Զոհված փոխգնդապետին ու զինծառայողեն կհուղարկավորեն զինվորական կարգով

Օրվա թեմա 11:40 04/03/2015

Զոհված փոխգնդապետին ու զինծառայողեն կհուղարկավորեն զինվորական կարգով

Հակառակորդի դիվերսիոն ներթափանցման փորձը կանխելիս ծավալված մարտերի ժամանակ զոհված զինծառայողներ Արտակ Աղեկյանին ու Հայկ Բարոյանին զինվորական կարգով կհուղարկավորեն այսօր՝ Տաշիր քաղաքի գերեզմանատանը:

Panorama.am-ն այս մասին տեղեկացավ Լոռու մարզպետարանից: Արտակ Աղեկյանը ծնունդով Տաշիր քաղաքից է, Հայկ Բարոյանը՝ Սարչապետ համայնքից:

Նախօրեին ՀՀ պաշտպանության նախարար Սեյրան Օհանյանը, ԼՂՀ պաշտպանության նախարար Մովսես Հակոբյանը, Լոռու մարզպետ Արթուր Նալբանդյանը, բարձրաստիճան զինվորականներ, պաշտոնատար այլ անձինք Տաշիր քաղաքում մասնակցել են փետրվարի 28-ին ադրբեջանական դիվերսիան հետ մղելու հետևանքով զոհված փոխգնդապետ Արտակ Աղեկյանի և ժամկետային զինծառայող Հայկ Բարոյանի հոգեհանգստին: Հոգեհանգստի կարգը կատարել է Գուգարաց թեմի առաջնորդ Սեպուհ արքեպիսկոպոս Չուլջյանը: Ներկաներն իրենց ցավակցությունը և զորակցությունն են հայտնել զոհվածների հարազատներին՝ երախտագիտություն հայտնելով նրանց Հայրենիքի քաջարի պաշտպաններ դաստիարակելու համար:

Հիշեցնենք, որ փետրվարի 28-ին՝ ժամը 14:25-ի սահմաններում, ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասի մարտական հենակետերի ուղղությամբ հակառակորդը ձեռնարկել է դիվերսիոն հետախուզական ներթափանցման փորձ:

ՊԲ առաջապահ ստորաբաժանումները ժամանակին հավաստանշել են հակառակորդի հատուկ ջոկատայինների առաջխաղացումը և վերջիններիս կորուստներ պատճառելով, հետ շպրտել ելման դիրքեր:

Ցավոք, ծավալված մարտերի ժամանակ զոհվել են զինծառայողներ, 1979թ. ծնված Արտակ Սեդրակի Աղեկյանը և 1995թ. ծնված Հայկ Գրիգորի Բարոյանը: Ցուցաբերած արիության համար նրանք պարգևատրվել են ԼՂՀ «Մարտական ծառայության համար» մեդալով:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: