Ձեր վստահելի աղբյուրը

Իսրայելի «Նատիվ» հատուկ ծառայության նախկին ղեկավար Յակով Կեդմին հարցազրույց է տվել «Գոլոս Արմենիի» թղթակից Էռնեստ Վարդանյանին, որի ժամանակ անդրադարձել են Լեռնային Ղարաբաղի, Իրանի և Մերձավոր Արևելքի խնդիրներին:

Կեդմին, պատասխանելով Արցախի պատերազմի վերսկսվելու մասին հարցին, ասել է, որ Ադրբեջանի բանակը ընդհանուր առմամբ շանսեր չունի: Պաշտոնաթող հետախույզը վստահություն է հայտնել, որ նոր պատերազմ ցանկանում են հրահրել ամերիկացիները:

«Դրանով նրանք ցանկանում են Հայաստանին դուրս մղել Մաքսային միությունից»,-պարզաբանել է նա` ավելացնելով, որ Վաշինգտոնին բացարձակ հետաքրքիր չէ, թե ի վերջո Ղարաբաղը ում բաժին կհասնի և ով կհաղթի այդ պատերազմում:

Հարցին, թե արդյոք պատերազմի վերսկսման միջոցով ղարաբաղյան հարցը կլուծվի, իսրայելցի փորձագետը նշել է, որ այն կարող ավարտվել ադրբեջանական բանակի հերթական պարտությամբ:

«Ինչ էլ անեն նավթային ազդեցությունները, դրանք հայկական բանակի առաջ շանսեր չունեն»,-ասել է իսրայելցի մասնագետը` չտարանջատելով հայկական բանակը Լեռնային Ղարաբաղի բանակից:

Նա շեշտել է, որ պատերազմի դեպքում հայերը կվերադառնան իրենց նախկին դիրքերին, իսկ ինչ վերաբերում է Նախիջևանի հարցին, ապա այն շոշափում է Թուրքիային, թեև Նախիջևանի գրավումը Հայաստանի համար առավել կարևոր է, քան ինչ-որ այլ շրջանների:

Զրույցի ընթացում արծարծվել է նաև հայ-իսրայելական հարաբերությունների ցավալի կետին` այն, որ պաշտոնական Երուսաղեմը չի ցանկանում ճանաչել և դատապարտել Հայոց ցեղասպանությունը:

Կեդմին հերթական անգամ նշել է նման քաղաքականության հիմնական երկու պատճառները:

«Առաջինը բավականին ցինիկ է` Թուրքիայի հետ ռազմավարական գործընկերությունը, սակայն ներկայում այդ հարաբերությունները վերանայվում են Թուրքիայի նոր քաղաքականության պատճառով: Իսրայելի հակաթուրքական գիծը կարող է շարունակվել, և այդ ժամանակ Թուրքիան կդադարի ճանաչման համար զսպող գործոն լինել: Երկրորդ պատճառը պակաս ցինիկ չէ և պայմանավորված է նրանով, որ Իսրայելում որոշ շրջանակներ կարծում են, որ Շոայից (Իսրայելում այդպես են կոչում Հոլոքոստը) բացի այլ ցեղասպանություն չկա և չի կարող լինել»,-ավելացրել է Կեդմին` հույս հայտնելով, որ այդ մոտեցումը կվերանայվի, և վաղ թե ուշ Իսրայելը կանի այն, ինչ պետք է վաղուց արած լիներ` ճանաչի Հայոց ցեղասպանությունը:

«Նատիվ»-ի նախկին ղեկավարը խոսել է նաև Մերձավոր Արևելքում տեղի ունեցող դեպքերի մասին, հատկապես Իրանի` հաշվի առնելով այդ երկրի կարևորությունը Հայաստանի համար:

«Մեր հատուկ ծառայությունների գնահատականով, Իրանը Իսրայելի համար սպառնալիք չի հանդիսանում»,-մեկնաբանել է Կեդմին:

Նրա խոսքով, Իսլամական հանրապետության դեմ հիպոթետիկ ռազմական գործողությունը շոշափելի արդյունքներ չի բերի և կարող է միայն մեկուկես-երկու տարով հետաձգել Իրանի կողմից միջուկային զենքի ստեղծումը: Միաժամանակ Կեդմին ավելացրել է, որ Թեհրանը չի ձգտում զանգվածային ոչնչացման զենք ձեռք բերել, որպեսզի չարժանանա միջազգային հանրության վրդովմունքին:

«Սակայն Իրանը ցանկանում է տեխնոլոգիական նման մակարդակի հասնել, որը հնարավորության դեպքում թույլ կտա նրան երկու ամսում միջուկային զենք ստեղծել»,-ավելացրել է փորձագետը` ընդգծելով, որ այդ պարագայում Իրանին կհետևի Թուրքիան, Սաուդյան Արաբիան և Եգիպտոսը:

Նրա խոսքով, ԱՄՆ-ում չեն ուզում Իրանին որպես միջուկային պետություն տեսնել, սակայն ժամանակին դա չէին ցանկանում նաև Հնդկաստանի և Պակիստանի նկատմամբ:

Իսկ ինչ վերաբերում է մամուլում հայտնված տեղեկություններին, որ Իսրայելը համագործակցում է «Իրաքի և Լևանտի իսլամական պետության» գրոհայինների հետ, մասնավորապես ջիհադիստներին առաջակցելու համար Սիրիայի տարածքում օդուժ կիրառելուն, հետախույզը նշել է, որ նախ, Իսրայելի ռազմաօդային ուժերի հարվածներն ուղղված էին ոչ թե ԻԼԻՊ-ին աջակցելուն, այլ ռազմական տեխնիկա տեղափոխող ավտոշարասյան վրա, որի միջոցով Սիրիայի իշխանությունները մտադիր էին զենք փոխանցել լիբանանյան «Հեզբոլլահ» շարժմանը: Եվ երկրորդ, Գոլանի բարձունքները` շփման գիծը, վերահսկում է ոչ թե սիրիական բանակը, այլ «Ջաբհաթ Ալ-Նուսրա» ահաբեկչական խմբավորումը, որը Երուսաղեմում պակաս չարիք չեն համարում:

«Հենց նրանց, այլ ոչ թե ԻԼԻՊ-ի ջիհադիստների ուղղությամբ են առանձին հարվածներ իրականացվում: Չգիտեմ, թե դա ում է պետք: Թող դա մնա նրանց խղճին, ովքեր ընդունել են այդ որոշումը»,-եզրափակել է Կեդմին: