Ձեր վստահելի աղբյուրը

Հայ և օտարազգի ավելի քան 60 արվեստագետի 150 աշխատանք մեկտեղվել են մեկ հարկի տակ՝ Հայաստանի Նկարիչների միության ցուցասրահում: Իրենց աշխատանքներով հայ և օտարազգի նկարիչները հարգանքի տուրք են մատուցում Հայոց ցեղասպանության զոհերի հիշատակին:

Ցուցահանդեսի կազմակերպիչներն են Հայաստանի մշակույթի նախարարությունը, «Փյունիկ« հիմնադրամը, «Լոռվա ձոր» հայրենակցական միությունը: Ցուցահանդեսում ներկայացված է «Հայկական ներկապնակ» գեղանկարչական փառատոների ու ցուցադրությունների ծրագրի շրջանակում վերջին հինգ տարվա ընթացքում ստեղծված աշխատանքները: Թեմատիկ առումով ցուցադրությունը բազմաժանր է, հեղինակներն էլ (հայ, ռուս, բելառուս, ուկրաինացի, լիտվացի, լատվիացի, լեհ, ղազախ)՝՝ 17-18 տարեկանից մինչև 93 տարեկան Արմեն Աթայան:

«Այս ցուցահանդեսը միջազգային հինգ փառատոնի արդյունքների ամփոփումն է: Այն նվիրված է Հայոց ցեղասպանության 100-րդ տարելիցին»,- լրագրողների հետ զրույցում ասաց «Փյունիկ» հիմնադրամի նախագահ, պատմական գիտությունների դոկտոր, պրոֆեսոր Լևոն Սարգսյանը:

«Լոռվա ձոր» հայրենակցական միության նախագահ, «Հայկական ներկապնակ» փառատոնի նախագահ Սերգո Երիցյանն իր խոսքում նշեց, սա ոգեկոչման ցուցադրություն է, աղերսներ ունի վերածնված Հայաստանի, հայ ժողովրդի խոհերի, հավաքական կերպարի հետ:

«Այդ ամենը ներկայացված է մեր նկարիչների աշխատանքներում: Այստեղ ներկայացված է հայաստանյան ամբողջ ներկապնակն իր բոլոր հնարավոր դրսևորումներով»,- ասաց նա:

Նկարիչ Արա Հակոբյանն իր խոսքում նշեց, որ կազմակերպիչների հինգ տարվա աշխատանքը բեղուն է եղել, ինչի վառ վկայությունն այսօրվա ցուցահանդեսն է:

Անուշավան եպիսկոպոս Ժամկոչյանը նախ Ամենայն Հայոց Կաթողիկոսի շնորհավորանքը փոխանցեց, Մայր աթոռի օրհնությունը, ապա ցանկություն հայտնեց, որ ազգանվեր այս գործունեությունը շարունակվի նաև հետագայում:

«Նման ազգային, ազգանվեր միջոցառումներ պետք է շատ կազմակերպվեն, որպեսզի երիտասարդները, ժողովուրդը կարողանան շփվել մշակույթի հետ, կարողանան գեղեցիկ ճաշակ զարգացնել, ինչը որ մշտապես եղել է մեր կյանքում»,- ասաց նա:

150 գեղանկար աշխատանքից բացի ներկայացված է նաև քանդակագործ Արա Սարգսյանի «Ցեղասպանություն» քանդակը, որն առաջին անգամ է ներկայացվում հանրությանը: