Շիրակում տեղի ունեցած ավտովթարի գործով տարվում է միակողմանի նախաքննություն` արջի ծառայություն մատուցելով պատգամավորին. փաստաբան
Շիրակի մարզում տեղի ունեցած ողբերգական ելքով ավտովթարի գործով մեղադրյալ «Կամազ» մակնիշի բեռնատարի վարորդ Մանվել Վարդանյանի փաստաբան Լիանա Բալյանը այսօր բացարկ է հայտնել քննիչին, ով դեպքից միայն չորս ամիս անց է նշանակել ավտոտեխնիկական փորձաքննություն, քրեական գործ չի հարուցում «Գազ-32213» մակնիշի 0811Լ հաշվառման համարանիշի ուղևորատար ավտոմեքենայի վարորդի նկատմամբ: Բացի այս, քննիչը պատրաստվում է փետրվարի 27-ին միջնորդություն ներկայացնել մեղադրյալին կրկին կալանքի տակ պահելու ժամկետը երկարացնելու մասին: Panorama.am-ի հետ զրույցում քննիչի գործողություններից դժգոհեց Մ. Վարդանյանի փաստաբան Լիանա Բալյանը:
Նա հիշեցրեց, որ դեռևս 2014 թ. նոյեմբերի 14-ին էր բացարկ էի հայտնել Շիրակի մարզային քննչական վարչության քննիչին, սակայն նոյեմբերի 28-ին Շիրակի մարզի դատախազությունը մերժել էր քննիչին բացարկ հայտնելու մասին միջնորդությունը` պատճառաբանելով, որ քրեական գործով նշանակվել են բազմաթիվ փորձաքննություններ, որոնց եզրակացությունը ստանալուց հետո անդրադարձ կկատարվի Մանվել Վարդանյանին առաջադրված մեղադրանքին:
«Տեսնելով քննիչի անգործությունը` ստիպված 2014 թվականի դեկտեմբերի 29-ին միջնորդություն էի ներկայացրել ավտոտեխնիկական փորձաքննություն նշանակելու մասին: Քննիչին միջնորդել էի պարզելու պատահարի ժամանակ բախման կետը, ցույց տան բախման կետում բեկորները ինչպես նաև արգելակման դիրքերը, վերջնական դիրքերը և արգելակման հետքերը, «STOP» նշանի մոտից երևացող տեսադաշտը, ճանապարհի մթությունը, տեսանելիությունը և այլն:
Քննիչը հունվարի 19-ի որոշմամբ հետաձգել էր իմ միջնորդության քննարկումը: Փետրվարի 11-ին քննիչը նշանակել է ավտոտեխնիկական փորձաքննություն և նոր այսօր` փետրվարի 23-ին գործն ուղարկում է փորձագետներին»,- նշեց փաստաբանը` միաժամանակ հավելելով, որ քննիչը խուսափում է փորձաքննությամբ պարզել ավտոմեքենաների բախման կետը և ի պատասխան Լ. Բալյանի հարցին, ասել է, որ դեպքի օրը ինքը չափագրել է և փորձաքննության կարիք չկա:
Ըստ նրա, ստացվում է այնպես, որ քննիչը, բացի իրավաբան լինելուց, նաև շատ լավ փորձագետ է և իր չափագրումները պետք է հանդիսանան գործով ապացույց և փորձաքննության կարիք չկա:
«Արդեն չորրորդ ամիսն է, քննիչը քրեական գործ չի հարուցել «Գազ-32213» մակնիշի 0811Լ հաշվառման համարանիշի ուղևորատար ավտոմեքենայի վարորդ Ռազմիկ Մկրտչյանի նկատմամբ` պատճառաբանելով, որ նա արդեն մահացած է: Ես չեմ կարողանում հասկանալ, եթե մահացել է, ուրեմն ամբողջ մեղքը միակողմանի պետք է բարդվի «Կամազ-53202» մակնիշի 533SU61 հաշվառման համարանիշի բեռնատար ավտոմեքենայի վարորդ Մանվել Վարդանյանի վրա՞: Գազելը, որը տեղափոխում էր ուղևորներ, միշտ պետք է պատրաստ լիներ և արգելակեր մեքենան, մի գուցե կամազի փոխարեն ճանապարհին հեծանիվով երեխա էր անցնում, կամ անասուններ էին անցնում, կամ ժայռաբեկոր էր ընկած, կամ էլ «Կամազը» խափանվել և կանգնել էր ճանապարհին: Մի՞թե վարորդը պարտավոր չէր կանխատեսելով վտանգները միշտ ունենար արգելակելու հնարավորություն: Այսինքն «Գազելի» վարորդ Ռազմիկ Մկրտչյանը տեսել է ճանապարհի բանուկ հատվածում «Կամազը», հայտնաբերել է վտանգը, սակայն ոչինչ չի ձեռնարկել, նույնիսկ ավտոմեքենայի արագությունը չի իջեցրել թույլատրելի սահմաններում: «Գազելի» պարագայում առավել մեծ է ճանապարհային երթևեկության մասնակիցների, ուղևորների կյանքին կամ առողջությանը վնաս պատճառելու հավանականությունը ,և վարորդի համար առավել ակնհայտ է իր կողմից թույլ տրված ճանապարհատրանսպորտային կանոների խախտման և հանրորեն վտանգավոր հետևանքների առաջացման միջև պատճառական կապի զարգացման հնարավորությունը»,- ասաց Լ. Բալյանը:
Ըստ նրա, տարվում է բացահայտ միակողմանի և գավառական նախաքննություն, որովհետև Արթիկի քննչականը չի ցանկանում վատամարդ լինել նույն մարզի «Բարգավաճ Հայաստան» կուսակցության Շիրակի մարզային կառույցի ղեկավար, ԱԺ պատգամավոր Մարտուն Գրիգորյանի նկատմամբ, ով «Տրանս-Ակնթարթ» ՍՊԸ-ի ոչ պաշտոնական ղեկավարն է:
«Գազ-32213» մակնիշի 0811Լ հաշվառման համարանիշի ուղևորատար ավտոմեքենան իրեն է պատկանում և քրեական գործ չեն հարուցում, որպեսզի հետագայում տուժողները քաղ. հայց չկարողանան ներկայացնել «Գազելի» գծի տիրոջ դեմ, դրանով արջի ծառայություն մատուցելով պատգամավորին:
«Փաստորեն համ անունն են մաքրում, համ էլ ազատում են գումարային պարտականություններից` ամբողջ մեղքը բարդելով խեղճ ու կրակ կամազի վարորդի վրա: Եթե, փաստորեն, «Գազելի» գծի տերը Գյումրու պատգամավոր է, նշանակում է մեղավոր չեն և չպետք է պատասխանատվության ենթարկվեն»,- նշեց պաշտպանը:
Լ. Բալյանի խոսքով, սույն գործով նախաքննությունը ջանք չի խնայում մեղադրելու միայն Մանվել Վարդանյանին` մոռանալով, որ օրենքով իր առաքելությունը կայանում է պահպանել Հայաստանի Հանրապետության Սահմանադրությունը, սույն օրենսգիրքը և մյուս օրենքները, կատարել անաչառ, բազմակողմանի և արդար քննություն:
2014թ. նոյեմբերի 10-ին Շիրակի մարզում տեղի ունեցած ողբերգական ելքով ավտովթարի դեպքի առթիվ ՀՀ Քննչական կոմիտեի Շիրակի մարզային քննչական վարչությունում հարուցված քրեական գործի շրջանակներում «Կամազ» մակնիշի բեռնատարի վարորդ Մ.Վարդանյանին մեղադրանք է առաջադրվել՝ ՀՀ քրեական օրենսգրքի 242-րդ հոդվածի 3-րդ մասով (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ՝)։ Նախաքննությամբ ձեռք բերված ապացույցների համաձայն՝ «Իմէքս-Գրուպ» ՍՊ ընկերության վարորդ Մ.Վարդանյանն իրեն ամրակցված «Կամազ-53202» մակնիշի, 533 ՏՍ 61 հաշվառման համարանիշի բեռնատար ավտոմեքենայով 2014 թվականի նոյեմբերի 10-ին՝ ժամը 19:15-ի սահմաններում, խախտելով ՀՀ ՃԵԿ-ի 96 կետի, ձև № 1-ի 2.5 ճանապարհային նշանի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ կետի պահանջները, այն է` պարտավոր լինելով երկրորդական ճանապարհով անհավասարազոր ճանապարհների խաչմերուկին մոտենալով ճանապարհը զիջել գլխավոր ճանապարհով ընթացող տրանսպորտային միջոցներին, ինչպես նաև՝ կանգնել հատվող երթևեկելի մասի եզրից առաջ, ստեղծել է վթարային իրավիճակ, մուտք գործել խաչմերուկ և բախվել Ռազմիկ Մկրտչյանի վարած, Երևանից-Գյումրի թիվ 359 երթուղու «Գազ-32213» մակնիշի, 0811 Լ հաշվառման համարանիշի ուղևորատար ավտոմեքենային: Արդյունքում՝ առաջացած վթարի հետևանքով «Գազ-32213» մակնիշի ուղևորատար ավտոմեքենան հրդեհվել է, զոհվել է յոթ մարդ, յոթ մարդ էլ տարբեր աստիճանի այրվածքներով և մարմնական վնասվածքներով տեղափոխվել են հիվանդանոց: Մ.Վարդանյանի նկատմամբ որպես խափանման միջոց է կիրառվել կալանավորումը։
Նախորդող հրապարակումներ`
Շիրակում տեղի ունեցած ավտովթարի գործով մեղադրյալին տեղափոխելու են «Նուբարաշեն» հոգեբուժական հիվանդանոց
Շիրակում տեղի ունեցած ավտովթարի գործով մեղադրյալին հնարավոր է տեղափոխեն «Դատապարտյալների հիվանդանոց»
Շիրակում տեղի ունեցած ավտովթարի գործով մեղադրյալի կալանքի որոշումը չի բողոքարկվելու
Շիրակում տեղի ունեցած ողբերգական ավտովթարի գործով մեղադրյալ վարորդը հոգեբանական, բժշկական օգնության կարիք ունի
Շիրակում ավտովթարի հետևանքով տուծաժ 14-ամյա ուղևորի վիրահատությունը բարահաջող է անցել
«Ծանրորդ Վանիկ Սարգսյանը բազմաթիվ երազանքներ և ծրագրեր ուներ իրականացնելու». մարզիկն ավտովթարի զոհերից մեկն է
Շիրակի մարզպետը՝ ողբերգական ավտովթարի մասին
Պարզվել է Շիրակի մարզում նախօրեին տեղի ունեցած ՃՏՊ-ի զոհերի ինքնությունը. քննչական կոմիտե
Շիրակի մարզում ավտովթարից զոհվածների ընտանիքներն ու տուժածները կստանան դրամական օգնություն
Նախագահը ցավակցություն է հայտնել Գյումրի-Երևան ավտոճանապարհին տեղի ունեցած ողբերգական ավտովթարի կապակցությամբ
35 աստիճանի այրվածք, բազուկների կոտրվածք, վնասվածքներ. Ի՞նչ վիճակում են Գյումրիի ՃՏՊ-ի վիրավորները
Շիրակում տեղի ունեցած վթարի գործով ձերբակալված կա
ՃՏՊ Շիրակի մարզում` հրդեհի բռնկմամբ. կա 7 զոհ
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
