները:

Քաղաքագետ Արմեն Մինասյան