Ձեր վստահելի աղբյուրը

Ադրբեջանի Սաբիրաբադ քաղաքի 39-ամյա բնակիչ, Արցախյան պատերազմի վետերան Ջաբրայիլ Սարասթուն օղլու Հասանովը մարտի 6-ին ինքնասպանություն է գործել` կախվելով Քուռ գետի կամրջից: Այս մասին հայտնում է ադրբեջանական «Ազադլիգ» թերթը` հավելելով, որ հանգուցյալը հրաժեշտի նամակ է թողել:

Ինչպես ասվում է նյութում, նամակում նա գրել է, որ այդ քայլին է դիմել բանկերին ունեցած պարտքերը մարել չկարողանալու հետևանքով: Վետերանը մերձավորներին խնդրել է ծախսեր չտանել իր թաղման ու հոգեհացի արարողության համար:

Թերթը հիշեցնում է, որ Հասանովը երեք երեխաների հայր էր: Նրա ավագ որդին ներկայումս զինծառայություն է անցնում Ադրբեջանի ԶՈւ-ում: Հայտնի է նաև, որ Հասանովն իր հին ավտոմեքենայով տաքսի ծառայություն էր կատարում:

Դեպքի հետ կապված Ադրբեջանի Ժողովրդական ճակատ կուսակցության առաջնորդ Ալի Քերիմլին թերթին պատմել է, որ Հասանովը, ով նաև Արցախյան պատերազմում զոհվածի եղբայր է, ինքնասպանության է դիմել անհույս և անելիանելի վիճակում հայտնվելու պատճառով:

«Հիշեցնեմ, որ գործող օրենսդրության համաձայն` զոհվածի ընտանիքին պետությունը պետք է 11 հազար մանաթ սոցապահովագրություն վճարի: 13 500 զոհվածի ընտանիք 1994 թվականից սկսած չի կարողանում ստանալ իր հասանելիք վճարը: Զոհվածի ընտանիքները և Արցախյան պատերազմի վետերաններն ադրբեջանական խորհրդարանի առջև վերջին անգամ բողոքի ակցիա են անցկացրել` պահանջելով վճարել այդ փողը: Եթե Ջաբրայիլ Հասանովի ընտանիքը հասանելիք գումարը ժամանակին ստանար, գուցե բանկերին պարտք չմնար, և վետերանն անհուսությունից այդ քայլին չդիմեր», -շեշտել է Քերիմլին:

Նշենք, որ վերջերս ադրբեջանցի ռազմական փորձագետ Ուզեիր Ջաֆարովի փոխանցմամբ` Արցախյան պատերազմում ադրբեջանական ուժերի կողմից կռված, երկու ոտքերը կորցրած, ազգությամբ ռուս Յուրի Վալերևիչ Դրոբոտովը ևս, ով ընդամենը 46 տարեկան էր, ադրբեջանական իշխանությունների կատարյալ անտարբերության ու օտարության պայմաններում հեռացել է կյանքից:

Նյութ թեմայի շուրջ`
Ադրբեջանի համար կռված 46-ամյա վետերանը մահացել է ինշխանությունների անտարբերության պատճառով