Ձեր վստահելի աղբյուրը

Մարտի 2-ին Հայ-ռուսական (Սլավոնական) համալսարանում բացվելու է գեղանկարիչ Ջանիկ Գասպարյանի անհատական ցուցահանդեսը: Այդ օրը լրանալու է արվեստագետի 88-ամյակը: Սա, ի դեպ, նկարչի առաջին անհատական ցուցահանդեսն է:

Նկարչի դուստրը` մուլտիպլիկատոր, բեմադրող նկարիչ Նաիրա Մուրադյանը Panorama.am-ի հետ զրույցում ասաց, որ հայրը երբեք չի ցանկացել անհատական ցուցահանդես ունենալ: Մարտի 2-ի ցուցահանդեսի մասին էլ, Ն. Մուրադյանի խոսքով, արվեստագետը տեղյակ չէ, անակնկալ է լինելու իր համար:

Ցուցահանդեսն անցկացվում է «Արտ-ակվարիում» նախագծի շրջանակում, կազմակերպիչն է Հայ-ռուսական համալսարանի համաշխարհային գրականության և մշակույթի ամբիոնի վարիչ Լիլիթ Մելիքսեթյանը: Panorama.am-ի հետ զրույցում նա ասաց, որ նախագծի շրջանակում արդեն մի քանի ցուցահանդես կազմակերպել է՝ քանդակագործներ Նունե Թումանյանի, Գևորգ Հարությունյանի, գեղանկարիչներ Անժելա Գալստյանի, Անուշ Առաքելյանի, Սևան Նաղաշի և այլոց:

«Այս նախագծի հիմնական նպատակն այն է, որ ուսանողները ծանոթանան ոչ միայն արվեստի, մշակույթի, գրականության պատմությանը, այլ ժամանակակից հայ արվեստի, ստեղծագործողների հետ»,- նշեց Լ. Մելիքսեթյանը՝ հավելելով, որ Հայաստանում շատ են բազմաշնորհ, տաղանդավոր նկարիչներ, որոնց մասին երիտասարդները շատ քիչ բան գիտեն:

«Ծանոթանալով Ջանիկ Գասպարյանի հետ, տեսնելով նրա ստեղծած կտավները, ապշեցի, որ կյանքում չի ունեցել անհատական ցուցահանդես: Որոշեցի, որ անպայման պետք է կազմակերպեմ: Պայծառ անձնավորություն է, հետաքրքիր, ֆանտաստիկ նկարիչ է»,- ասաց ցուցահանդեսի կազմակերպիչը:

Ցուցահանդեսում ներկայացվելու է մոտ 25 աշխատանքը: Ստեղծագործությունները բերվելու են նկարչի անձնական հավաքածուից:

«Ցանկացած այցելուի համար եզակի հնարավորություն է շնորհավորել արվեստագետին, շփվել պայծառ մարդու, տաղանդավոր նկարչի հետ, հաճույք ստանալ նրա գեղեցիկ աշխատանքներից, աշխարհի գեղեցկությունը տեսնելու և ուրիշներին ցույց տալու նրա կարողությունից»,- ասաց Լիլիթ Մելիքսեթյանը:

Ջանիկ Գասպարյանը ծնվել է 1927 թ. մարտի 2-ին Երևանում: 1947 թվականին ավարտել է Երևանի Փանոս Թերլեմեզյանի անվան գեղարվեստի ուսումնարանը, 1953 թվականին` Երևանի գեղարվեստաթատերական ինստիտուտը։ Ջանիկ Գասպարյանի ստեղծագործությունները պահպանվում են Հայաստանի ազգային պատկերասրահում, Երևանի ժամանակակից արվեստի թանգարանում, Մոսկվայի Արևելքի ժողովուրդների թանգարանում և այլուր:

Ջանիկ Գասպարյանը մինչ օրս էլ նկարում է` շարունակելով իր ուրույն ստեղծագործություններով հարստացնել հայ արվեստը:

Աշուն, 1966 թ.

Արևոտ օր, 1968 թ.

Շենքեր, 1980 թ.

Ծիրանի ծառեր, 1980 թ.

Ձմեռը Երևանում, 1986 թ.