Ձեր վստահելի աղբյուրը

««Բարգավաճ Հայաստան» կուսակցությունում ստեղծված իրավիճակն արդյունք էր քաղաքական նախաձեռնության այն փորձի, որ արեց ԲՀԿ-ն փետրվարի սկզբին: Արդյունքը հասկանալի էր: Քաղաքականության մեջ քաղաքական ուժն ավելի շատ բանի է հասնում ոչ թե իր սեփական նախաձեռնությունների արդյունքում, այլ ուժի սխալի, ոչ ճիշտ հաշվարկի պատճառով»,-լրագրողների հետ հանդիպման ժամանակ ասաց քաղաքագետ Սերգեյ Մինասյանը:

Նա ընդգծեց, որ ԲՀԿ-ն շատ բաներ ճիշտ չհաշվարկեց:

«Հետ ես նայում ու զարմանում, արդյո՞ք ԲՀԿ-ից ոչ մեկը չէր ենթադրում, որ փետրվարի 5-ից հետո, երբ Գագիկ Ծառուկյանը հայտարարեց արտահերթ նախագահական և խորհրդարանական ընտրությունների մասին, ինչու պետք է իշխանությունները չարձագանքեին այն ձևով, ինչպես արձագանքեցին՝ օգտագործելով ադմինստրիատիվ ռեսուրսը: Իրականում զարմանք է բերում նաև այն, որ եթե իսկապես Գագիկ Ծառուկյանը և ԲՀԿ-ն ցանկանում էին գնալ արտահերթ ընտրությունների՝ օգտագործելով իրենց միակ ռեսուրսը՝ հանրահավաքներով համախմբումը, ինչու մեկ շաբաթով հետաձգեցին հանրահավաքի օրը, ինչը թույլ է տալիս իշխանություններին մի քանի օրում արդյունավետ լուծել իրենց խնդիրը ԲՀԿ հետ»,- ասաց քաղաքագետը:

Ս. Մինասյանի խոսքով, այս ամենի արդյունքում ԲՀԿ-ն երկրորդ անգամ կորցրեց իր համբավը, ինչը դրական չի անդրադառնում քաղաքական ուժի վրա, նաև ֆինանսական, մարդկային ռեսուրսները:

Ինչ վերաբերում է այն հարցին, որ նախօրեին ԲՀԿ նորընտիր նախագահ Նաիրա Զոհրաբյանը հայտարարեց, որ ԲՀԿ-ն ընդդիմություն է, քաղաքագետի խոսքով, դա արդեն անուղղակի հասկանալի էր փետրվարի 5-ից հետո:

Պատասխանելով Panorama.am-ի հարցին, թե արդյո՞ք նոր ղեկավար ունեցող ԲՀԿ-ն կարող է իր դիրքերն ամրապնդել ընդդիմադիր դաշտում, Ս. Մինասյանն ասաց. «Միգուցե ոչ համար մեկը, բայց երկրորդ ընդդիմադիր քաղաքական ուժը կլինի ՀԱԿ-ից հետո: ՀԱԿ-ն ունի առավելություններ՝ գաղափարախոսական հիմքը, որը չունեն ընդդիմադիր դաշտի այլ քաղաքական ուժեր, նաև պետք է հասկանալ, որ ընդդիմադիր ուժը, որը ղեկավարում է նախկին նախագահը, առավել ևս այդքան փորձառու, առավելություն է ՀԱԿ-ի համար: ԲՀԿ-ն կհաստատվի որպես առանցքային ընդդիմադիր ուժ, բայց անհամեմատ ավելի թուլացած ռեսուրսներով և հնարավորություններով»: