Ձեր վստահելի աղբյուրը

Մարտի 16-ին Հայ-ռուսական (Սլավոնական) համալսարանում բացվելու է նկարչուհի Մարի Ադամյանի աշխատանքների ցուցահանդեսը:

«Ես շատ անսպասելի առաջարկ ստացա` ցուցադրել աշխատանքներս ուսանողների համար»,- Panorama.am-ի հետ զրույցում ասաց Մարի Ադամյանը:

Արվեստագետի խոսքով, ցուցահանդեսում ներկայացվելիք աշխատանքներն ընտրված են պատահական սկզբունքով (2003-2014 թթ.)` հանդիսատեսին հնարավորություն տալով ընդհանուր գաղափար կազմել իր արվեստի մասին։ Աշխատանքների քանակը կլինի 16-18:

«Մարի Ադամյան՝ նուրբ, զգացմունքային նկարիչ-մետաքսագործ: Նրա զարմանալի աշխատանքները, գրեթե թափանցիկ, ոչ միայն նյութի շնորհիվ, այլև դրանց նրբության, պետք հայտնվեն «Արտ-ակվարիում» հենց գարնանը՝ հուրախություն և ի տես բոլորին»,- այսպես է նկարագրել արվեստագետին ցուցահանդեսի կազմակերպիչը:

Նշենք, որ ցուցահանդեսն անցկացվում է «Արտ-ակվարիում» նախագծի շրջանակում, կազմակերպիչն է Հայ-ռուսական համալսարանի համաշխարհային գրականության և մշակույթի ամբիոնի վարիչ Լիլիթ Մելիքսեթյանը: Ավելի վաղ Panorama.am-ի հետ զրույցում նա ասել էր, որ նախագծի շրջանակում արդեն մի քանի ցուցահանդես կազմակերպել է: Նախագծի հիմնական նպատակն է ուսանողներին ծանոթացնել ժամանակակից հայ արվեստի, ստեղծագործողների հետ:

Նախորդող հրապարակում՝
Մարի Ադամյանի «Ծաղկած ծառը» կտավը ներկայացված է «Իմ ֆուկուսիմա» ցուցահանդեսում