Ձեր վստահելի աղբյուրը

Ֆեյսբուք սոցիալական ցանցում մի օգտատեր ահազանգել էր, որ Երևանի 19 պոլիկլինիկայի քիթ, կոկորդի բժիշկ Անահիտ Պետրոսյանի պատճառով երեխան արյան վարակ՝ սեպսիս է ստացել, ցնցումներով ու բարձր ջերմությամբ տեղափոխվել հիվանդանոց: Ըստ գրառման, նույն պալատում ևս մեկ բալիկ է բուժվում՝ «տուժած նույնպես այս բժշկուհու «բուժումներից»»։

Օգտատերը մասնավորապես գրում է. «Մի քանի օր առաջ, նա, իմ շատ լավ ընկերների 4-ամյա բալիկի կոկորդը զննելու փոխարեն գործիքով որոշել է մաքրել, այդ մեթոդը վաղուց չի կիրառվում, ինչի արդյունքում երեխային վարակել է, բալիկը ցնցումներով և 40 աստիճան ջերմությամբ հոսպիտալացվել է, նրա մոտ հայտնաբերել են արյան վարակ, սեպսիս։ Բալիկին բուժում են արդեն 10 օր անտիբիոտիկներով, սկզբի մի քանի օրը նրա մոտ ցնցումները, բարձր ջերմությունը շարունակվել են»:

Ծնողը լրագրողների հետ շփվել չի ցանկանում: Առողջապահության նախարարությունից Panorama.am-ին ասացին, որ պոլիկլինիկան Երևանի քաղաքապետարանի ենթակայության ներքո է գործում:

Պոլիկլինիկայի տնօրեն Սամվել Սարգսյանը Panorama.am-ին ասաց, որ Անահիտ Պետրոսյանը շատ փորձառու բժիշկ է, բազմաթիվ շնորհակալական նամակներ են ստացել նրա մասին:

«Մեր լավագույն մասնագետներից է: Նրա դռան մոտի հերթերը որ տեսնեք, կհասկանաք»,-ասաց Սամվել Սարգսյանը:

Տնօրենն ասաց, որ այսօր պոլիկլինիկայի մանկության գծով փոխտնօրենից խնդրելու է այդ երեխայի քարտը, որպեսզի քննարկեն կատարվածը:

Մանկության գծով փոխտնօրեն Նունե Պետրոսյանը Panorama.am-ին ասաց, որ այդ օրը պոլիկլինիկայում չի եղել, երեխային իր աչքով չի տեսել: Սակայն տեղեկացել է, որ Արաբկիրում առաջին օրը՝ փետրվարի 24-ին հրաժարվել են երեխային ընդունել, հաջորդն օրն ավելի ծանր վիճակում են ընդունել:

«Ես կարող եմ ասել, «Արաբկիր» ԲԿ-ի բացն ավելի շատ է, գիտե՞ք»,-ասաց փոխտնօրենը:

Ն. Պետրոսյանը խոսել է Անահիտ Պետրոսյանի հետ: Քիթ, կոկորդի մասնագետը բացատրել է, որ չորսամյա աղջնակի կոկորդը կարմիր է եղել, խորխ է եղել, ինքը լվացումներ է արել՝ Սալինով ու «Տոնզիլգոնով», չի բացառվում նաև անտիբոիտիկ նյութերով:

«Ես չեմ տեսել, չգիտեմ, միգուցե իրոք անտիբիոտիկը ցուցված չի եղել, Անահիտն այնքան փորձառու է, որ մեր միջանցքում հերթեր միայն իր համար են գոյանում: Լվացման համար էլ է գործիք պետք, հիմա ծնողը պետք է բժշկին ասի, ո՞նց անի»,-ասաց փոխտնօրենն ու ավելացրեց, որ սա առաջին դեպքն է, երբ այս բժշկից բողոք են ստանում:

Փոխտնօրենի խոսքով, միանշանակ ասել, թե բժիշկը սխալ է բուժել, ճիշտ չէ:

«Հազարավորների բուժել է, բոլորը գոհ են, ունենք շնորհակալական նամակներ, ինքն այնպես չէ, որ փորձառու չի, ուղղակի հնարավոր է, որ երեխայի իմունիտենտի խնդիր է եղել: Ոչ ոք այս պարագայում չի կարող ասել, թե մեկ ժամ հետո ինչ կլինի»:

Նունե Պետրոսյանի խոսքով, «Արաբկիր» բկ-ից դեռ արյան վարակի հաստատման մասին էպիկրիզ չեն ստացել:

«Իրենք ասացին կլինիկան նման է, բայց հաստատված դիագնոզով էպիկրիզը չի եղել: Սա առաջին դեպքն, որ տվյալ բժշկուհու հետ այսպիսի պաշտոնական, խիստ ձևերով ներկայանում են: Բայց կներեք, ակադեմիկների ձեռքի տակ էլ մարդիկ են մահացել: Հասկացանք, որ ցանկալի չէ, վատ երևույթ է: Ես չեմ տեսել, չեմ կարող ոչինչ ասել, եթե տեսած լինեի, կասեի, այ այստեղ մենք բժշկական սխալ ենք թույլ տվել»,-ասաց փոխտնօրենն ու հավելեց, որ երեխային պոլիկլինիկա են բերել ոչ իրենց մանկաբույժի ժամով, մանկաբույժը հետո է իմացել տեղի ունեցածի մասին, նա խորհուրդ է տվել տանել «Արաբկիր»:

Պոլիկլինիկայի փոխտնօրենը կարծում է, որ բողոքելը ծնողի իրավունքն է, դեռ նախարարությունից կամ քաղաքապետարանից որևէ զանգ կամ արձագանք կատարվածի կապակցությամբ չի եղել:

Panorama.am-ը պատրաստ է հրապարակել նաև «Արաբկիր» բկ-ի արձագանքը: