Ձեր վստահելի աղբյուրը

Կառավարությունը հայտարարում է, որ ջերմոցային տնտեսություն է զարգացնում, նորանոր ջերմոցներ են հիմնվում: Սակայն դրանց շնորհիվ ոչ միայն Հայաստանից լոլիկ, վարունգ չի արտահանվում, այլև մեծ քանակությամբ թարմ պտուղ-բանջարեղեն ներմուծվում է հարևան Թուրքիայից, Իրանից ու այլ երկրներից:

Փետրվարին ռեհան, անանուխ, դաղձ արտահանած Հայաստանը հարևան ու ոչ հարևան երկրներից բացի լոլիկից ու վարունգից, ներմուծել է անգամ սոխ, կաղամբ, կարտոֆիլ ու գազար: Տվյալները Panorama.am-ը վերցրել է Սննդամթերքի անվտագության պետական ծառայության պաշտոնական կայքէջից:

«Իրազեկ և պաշտպանված սպառող» ՀԿ նախագահ Բաբկեն Պիպոյանը Panorama.am-ի հետ զրույցում կարծիք հայտնեց, որ առաջիկա տարիներին էլ նույն միտումը կշարունակվի: Նա նկատում է, որ արտահանվող ապրանքներն էլ մանր տնտեսություններն են արտահանում, ոչ մի անանուխի կամ ռեհանի ջերմոցներ Հայաստանում դժվար թե գտնեք:

«Եթե պետությունը շեշտադրում է անում գյուղատնտեսության մի ճյուղի վրա ու որոշում է այն զարգացնել, ապա այս ոլորտի համար տրամադրվող վարկերի տոկոսադրույքները պետք է էականորեն ցածր լինեն մյուս վարկերի համեմատ: Այստեղ ոչ թե գյուղացիների միջև է տարբերություն դրվում, այլ գյուղատնտեսության ուղղության ու ակնկալիքի: 2-3 տարի հետո դու պետք է հասկանաս, քո կանխատեսելի արդյունքն ունե՞ս, թե՞ ոչ, եթե ունես, ուրեմն ճիշտ ուղու վրա ես, եթե չունես, ուրեմն պետք է այլ ճյուղում ներդրում կատարել»,-ասաց ՀԿ նախագահը:

Պիպոյանը նկատում է, որ ջերմոցային տնտեսության զարգացումը երկրի ղեկավարության ուշադրության կենտրոնում է, տարբեր պաշտոնյաներ այցելում են ջերմոցներ:

«Ինչո՞ւ չենք զարգանում: Չենք էլ կարողանալու զարգանալ, որովհետև մեր շուկայում այսօր տարանջատված մոտեցում չկա արտադրողի ու ներմուծողի նկատմամբ: Ես գնում եմ խանութ ու չգիտեմ, լոլիկը, որ առա, տեղակա՞ն էր, թե՞ ներմուծած, բացի այդ եթե ես իմանամ լոլիկը տեղականն է ու մի քանի հարյուր դրամով էլ թանկ, ապա նախապատվությունը կտամ տեղականին»,-նշեց Պիպոյանն ու առաջարկեց, որ տեղականի գինը կարելի է մի փոքր իջացնել, ներմուծած ապրանքինը՝ թանկացնել, որպեսզի մրցունակություն լինի:

Եթե պետությունը տնտեսություն է զարգացնում, ապա նման միջամտությունը պարտադիր է: Գյուղացուն արտոնություններ են պետք՝ հստակ ժամանակահատվածում:

«Ասում ենք, հինգ տարի քեզ ժամանակ ու արտոնություններ, հինգ տարի հետո դարձեք լիարժեք մրցունակ, որ մենք այդ ապրանքի ներկրման անհրաժեշտություն չունենանք»,-ասաց Պիպոյանը:

Տեղական ու ներմուծած բանջարեղենի տարանջատման պարագայում, ըստ ՀԿ նախագահի, շատերը թուրքականից կհրաժարվեն:

«Բայց թուրքական լոլիկը մեր շուկայում իրացվում է որպես ընտիր, Հոկտեմբերյանի կամ Արարատի ջերմոցի լոլիկ, ապա այստեղ զարմանալու բան չկա: Պետք է այս առումով լինի պետական վերահսկողություն ու պետական աջակցություն, եթե մենք ուզում ենք գնանք առաջ: Այստեղ ոչ միայն ցանկության, այլև լուրջ պրոֆեսիոնալիզմի պակաս կա: Ես ուրիշ բան չեմ ասում, Ադրբեջանում իրացվող ապրանքի վրա մի հատ հայերեն տառ է լինում, բունտ են անում, վերջին թարմ օրինակը «Ռաֆայելո»-ն է: Մենք հերիք չի թուրքական ապրանքը բերում ծախում ենք, մի հատ էլ այն ներկայացնում ենք որպես տեղական»,-ասաց նա:

Թեմայի վերաբերյալ կարդացեք նաև՝
Չգիտենք, որտեղ արտադրված բանջարեղենն ենք ուտում