Ձեր վստահելի աղբյուրը

Ադրբեջանի Կենտրոնական բանկը կտրուկ արժեզրկել է մանաթը դոլարի և եվրոյի նկատմամբ: Ադրբեջանը տուժել է նավթի գնի կտրուկ նվազումից: Արժեզրկումը մտահոգություն է առաջացնում, քանի որ ներմուծումն ավելի է թանկանում: Այս մասին հաղորդում է «Ազատություն ռադիոկայանը»՝ լուսաբանելով մեկ օրում մանաթի` 34 տոկոսով դոլարի նկատմամբ արժեզրկման թեման:

Economy Journal Online հրատարակությունն իր հերթին ևս հաղորդում է, որ Կենտրոնական բանկի որոշումը անսպասելի էր, իսկ Dawn թերթն Ադրբեջանում ստեղծված ներկայիս իրավիճակում զուգահեռներ է տեսնում վերջերս Ռուսաստանում ռուբլիի անկման հետ:

Թեմային անդրադարձել է նաև թուրքական Sabah թերթը՝ ներկայացնելով Ադրբեջանի Կենտրոնական բանկի ղեկավարի հայտարարությունից որոշ հատվածներ:

«Ադրբեջանի ազգային արժույթը՝ մանաթը, գործնականորեն փլուզվել է, մանաթի հետ մեկտեղ փլուզվել է նաև անխորտակելի ազգային արժույթի մասին միֆը: Վերջինիս փոխարժեքը երեք անգամ նվազել է ամերիկյան դոլարի նկատմամբ»,- հաղորդում է ուկրաինական «Ուկրոպ» լրատվական գործակալությունը՝ նշելով, որ երկրում հնարավոր է աշխատավարձի և քաղաքացիների թոշակների ինդեքսավորման անհրաժեշտության հարց առաջանա:

«Վզգլյադ» ռուսական թերթը փոխանցում է, որ Ադրբեջանի ազգային արժույթի՝ մանաթի, արժեզրկումը քաղաքացիների մոտ տագնապ է առաջացրել. սկսվել է առևտրային տագնապ, քաղաքացիները շտապում են խանութներ ապրանքներ գնելու նպատակով: Խանութներն էլ իրենց հերթին կամ փակվում են, կամ զգալիորեն բարձրացնում են գները:

Ադրբեջանական ԶԼՄ-ները ևս հաղորդում են խուճապի խորացման և փորձագետների անհուսադրող կանխատեսումների մասին:

Այսպես, ադրբեջանական «Հաաքին.ազ» լրատվական պորտալը նշում է, որ Բաքվի մի շարք սուպերմարկետներում և մանրածախ առևտրային կետերում դադարեցրել են ապրանքների վաճառքը՝ մանաթի կտրուկ նվազման արդյունքում առաջացած լուրջ իրարանցումների պատճառով:

«Բաքվի բնակիչները լցրել են խմբագրությունը բողոքներով այն մասին, որ խանութներն ապրանքներ չեն վաճառում և սպասում են, մինչև որ կավարտվեն ապրանքների գների պիտակների փոխարինման աշխատանքները»,- գրում է պորտալը՝ հավելելով, որ Բաքվում կենցաղային տեխնիկայի խանութները մանաթի արժեզրկումից հետո զգալիորեն բարձրացրել են գները: Բացի այդ, Բաքվում կտրուկ աճել է նաև ծխախոտի գինը:

Մանաթի արժեզրկման մասին Կենտրոնական բանկի որոշումը հանգեցրել է Ադրբեջանում ավիատոմսերի գների անսպասելի բարձրացմանը: Ինչպես հաղորդում է ««Հաաքին.ազը», տուրիստական գործակալություններում ավիատոմսերի գները բարձրացել են միջինը 25-30 տոկոսով: «Ադրբեջանական ավիատոմսեր» ՓԲԸ-ում դեռևս ոչ մի կերպ չեն մեկնաբանում ավիատոմսերրի գների բարձրացումը: Ադրբեջանի Զբոսաշրջության ասոցիացայի (AzTA) նախագահ Նահիդ Բաղիրովը հայտարարել է, որ Ադրբեջանի Կենտրոնական բանկի՝ մանաթի արժեզրկման մասին որոշումը, սաստիկ կհարվածի տուրիստական գործակալություններին և նույնիսկ կհանգեցնի դրանցից մի քանիսի սնանկացմանը:

Ըստ պորտալի՝ նույնիսկ արտասահմանից մարդիկ են գալիս Ադրբեջան, որպեսզի իրենց մանաթով ավանդները փոխարինեն արտարժույթով, սակայն բախվում են «տեղական ժողովրդավարական խոչընդոտների» հետ, և այդպես էլ դատարկաձեռն հետ են վերադառնում. թե երբ նրանք կարող են իրենց խնայողություններն օգտագործել սեփական հայեցողությամբ՝ հայտնի չէ:

Ինչպես իր հերթին հայտնում է ադրբեջանական «Մինվալ.ազ» լրատվական պորտալը, Ադրբեջանի ազգային արժույթի անկման պատճառով դոլարով երկիր ներմուծվող և մանաթով վաճառվող բջջային հեռախոսները կտրուկ թանկացել են. հեռախոսների վաճառքով զբաղվող շատ խանութների կայքեր չեն աշխատում, իսկ կայքերի գլխավոր էջերում հայտնվում է գրառում այն մասին, թե իբր կայքը փակվել է տեխնիկական բնույթի աշխատանքներ կատարելու նպատակով:

«Մինվալ.ազ»-ը գրում է նաև, որ ադրբեջանական «Սադարաք» առևտրային կենտրոնում աշխատող ձեռնարկատերերից շատերը դոլարի կուրսի բարձրացման պատճառով հարկադրված են եղել դադարեցնել առևտուրը, քանի որ դոլարի կուրսի բարձրացման հետ մեկտեղ բարձրացել են նաև ապրանքների գները:

Ինչպես հաղորդում է «Մինվալ.ազ»-ը, Ադրբեջանի Ազատ սպառողների միության նախագահ Էյուբ Հուսեյնովի խոսքերով՝ մանաթի անկումը մնացած բոլոր հիմնական արժույթների նկատմամբ ցուցադրում է Ադրբեջանի Կենտրոնական բանկի նախկին ղեկավարի հայտարարությունների կեղծ լինելը: Փորձագետը գտնում է, որ ստեղծված իրավիճակը կհարվածի երկրի փոքր և միջին բիզնեսին, քանի որ երկրում մեծ տոկոս են կազմում ներմուծվող ապրանքները, որոնք գնվում են դոլարով: Հուսեյնովն ավիատոմսերի գների բարձրացումն անվանել է սպառողների իրավունքների և շահերի, ինչպես նաև Ադրբեջանի օրենսդրության կոպիտ խախտում:

«Աջակցություն տնտեսական նախաձեռնություններին» ՀԿ-ի ղեկավար Ազեր Մեհթիևը հայտարարել է, որ Ադրբեջանի Կենտրոնական բանկն իր վերջին որոշմամբ խարխլեց երկրի բնակչության վստահությունը իր նկատմամբ: Նրա կարծիքով՝ Կենտրոնական բանկը և Ադրբեջանի կառավարությունը որոշել են պետբյուջեն լրացնել գնաճից ստացված եկամուտի միջոցով, գրում է «Մինվալ.ազ»-ը:

«Ես սպասում են Ադրբեջանում գների լուրջ թանկացման: Ներմուծվող ապրանքները նվազագույնը թանկանում են 40 տոկոսով: Դրանից հետո հոգեբանական աճը կանդրադառնա նաև տեղական արտադրանքի վրա»: Այս մասին ադրբեջանական «Սալամնյուզ» լրատվական գործակալությանը հայտնել է ադրբեջանցի տնտեսագետ Նազիմ Մամեդովը՝ մեկնաբանելով դոլարի գնի բարձրացումը մանաթի նկատմամբ:

Ադրբեջանի ընդդիմությունը նույնպես սուր քննադատությունների է ենթարկել Ադրբեջանի Կենտրոնական բանկի՝ մանաթի արժեզրկման մասին որոշումը: Ինչպես հաղորդում է ադրբեջանական «Թուրան» լրատվական գործակալությունը, Ադրբեջանի ազգային ճակատ կուսակցության ղեկավար Ալի Քերիմլին Ադրբեջանի ԿԲ-ի որոշումն անվանել է «ազգի կողոպտում պետական մակարդակով»:

«Մուսավաթ» կուսակցությունն իր հերթին ևս Ադրբեջանի ԿԲ-ի որոշումը գնահատել է` որպես «հակասում ազգի շահերին»: Ադրբեջանի Ժողովրդավարական ուժերի Ազգային խորհուրդը (ԺՈՒԱԽ) ևս սուր քննադատությունների է ենթարկել Ադրբեջանի Կենտրոնական բանկի՝ մանաթի կտրուկ արժեզրկման մասին որոշումը: ԺՈՒԱԽ-ը գտնում է նաև, որ այդ որոշմամբ 34 տոկոսով արժեզրկվել են քաղաքացիների աշխատավարձերը, թոշակները և օգնությունները, իսկ վերջին տարիներին նավթի վաճառքից ստացված 115 մլրդ. դոլարնեը գողացվել են և դարձել Ադրբեջանի իշխանությունների վերին խավի մի խումբ մարդկանց` օֆշորային գոտոց ստացված սեփականությունը:

Նախորդիվ`
Ադրբեջանում մանաթը արժեզրկվել է մեկ օրում 34 տոկոսով. տարադրամի փոխանակման կետերն ու բանկերը հրաժարվում են աշխատել
Ադրբեջանական «կայուն մանաթի» միֆը փլուզվեց
Հաշվարկ. Ադրբեջանի պոտենցիալ կորուստները նավթի գների անկումից