Ձեր վստահելի աղբյուրը

Էրեբունի» բժշկական կենտրոնում շվեյցարացի բժիշկները իրենց հայ գործընկերների հետ միասին սրտի բացառիկ վիրահատություն են կատարել: Վիրահատությունների բացառիկությունը կայանում էր ոչ միայն դրանց բարդության, այլև պաթոլոգիաների յուրահատկության մեջ:

Ինչպես բժիշկներն են ասում` դրանք այն վիրահատություններն են, որոնք բժիշկները կատարում են կյանքում ընդամենը մեկ կամ մի քանի անգամ: Դրանք այն ախտորոշումներ են, որոնք անակնկալի են բերում ոչ միայն հիվանդներին, այլև բժիշկներին` ստիպելով վերհիշել տեսական գիտելիքները: Այս դեպքում հայ մասնագետներին անհրաժեշտության դեպքում օգնության են հասել աշխարհի լավագույն կլինիկաների սրտաբանները:

Լրագրողների հետ զրույցում «Էրեբունի» բժշկական կենտրոնի անհետաձգելի սրտաբանության բաժանմունքի վարիչ Համլետ Հայրապետյանը նշեց, որ շվեյցարացի մասնագետների ժամանմանն ընդառաջ ընտրվել էին բացառիկ պաթոլոգիաների դեպքերը, որոնք արտասովոր էին նաև շվեյցարացի բժիշկների համար:

«Մենք պլանավորել էինք մեր արտասահմանցի մասնագետների հետ կատարել ոչ սովորական վիրահատություններ: Եվ արդեն 2 օր է` մեր վիրաբույժների հետ կատարվում են դրանք: Քիչ առաջ ավարտեցինք երկրորդ վիրահատությունը, որն անցել է շատ հաջող: Այս վիրահատությունն ու ախտորոշումը զարմացրել է նաև շվեյցարացի պրոֆեսորին»,- ասաց Հ.Հայրապետյանը:

Նրա խոսքերով` կատարել են երկու վիրահատություն. առաջին դեպքում հիվանդի մոտ ախտորոշվել էր նախասրտի անևրիզմ և 7 սանտիմետրանոց թրոմբ: Երկրորդ դեպքով վիրահատել են 35-ամյա տղամարդու, ով տառապել է Պառլոյի հիվանդությամբ պայմանավորված միթրալ փականի արատով: Այս հիվանդությունը հազվադեպ է հանդիպում:

Ցյուրիխի սրտաբանական կլինիկայի պրոֆեսոր Փոլ Վոգտը խոստովանեց, որ իր պրակտիկայում նմանատիպ դեպքեր դեռ չէին գրանցվել: Շվեյցարացի պրոֆեսորը նշեց, որ իր ղեկավարած բաժանմունքում տեսել է սրտի ամենածանր ախտորոշումներն ու վիրահատել հազարավոր սրտեր, սակայն չէր տեսել, որ 35 տարեկան տղամարդու նախասրտում 7 սմ-անոց թրոմբ լիներ:

Բժշկական կենտրոնի սիրտ-անոթային բաժանմունքի վարիչ Վահե Գասպարյանն առաջինն էր, որը Հայաստանում կատարեց սրտի այնպիսի վիրահատություններ, որոնք իրենց արդյունքով համարժեք են սրտի փոխպատվաստմանը:

«Երբ հիվանդը շնորհակալ աչքերով նայում է քեզ, բոլոր չարչարանքը փոխհատուցվում է, մինչև 10 ժամ տևած վիրահատությունից հետո»,- ասաց Վահե Գասպարյանը:

Շվեյցարացի պորֆեսոր Փոլ Վոգտը նշեց, որ իր թիմի հետ երկրորդ անգամ է Հայաստանում: Առաջին անգամ «Էրեբունի» ԲԿ-ում ծանոթացել են մասնագետների հետ, եվրոպացու զգուշավորությամբ հետևել են վիրահատություններին ու գնացել: Հիմա լուրջ համագործակցության առաջարկներ են անում «էրեբունի» հիվանդանոցի սրտաբաններին, քանի որ տեսել են նրանց բժշկական հնարավորությունները:

«Մենք լրջորեն աշխատելու ենք այս կենտրոնի հետ, այստեղ կարող են տարեկան 150 բաց վիրահատություն կատարել: Սակայն ցանկանում եմ ասել, որ խնդիր ունեցող հայաստանցիները կարող են շատ հանգիստ դիմել հիվանդանոց` առանց սպասելու արտասահմանցի բժիշկների այցերին. այստեղ կան բոլոր հնարավորությունները»,- ասաց Փոլ Վոգտը:

Ի դեպ, Համլետ Հայրապետյանը նշեց, որ կենտրոնում տարեկան մոտ 150 բաց վիրահատություն է լինում: Իսկ ստենտավորումների թիվը տարեկան անցնում է հազարից: