Ձեր վստահելի աղբյուրը

«Ես կարծում եմ, որ ԱՄՆ փոխպետքարտուղարը, դեպքի մանրամասներին ըստ արժանավույն տեղյակ չլինելով, Բաքվում արել է մի հայտարարություն, որից ( ելնելով դիվանագիտական էթիկայից) արդեն Երևանում չի կարողացել հրաժարվել: Չնայած նրան, որ ՀՀ-ում նրան, ըստ երևույթին, ներկայացրել են ստեղծված իրավիճակի իրական պատկերը»,- անդրադառնալով ԱՄՆ պետքարտուղարի օգնական Վիկտորիա Նուլանդի` ադրբեջանցի դիվերսանտներ Դիլհամ Ասկերովին և Շահբազ Գուիևին Բաքվին վերադարձնելու վերաբերյալ հայտարարությանը, ինչպես նաև նախօրեին պետքարտուղարության ներկայացուցիչ Ջեն Փսակիի`խնդրի առմչությամբ մեկնաբանությանը, panorama.am-ի հետ զրույցում այս մասին նշեց քաղաքագետ Սերգեյ Մինասյանը:

Նշենք, որ պետքարտուղարության ներկայացուցիչ Ջեն Փսակին փետրվարի 23-ին լրագրողների հետ ունեցած ճեպազրույցի ժամանակ պատասխանել է ադրբեջանցի դիվերսանտներին Բաքվին հանձնելու վերաբերյալ Վիկտորիա Նուլանդի հայտարարության մասին հարցին և մասնավորապես, նշել է.«Դեսպան Ուորլիքի և այլոց միջոցով մենք նախկինում ևս կողմ ենք արտահայտվել երկու բանտարկյալներին Ադրբեջանի կառավարությանը հանձնելուն։ Նա (Վիկտորիայի Նուլանդ – խմբ.) ևս կոչ է արել համապատասխան իշխանություններին վերադարձնել բանտարկյալներին։ Անցյալում կողմերն հինականում ունեցել են բանտարկյալներին որպես մարդասիրական ժեստ վերադարձնելու պրակտիկա, և ինչպես ցույց է տվել փորձը, նման քայլերը թուլացնում են լարվածությունն ու կողմերի միջև վստահություն ստեղծում։ Սա այն է, ինչի մասին խոսել է Վիկտորիա Նուլանդը»։

Մեր զրուցակցի կարծիքով, պետդեպի նմանատիպ «անտեղյակության» դեպքերը պարբերաբար տեղ են գտնում ԱՄՆ քաղաքական կյանքում, և վերոնշյալ զարգացումները դրա վառ ապացույցն են:

«Հստակ է որ ամերիկյան կողմը փորձել է գործընթացը քողարկել մարդասիրական շղարշով: Կարծում եմ, որ, իր դերն է ունեցել նաև այն հանգամանքը, որ Վիկտորիա Նուլանդի տարածշրջան այցելության առաջին հանգրվան եղել է Բաքուն»,- ասաց Սերգեյ Մինասյանը:

Անդրադառնալով պետքարտուղարության ներկայացուցչի կողմից օգտագործված «համապատասխան իշխանություններ» եզրույթին, քաղաքագետը նշեց, որ ձևակերպման ավելի հստակ լինելու դեպքում հնարավոր կլիներ պատկերացնել թե ո՞ւմ է ուղված այդ կոչը` Հայաստանի՞ թե՞ ԼՂՀ իշխանություններին, ինչից հետո արձագանքները շատ ավել հստակ կլինեն:

Հարցին, թե Միացյալ Նահանգները, ըստ երևույթին, «մոռանում» են, որ ԼՂՀ-ն փաստացի անկախ երկիր է և մի՞գուցե հնարավոր կլիներ խոսել ադրբեջանցի դիվերսանտների վերադարձի մասին, եթե, օրինակ, ԼՂՀ-ի և Ադրբեջանի միջև լիներ արտահանձնման վերաբերյալ պայմանագիր, Ս. Մինասյանը նշեց. «Քաղաքական հայտարարությունները երբեմն արվում են արվելու համար: Սակայն, չեմ կարծում եմ, որ նման պայմանագրի առկայության պարագայում անգամ պաշտոնական Ստեփանակերտը պատրաստ կլիներ քննարկել այն անձանց հանձման հնարավորությունը, որոնք շարքային հանցագործներ են, և որևէ պարագայում պատանդ կամ ռազմագերի համարվել չեն կարող»:

Ինչ վերաբերում է Ջեն Փսակի մեկնաբանությանը, ապա քաղաքագետը վստահ է, որ հարցը պատրաստվել և տրվել էր այն կերպ, որից հետո պետք է հնչեր հենց այս հայտարարությունը: