Ձեր վստահելի աղբյուրը

ՀՀ Ազգային ժողովում կառավարության հետ հարց ու պատասխանի ժամանակ «Հայ Յեղափոխական Դաշնակցություն» խմբակցության ղեկավար Արմեն Ռուստամյանը արտաքին գործերի նախարար Էդվարդ Նալբանդյանից հետաքրքրվեց ադրբեջանական դիվերսիոն խմբից, որի անդամներին Ադրբեջանին հանձնելու համար ԱՄՆ-ն միջնորդությամբ է հանդես եկել:

«Լեռնային Ղարաբաղի Հանրապետությունում դատապարտված ադրբեջանցի դիվերսանտների կատարած հանցագործությունները, սպանությունները բացահայտված, փաստագրված և ապացուցված են, ներառյալ` 17-ամյա պատանու առևանգումը և սպանությունը: Իսկ միջազգային հանրությանը քաջ հայտնի է, թե ինչպես են Ադրբեջանում հերոսացնում մարդասպաններին, ինչպես եղավ տխրահռչակ Սաֆարովի դեպքում, որը միակ դեպքը չէր»,- հայտարարեց նախարար Էդվարդ Նալբանդյանը:

Արմեն Ռուստամյանի հարցը մտահոգություն էր պարունակում, թե ,  միջազգային հանրությունն սկսել է Հայաստանից պահանջել մարդասիրական քայլ կատարել` դիվերսանտներին հանձնել Ադրբեջանին, և հիմա  նորից հարցը կտեղափոխվի այլ հարթություն, կնենգափոխվի էությունը, «որովհետև մենք հստակ գիտենք, թե այս հարցի հետ կապված Ադրբեջանն ինչ քաղաքականություն է վարում»:

Նրա խոսքերով` Ադրբեջանն ամեն ինչ շուռ տված է ներկայացնում միջազգային հանրությանը՝ ասելով, որ չկատարված հանցագործությունը գոյություն չունեցող պետությունը դատապարտում է գոյություն չունեցող դատարանով:

«Եթե խնդիրը տեղափոխվում է մարդասիրական հարթակ, ինչպես դա ներկայացվում է միջնորդության մեջ, Ադրբեջանն ինքն այդ մարդասիրական հարթակից դուրս է գործում, ամեն ինչ տեղավորում է իր քարոզչության շրջանակների մեջ: Եթե մենք ադեկվատ պատասխան չտանք, տեսնում եմ, որ քայլեր կատարվում են, ու շատ քայլեր էլ ճիշտ են կատարվում, բայց համակարգված պետք է այս խնդրին վերաբերվել, և եթե ուզում ենք բացել, դիմակազերծել Ադրբեջանի կողմից վարվող նենգ քաղաքականությունը, սա հարմար առիթ է, որ այս օրինակով ցույց տանք»,-ասաց Ա.Ռուստամյանը:

Է.Նալբանդյանի խոսքերով` բնական է, որ քաղաքակիրթ աշխարհը խոսում է մարդասիրությունից: «Սակայն ի՞նչ մարդասիրության մասին կարող ենք խոսել Ադրբեջանի պարագայում, Ադրբեջանում հայտնված քանի հայազգի քաղաքացիական անձինք ադրբեջանցիների կողմից ահաբեկիչների ոճով նվաստացվել են կամերաների առաջ, ապա սպանվել: Կամ ի՞նչ մարդասիրությամբ էին առաջնորդվում Բաքվում, երբ մերժեցին Մինսկի խմբի, Կարմիր Խաչի, ԵԱՀԿ-ի կոչերը, որ պայմաններ ստեղծվեն, որ որպեսզի խոցված հայկական ուղղաթիռի անկման վայրից տեղահանվեն զոհված օդաչուների աճյունները»,- նշեց Նալբանդյանը:

Նա ընդգծեց, որ բոլորին է հայտնի, թե այդ նույն ադրբեջանցի «մեծ մարդասերները» ինչպես են վերաբերում իրենց սեփական քաղաքացիների հետ:

«Այնտեղ խոշտանգում են այն մարդկանց, ովքեր խաղաղության և մարդասիրության ջատագովներն են: Այսինքն՝ այս ամենը ցույց է տալիս, որ Ադրբեջանը յուրովի է հասկանում մարդասիրությունը, իսկ մարդասիրության իրական դրսևորումներն օգտագործում է, որպեսզի երկրում ավելի խորացնի ատելությունը և այլատյացությունը»,- նշեց Է.Նալբանդյանը:

Նախարարը նաև հերքեց ադրբեջանցիների տարածած տեղեկատվությունը, թե Երևանում գտնվելու ընթացքում ԵԱՀԿ Մինսկի խմբի համանախագահները բարձրացրել են դիվերսանտների հարցը, իրականությանը չի համապատասխանում:

Նալբանդյանը հավաստիացրեց, որ Հայաստանում հավատարմագրված դիվանագիտական ներկայացուցչություններին մանրամասն ներկայացվել է բոլոր փաստարկները՝ ընդգծելով, որ նույնն արվում է նաև օտար երկրներում հայկական դիվանագիտական ներկայացուցչությունների կողմից: Նա նաև կոչ արեց զգույշ լինել ձևակերպումների առումով՝ Վիկտորիա Նուլանդի խոսքի հետ կապված: