Ձեր վստահելի աղբյուրը

«Մեր` ծնողների տպավորությունը նույնն է, եթե մարտի 1-ը չի բացահայտվել այս յոթ տարվա մեջ, ուրեմն ոչինչ էլ չի փոխվի»: Այսօր լրագրողների հետ հանդիպման ժամանակ նման տեսակետ հայտնեց մարտի 1-ի ողբերգական իրադարձությունների զոհերից Արմեն Ֆարմանյանի հայրը՝ Վաչագան Ֆարմանյանը:

«Նույն դատախազը տեղափոխվել է քննչական կոմիտե ու նույն քննիչներն են այնտեղ, ոչինչ էլ չի փոխվել»,-նշեց Արմեն Ֆարմանյանի հայրը:

Քննարկմանը ներկա «Մարտի 1» Հասարակական կազմակերպության համակարգող, գրող, հրապարակախոս Առաքել Սեմիրջյանի կարծիքով էլ, հնարավոր չի հազարավոր մարդկանց աչքի առաջ հանցագործություն տեղի ունենա և չբացահայտվի. «Մարիտի 1-ը ՀԱԿ-ի սեփականությունը չէ, եթե մարդիկ ցանկանում են, որ դա բացահայտվի, կարող են զբաղվել դրանով, այլ ոչ թե հանցագործության մասին հիշել հենց մարտի 1-ի օրը: Մարտի 1-ը հայ ժողովրդի սեփականությունն է, ոչ թե միայն զոհվածների ծնողներինը»:

Ա. Սեմիրջյանի խոսքերով, մարտի 1-ը բացահայտված է վաղուց, ուղղակի գործը պետք է հրապարակայնացվի:

«Յոթ տարվա մեջ տուժողի իրավահաջորդներս հասկացել ենք, որ իրենք ցույց են տալիս միջազգային կազմակերպություններին, իբր աշխատում են, զբաղվում են մարտի 1-ի գործով, բայց իրականում երկարաձգում են այս գործը: Երբեք այս էջը չի բացահայտվի: Բոլոր մեղավորները կպատժվեն այն դեպքում, երբ որ կլինի իշխանափոխություն»,-նման դիտարկում էլ արեց մարտի 1-ի իրադարձությունների զոհերից Գոռ Քլոյանի հայրը՝ Սարգիս Քլոյանը:

Նա նշեց, որ գնալու են գլխավոր դատախազի մոտ, բայց քննչական ծառայություն այլևս չեն գնալու, քանի որ որևէ առաջխաղացման հույս չունեն:

Լրագրողների այն հարցին, թե արդյո՞ք զոհվածների ծնողները որևէ փոխհատուցում չեն ստանալու, Գոռ Քլոյանի հայրը պատասխանեց. «Այդ փողը չարիք է իմ տան համար, ես իրենց ոչ մի կոպեկն էլ չեմ ուզում, գնում եմ արտագնա աշխատանքի և լավ էլ պահում եմ թոռնիկներիս»:

Անդրադառնալով գործի՝ մարդու իրավունքների եվրոպական դատարան ներկայացնելու ակնկալիքներին՝ Սարգիս Քլոյանը հույս հայտնեց, որ պիտի դատը շահեն. «Հավատում եմ, որ կշահենք, որովհետև 2008 թվականի մարտի 1-ին մենք չենք հարձակվել ԱԺ շենքի վրա, կառավարության շենքի կամ նախագահի նստավայրի վրա, եթե իհարկե չգնան խանգարեն»:

Զոհվածների ծնողներն ավելացրեցին, որ ինչպես անցած տարիներին, այս տարի նույնպես նրանք մարտի 1-ին կլինեն Ազատության հրապարակում: