Ձեր վստահելի աղբյուրը

«Սա եզակի այն ծրագրերից է, որից օգտվում են ոչ թե սրտի անվճար ինվազիվ վիրահատության իրավունք ունեցող որևէ խմբում ներառված քաղաքացիները, այլև բացառապես նրանք ում մոտ բժիշկն ախտորոշում է կյանքին վտանգ սպառնացող սուր, ծանր ինֆարկտ»,-այսօր ՀՀ առողջապահության նախարարությունում հրավիրված ասուլիսի ժամանակ ասել է աշխատակազմի Բժշկական օգնության քաղաքականության վարչության պետ Ծաղիկ Վարդանյանը։ Այս մասին հայտնում է ԱՆ լրատվական ծառայությունը:

ՀՀ ԱՆ Պետական առողջապահական գործակալության պետ Սարո Ծատուրյանի հետ նրանք ներկայացրել են 2015 թվականի հունվարի 1-ից մեկնարկած սրտի անհետաձգելի վիրահատության ծրագրի հունվար-փետրվար ամիսների արդյունքները։

Նշվել է, որ ծրագրի ներդրմանը նախորդել են բազմաթիվ քննարկումներ, նախապատրաստական մեծ աշխատանքներ։ ՀՀ առողջապահության նախարարի հրամանով հաստատված հստակ չափորոշիչները սահմանում են բժշկական այն ցուցումները, որոնց դեպքում անհրաժեշտ է հիվանդին ամենակարճ ժամանակում տեղափոխել տեխնոլոգիաներով ու մասնագետներով անհրաժեշտ հագեցվածություն ունեցող կլինիկա։ Ծրագրի իրականացման նպատակով դեռ անցած տարի ՀՀ առողջապահության նախարարությունը փոխըմբռնման հուշագիր է կնքել սրտի ինվազիվ վիրահատություններ իրականացնող Երևանի 4 («Նորք Մարաշ», «Էրեբունի», «Մալաթիա», «Հերացի» թիվ 1 համալսարանական հիվանդանոց), ինչպես նաև Գյումրիի և Գորիսի բժշկական կենտրոնների հետ:

2015թ. հունվար-փետրվար ամիսներին ծրագրի շրջանակում բուժօգնություն է ստացել 270 քաղաքացի։ Նրանցից 255-ը ստենտավորվել է, իսկ 15-ի կորոնարոանգիոգրաֆիայի արդյունքներով ստենտավորման կլինիկական անհրաժեշություն չի եղել։

Կարևորելով Հայաստանի Հանրապետության նախագահի նախընտրական ծրագրի դրույթներից բխող այս նոր ծրագրի առողջապահական և սոցիալական նշանակությունը, նախարարությունը մեծ ուշադրություն է դարձնում բժշկական սպասարկման որակի ապահովմանը։

«Յուրաքանչյուր դեպք մանրակրկիտ վերլուծության է ենթարկվել Առողջապահական պետական գործակալության մասնագետների կողմից։ Տեղերում ուսումնասիրվել են հիվանդության պատմագրերը, կատարված հետազոտությունների ախտորոշման ճշգրտությունը և համապատասխանությունը նախարարի հրամանով հաստատված չափորոշչով սահմանված նորմերին։ Այս մշտադիտարկումն իրականացվում է ծրագրում ընդգրկված քաղաքացիների հիվանդանոցում գտնվելու ընթացքում և շարունակական է լինելու»,-ասել է Սարո Ծատուրյանը։

Նա մանրամասնել է, որ ստենտավորված 270 քաղաքացիներից 151-ը` Երևանի, 119-ը՝ ՀՀ մարզերի բնակիչներ են, նրանցից 210-ը տղամարդ է, իսկ 60-ը՝ կին: Ծրագրի շահառուների միջին տարիքը` 63 է, որից 7-ը` մինչև 40 տարեկան, 27-ը` 40-49, 74-ը` 50-59, 94-ը` 60-69, 52-ը` 70-79, 16-ը` 80 և ավելի բարձր տարիքի են:

Սուր ինֆարկտների դեպքում սրտի անհետաձգելի վիրահատությունների ծրագրի ընդլայնման նպատակով Հայաստանի Հանրապետության 2015թ. պետական բյուջեով հատկացվել է 500 մլն դրամ։ Ծրագիրը միտված է առողջապահական կարևոր ցուցանիշների բարելավմանը։ Հաշվի է առնվել այն հանգամանքը, որ մեր երկրում լայն տարածում ունեցող սրտանոթային հիվանդությունները մահացության ընդհանուր կառուցվածքում 48 տոկոս են կազմում և որ ստենտավորումն ինֆարկտի դեպքում մարդու կյանքը փրկելու ամենաարդյունավետ միջոցն է։