Մանաթի անկումը կհանգեցնի Ադրբեջանի ԶՈւ անձնակազմի ու զորավարժությունների թվի կրճատման
«Խազար» ադրբեջանական ռազմական հետազոտությունների ինստիտուտի վերլուծաբան, ռազմական լրագրող Ջասուր Սումերինլին ադրբեջանական Meydan TV հեռուստաընկերության հետ զրույցում հայտարարել է, որ մանաթի արժեզրկումից հետո զինծառայողների աշխատավարձերը կրճատվել են 30 տոկոսով, և քանի որ ադրբեջանական կառավարությունն ազգային արժույթի հետևանքով ծագած ճգնաժամից դուրս գալու ծրագիր չունի, մանաթի անկումը կբերի նաև ադրբեջանական բանակի անձնակազմի կրճատման:
Սումերինլին նշել է, որ այս տարի բանակում աշխատավարձերի բարձրացում չի նախատեսվում: Նրա խոսքերով` մանաթի էժանացումն անխուսափելիորեն հանգեցնելու է ԶՈւ սպայական կազմի սոցիալ-կենցաղային պայմանների վատթարացման:
Ադրբեջանցի փորձագետը շեշտել է, որ զինծառայողների սոցիալական ապահովության համար ռազմական բյուջեից հատկացված մոտ 350 մլն մանաթը կնվազի գրեթե 125-130 մլն մանաթով:
«Կասկած չկա, որ զինծառայողների սնունդն ու հագուստը ապահովում են տեղական ընկերությունները, իսկ ահա վերջիններս մանաթի ճգնաժամով հետևանքով առաջիկա մեկ ամսվա ընթացքում բարձրացնելու են գները», -ասել է նա:
Սումերինլիի կարծիքով` առկա վիճակը խթանելու է բանակում կոռուպցիայի աճը: Նա ընդգծել է, որ 2015 թվականին զորավարժությունների անցկացման համար հատկացված մեծաքանակ միջոցները թերևս կկրճատվեն: Եթե տնտեսական ճգնաժամը սրվի, զինվորական պաշտոնների թիվը կտրուկ կնվազի, իսկ դրանց փոխարեն կաճի քաղաքացիական ծառայողների թիվը:
Ռազմական փորձագետը հայտնել է, որ պահեստազորից ենթասպաների զինակոչի գործընթացը դադարել է. «Եթե սրանից 5 ամիս առաջ հարյուրավոր քաղաքացիներ են նշանակվել տարբեր զինվորական պաշտոններում, ապա այժմ այդ գործընթացը ֆինանսական ճգնաժամի պատճառով դադարեցվել է»:
Ջասուր Սումերենլին հայտնել է, որ ինչպես մյուս բնագավառներում, Ադրբեջանի իշխանությունը չունի բանակում ճգնաժամից դուրս գալու ծրագիր ևս:
«Եթե ճգնաժամը շարունակվի, բանակին հատկացված ֆինանսական միջոցները կկրճատվեն, կդադարեցվի արտասահմանից պատվիրված ռազմական տեխնիկայի գնման գործընթացը, զորավարժությունների թիվը կտրուկ կնվազեցվի, և անձնակազմի կրճատում կկատարվի», -եզրափակել է նա:
Նյութեր թեմայի շուրջ`
Ադրբեջանի ԶՈւ զինծառայողները հոգեբանի խիստ կարիք ունեն
Ադրբեջանի զինված ուժերի զինծառայողները կարոտ են մնացել որակյալ սննդի
Ադրբեջանական բանակում զինծառայողները աշխատավարձ չեն ստանում
Լրահոս
Տեսանյութեր
ԱԺ նիստը մեկնարկեց մեկ րոպե լռությամբ՝ ի հիշատակ պատգամավոր Մհեր Սահակյանի
