Ձեր վստահելի աղբյուրը

Հղի կնոջ մահվան գործով Քրեական օրենսգրքի 130 հոդվածի 2-րդ մասի հատկանիշներով մեղադրանք է առաջադրվել «Արմավիր» ԲԿ-ի մանկաբարձ-գինեկոլոգ Հասմիկ Հակոբյանին: Այս մասին Panorama.am-ին հայտնեցին ՀՀ քննչական կոմիտեից:

Հունիսի 28-ին Հ. Հակոբյանի հերթապահության օրն է եղել, և հենց ինքն է ԲԿ դիմած հղի կնոջը՝ Նարինե Շարոյանին ուղղորդել ինֆեկցիոն բաժանմունք: Հ. Հակոբյանի նկատմամբ որպես խափանման միջոց է ընտրվել ստորագրություն հանրապետությունից չհեռանալու մասին:

Քր. Օր.-ի 130 հոդվածի 2-րդ կետը սահմանում է. Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը՝ որն անզգուշությամբ առաջացրել է բուժվող հիվանդի մահ կամ մարդու իմունային անբավարարության վարակի հարուցիչով վարակում՝
պատժվում է ազատազրկմամբ՝ երկուսից վեց տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով կամ առանց դրա:

Հիշեցնենք՝ 2014 թվականի հուլիսի 7-ին ստացվել էր քաղաքացի Գ.Մինասյանի հաղորդումը, որ իր կինը՝ Ն.Շարոյանը, հունիսի 28-ին «Արմավիր» բժշկական կենտրոնում վիրահատության էր ենթարկվել, որի արդյունքում, բժիշկների կողմից իրենց մասնագիտական պարտականությունները ոչ պատշաճ կատարելու հետևանքով, վիրահատությունից 3 օր անց՝ 2014 թվականի հուլիսի 1-ին, նա «Արմենիա» բժշկական կենտրոնում մահացել է:

Օրեր առաջ Քննչական կոմիտեից հայտնեցին, որ 2015 թվականի փետրվարի 3-ին ստացվել է ՀՀ ԱՆ դատաբժշկական հանձնաժողովային փորձաքննության թիվ 228/հձ եզրակացությունը, ըստ որի` խախտումներ են հայտնաբերվել Ն.Շարոյանի նկատմամբ «Արմավիր» բժշկական կենտրոնում բուժօգնություն ցուցաբերելու ընթացքում։

Փորձագետների գնահատմամբ՝ «Արմենիա» բժշկական կենտրոնում Ն.Շարոյանի հղիության ընթացքի հսկողությունը, բժշկական օգնությունը և սպասարկումը կատարվել է ճիշտ, իսկ «Արմավիր» ԲԿ-ում վիրահատությունը կատարվել է ուշացումով։

Ն.Շարոյանը 2014 թվականի հունիսի 29-ին՝ ժամը 11:50-ին, դիմել է «Արմավիր» բժշկական կենտրոն՝ գանգատվելով ինքնազգացողությունից: Հերթապահ բժշկի կողմից հետազոտվելու արդյունքում կնոջ մոտ ախտորոշվել է՝ «Հղիություն 19-20 շաբաթական բարդացած մանկաբարձական անամնեզ, սպի արգանդի վրա կեսարյան հատումից հետո»:

Ապա նա ընդունվել է ինֆեկցիոն բաժանմունք՝ ինֆեկցիոնիստի կոնսուլտացիայի նպատակով, սակայն չի հետազոտվել ինֆեկցիոնիստի կողմից:

Հաշվի առնելով Ն.Շարոյանի հղի լինելը՝ առավել ևս՝ «բարդացած մանկաբարձական անամնեզ» ախտորոշմամբ, ըստ փորձագետների, անհրաժեշտ էր նրան ընդունել ոչ թե ինֆեկցիոն բաժանմունք, այլ՝ մանկաբարձական, որտեղ ժամանակին հնարավոր կլիներ ախտորոշել հղիության հետ կապված բարդությունները։

Սակայն միայն ժամը 15:50-ին հղի Ն.Շարոյանի մոտ գինեկոլոգի կողմից ախտորոշվել է «ընկերքի շերտազատում և մասիվ (զանգվածային) արնահոսություն»: Այդ ժամանակ ձեռնարկված բուժական միջոցառումները եղել են լրիվ ծավալով և ճիշտ, սակայն՝ ուշացած։

Հանձնաժողովի գնահատմամբ՝ հղի Ն.Շարոյանի բոլոր հետազոտությունները հիվանդանոց ընդունվելուց անմիջապես հետո պետք է կազմակերպվեին մանկաբարձական բաժանմունքում, այլ ոչ թե՝ ինֆեկցիոն բաժանմունքում, որն էլ պատճառ է հանդիսացել Ն.Շարոյանի օբյեկտիվ վիճակի ոչ ճիշտ գնահատմանը, ուշ ախտորոշմանը և նրա մոտ ծանրագույն բարդությունների առաջացմանը, ինչն էլ հետագայում, չնայած ձեռնարկված համարժեք բուժական միջոցառումների կատարմանը, հնարավորություն չի ընձեռել փրկելու Ն.Շարոյանի կյանքը:

Նկատի ունենալով, որ փորձագետների գնահատմամբ բժշկական բացթողումները եղել են «Արմավիր» բժշկական կենտրոնում՝ Երևանի քննչական վարչության Աջափնյակ և Դավթաշեն վարչական շրջանների քննչական բաժնից նշված քրեական գործն ուղարկվել է ՀՀ քննչական կոմիտեի Արմավիրի մարզային քննչական վարչության Արմավիրի քննչական բաժին, որտեղ այն ընդունվել է վարույթ, եւ կտրվի համապատասխան քրեաիրավական գնահատական։

Նախորդող հրապարակում՝
Ամռանը մահացած հղի կնոջը «Արմավիր» բժշկական կենտրոնում պատշաճ բուժօգնություն չեն ցուցաբերել. Փորձաքննության արդյունքներ