Ձեր վստահելի աղբյուրը

Այս տարիների ընթացքում առաջընթաց և բազմակարծություն է ապահովվել Հանրային հեռուստատեսության լրատվական հաղորդումներում: Այս մասին այսօր Ազգային ժողովում Հեռուստատեսության և ազգային ռադիոյի հանձնաժողովի 2013 թ. գործունեության մասին հաշվետվության քննարկմանը ժամանակ հայտարարեց ԱԺ փոխնախագահ Էդուարդ Շարմազանովը:

Ավելին, ըստ նրա, խոսքը ոչ միայն Հանրային հեռուստաընկերությանն է վերաբերում, այլևս այլ հեռուստաընկերություններին, որոնց լրատվական հաղորդումները վստահություն ունեն հանրության մոտ:

Այդուհանդերձ, ԱԺ փոխնախագահը նկատեց, որ թեև այս տարիներին հանձնաժողովը կատարել է դրական աշխատանք, բայց խնդիրներ դեռ կան:

Նրա խոսքերով` Հայաստանում յուրաքանչյուրի խնդիրը պետք է լինի առողջ, ազգային դաստիարակությամբ տոգորված, բարոյական, քրիստոնեական սերունդ ունենալը, ինչում մեծ անելիք ունեն նաև հեռուստաընկերությունները:

«Իմ խորին համոզմամբ, չկա ինֆորմացիա, որ պրոպագանդա չէ, որ կան հաղորդումներ, որոնք ուղղակի կամ անուղղակի կամ դաստիարակում են կամ չեն դաստիարակում: Հիմա, եթե մենք ուզում ենք ունենալ, ինչպես մենք ենք ասում` առողջ, բարոյական, քրիստոնեական, հայրենասեր սերունդ, ապա պետք է սկսենք ճանաչողությունից: Չկա հայրենասիրություն առանց ճանաչողության: Ես այն կարծիքին եմ, որ մեր բոլոր հեռուստաընկերությունները պետք է ավելացնեն ճանաչողական հաղորդումները»,- նշեց է. Շարմազանովը:

Մինչդեռ, ըստ նրա, տարբեր հեռուստաալիքներով կարծես թե հաղորդումները կրկնվում են, կա մի հաղորդումների շարք, որոնց ընթացքում մարդիկ ճաշ են եփում: «Մենք հո որկրամոլ չե՞նք: Ալիք կա, որ երկու-երեք հատ նույն հաղորդումից ունի, մեր նպատակը ո՞րն է՝ ո՞վ ի՞նչ լավ բորշ է սարքում, թե ո՞վ է լավ ձվածեղ սարքում: Ամեն ինչ չափի մեջ է գեղեցիկ»,- ասաց Շարմազանովը:

Նրա խոսքերով` նախորդ տարի նշվում էր Հովհաննես Շիրազի 100-ամյակը, սակայն, ինքը, բացի լրատվական մի քանի հաղորդումներից, շատ քիչ է տեսել, որ Շիրազի 100-ամյակին անդրադարձ եղած լինի հեռուստաալիքներով: «Մեր նոր սերնդին պետք է ամեն օր դաստիարակենք: Ինչո՞ւ է մեզ թվում, թե բոլորը գիտեն՝ ով է Հովհաննես Շիրազը կամ ով է եղել Համո Սահյանը»,- նկատեց Է.Շարմազանովը:

Ըստ նրա` նույնը վերաբերում է նաև «Արարատ-73»-ին, որի նվիրված հաղորդումներ չեն եղել, բացառությամբ մի քանի հաղորդումներից:

«Կարելի էր չէ՞ անդրադառնալ: Չեմ կարծում, որ դրա համար մեծ գումարներ են պետք: Ընդամենը ցանկություն էր պետք, որ մենք մեր նոր սերնդին ներկայացնեինք մեր հերոսներին: 20-րդ դարում մենք մի քանի զարթոնք ենք ունեցել: Մեկը Սարդարապատն է, մեկը Հայրենական մեծ պատերազմում տարած հաղթանակն է, մեկը 1963թ. շախմատի աշխարհի առաջնությունում Տիգրան Պետրոսանի հաղթանակն է, մյուսը 1965թ. Հայոց ցեղասպանության 50-րդ տարելիցն է, մյուսը` 1973թ. «Արարատ»-ի հաղթանակը, հետո արդեն գալիս է 1988թ. արցախյան շարժման զարթոնքը: Եթե մենք չենք ներկայացնում «Արարատ 73»-ի մեր փառապանծ տղաների հերոսությունը, ի՞նչ պետք է ներկայացնենք: Այդ մարդիկ մի ամբողջ խորհրդային կայսրությունում հաղթել են: Եվ այդ 70 հազարանոց «Հրազդան» մարզադաշտը բացականչում էր ««Արարա'տ», հուպ տուր», դա ազգային ոգու պոռթկում էր»,- ընդգծեց Շարմազանովը:

Նա նաև նշեց, որ այս տարի լրացել է «Արարատ 73»-ի հայտնի ֆուտբոլիստ Խորեն Հովհաննիսյանի 60-ամյակը, բայց դեռ չի տեսել, որ որևէ մեկը Խորեն Հովհաննիսյանին նվիրված հաղորդում ներկայացնի:

«Մեր հարևան երկրում, եթե Խորեն Հովհաննիսյանին մոտեցող ֆուտբոլիստ ունենային, առավոտից իրիկուն կգովաբանեին կայքերով և բոլոր հեռուստաընկերություններով»,- ասաց Շարմազանովը:

Նրա խոսքերով` անընդհատ խոսում են քրիստոնեական սերունդ դաստիարակելու մասին, բայց պետք է ապահովել հասարակություն-եկեղեցի կապը, ինչը հայկական հեռուստաընկերություններն այդքան էլ լավ չեն անում: Նա նշեց, որ կան որոշ հաղորդումներ, որոնց ընթացքում հոգևորականներ, սրբազան հայրեր խոսում են, սակայն դա քիչ է, պետք է ավելի շատ եկեղեցուն վերաբերող հաղորդումներ լինեն:

Է.Շարմազանովը անդրադարձավ նաև հեռուստաեթերով հնչող երաժշտությանը:

«Քիչ առաջ խոսում էի Սասուն Պասկևիչյանի հետ, բայց նոր սերունդին հարցրեք` քանի հոգի նրա մասին գիտի: Մարդ, ով արժեքներ է ստեղծել, մարդ, ով հայ երգարվեստում ֆանտաստիկ երևույթ է: Պետք է անպայման 75-ամյակ, 80-ամյակ լինի, որ անդրադառնանք: Ես խնդրում եմ, որ մեր լեգենդար գործիչներին ներկայացնեք»,- ասաց Շարմազանովը:

Նա նաև նկատեց, որ ինքը սահմանափակ մարդ չէ և հասկանում է, որ երաժշտության բոլոր տեսակներն էլ պետք են, սակայն ամեն ինչ իր չափն ունի:

«Եթերով մատուցվող երաժշտությանը 90 տոկոսը կլկլոց է, իսկ մնացած 10 տոկոսի մեջ նոր ճաշակ են տեղավորում: Վերջին անգամ մենք երբ ենք լսել Օֆելյա Համբարձումյանի, Հովհաննես Բադալյանի կատարումները: Մենք խոսում ենք հայրենասեր սերնդի մասին: Այդ սերունդը օդից չի ընկնելու, մենք պետք է այդ սերունդը դաստիարակենք»,- ընդգծեց ԱԺ փոխնախագահը:

Շարմազանովը խոսեց նաև Արցախյան հերոսամարտի մասին և հարցադրում արեց. «Մենք քանի ֆիլմ ունենք Արցախյան հերոսամարտի վերաբերյալ: Ընդամենը մեկ ֆիլմ է նկարահանվել, որի հերոսը չգիտակցված գնացել ու հերոս է դարձել: Մենք հանում ենք մի ֆիլմ, որի հերոսը հանցագործություն է անում, Երևանից փախչում-գնում է Ղարաբաղ, որտեղ ստիպված կռվում է թուրքի դեմ: Սակայն մենք հազարավոր հերոսներ ունենք, որոնցից մի քանիսն էլ այս դահլիճում են նստում: Նրանց կյանքի օրինակով կարելի էր արցախյան ազատամարտի մասին շատ լավ ֆիլմ նկարահանել; Դա պետք է դաստիարակենք: Այսինքն` Արցախյան գոյամարտի այն մասնակիցները, որոնք լավ ախպեր չունեն, լավ պաշտոն չունեն, իշխող կուսակցության անդամ չեն, կամ միտինգավոր չեն, այդ մարդկանց չպիտի ճանաչեն»:

Աժ փոխնախագահը իր ելույթը եզրափակեց` ասելով, որ ինքն այս պահին ոչ թե քննադատում է, այլ առաջարկներ է ներկայացնում:

«Ուզում ենք ապրել մի երկրում, որի հերոսը Վիկտոր Համբարձումյա՞նն է, թե՞ ուզում ենք ապրել մի երկրում, որի հերոսը չգիտենք ով է: Մենք պետք է ուշադրություն դարձնենք մեր անցյալին: Հասկանում եմ, որ բիզնես է, բայց մեր արժեքները պետք է պահպանենք»,- ավելացրեց նա: