Ձեր վստահելի աղբյուրը

Հաշվի առնելով ԵՏՄ զարգացման պոտենցիալը, ես կարծում եմ, որ առնվազն տասը տարի պետք է միասնական արժույթի ներդրման նախագծի իրականացման համար: Panorama.am-ի հետ զրույցում նման տեսակետ հայտնեց տնտեսագետ Մեսրոպ Առաքելյանը:

Հիշեցնենք, որ Ռուսաստանի Դաշնության նախագահ Վլադիմիր Պուտինը հանձնարարել է Կենտրոնական բանկին և նախարարների կաբինետին ուսումնասիրել ԵՏՄ-ում միասնական դրամական միավորի սահմանման հնարավորությունները: Ընդ որում, Պուտինի այս հանձնարարությունը պետք է իրականացվի ԵՏՄ-ի անդամ մյուս երկրների (Բելառուս, Ղազախստան, Հայաստան) կենտրոնական բանկերի հետ համատեղ մինչև 2015թ.-ի սեպտեմբերի 1-ը:

Մեսրոպ Առաքելյանը նշեց, որ տնտեսական ցանկացած միության ձևավորման ու զարգացման վերջնական փուլը միասնական արժույթի ներդրումն է, քանի որ ողջ աշխարհում միասնական արժույթով հարաբերություններ հաստատելն ավելի նպատակահարմար է, իսկ դրա փորձը միջազգային պրակտիկայում կա:

«Միության անդամ երկրները միասնական արժույթի ներդրումից օգտվում են, օրինակ նույն եվրոյի պարագայում, այն 2002-ին հայտնվեց շրջանառության մեջ, սակայն արդեն 1979-ից ԵՄ անդամ երկրները որպես հաշվարկային միավոր օգտագործում էին այն, ինչը հեշտացնում էր միմյանց միջև տնտեսական հարաբերությունները՝ ներմուծումը, արտահանումը հաշվարկվում էր միևնույն արժույթով»,-ասաց նա:

Մ. Առաքելյանն ընդգծեց, որ ԵՄ անդամ երկրներից միայն Մեծ Բրիտանիան պահպանեց ազգային արժույթը:

«Կա մտավախություն, թե ազգային արժույթը ինքնիշխանության տարր է հանդիսանում, սակայն չեմ կարծում այսօր մենք ավելի ինքնիշխան ենք, քան Ֆրանսիան կամ Գերմանիան, որոնք չունեն սեփական արժույթը: Ինքնիշխանությունը պետք է ավելի շատ պայմանավորել ոչ թե ազգային արժույթի բացակայությամբ, այլ տնտեսական միության մեջ մեր երկրի ունեցած իրավունքներով ու ներպետական կառույցների հնարավորություններով»,-նման տեսակետ հայտնեց Panorama.am-ի զրուցակիցը:

Նրա կարծիքով, Եվրասիական տնտեսական միությունը կայացման երկար ճանապարհ պետք է անցնի, և միասնական արժույթի մասին խոսելն այս փուլում դեռևս վաղ է: Եվրամիության պարագայում այդ գործընթացը տևեց մոտ քսան տարի, իսկ ԵՏՄ պարագայում, առնվազն տասը տարի պետք է:

Հաջորդ տարվա հունվարի մեկից միասնական արժույթի ներդրման հնարավորության մասին խոսակցությունների վերաբերյալ տնտեսագետն ասաց, որ միասնական արժույթի ներդրումը պետք չէ ընկալել որպես ազգային արժույթների վերացում ու կանխիկ փողի ներդրում:

«Ակնհայտ է, որ 2016 թ. այդ տեսքով ուղղակի բացառված է: Խոսքը հնարավոր է, վերաբերում է միասնական փոխադարձ հաշվարկային արժույթի, միավորի մասին, որը բազմաթիվ ռիսկեր կարող է նվազեցնել»,-ասաց Մ. Առաքելյանը:

Մ. Առաքելյանը համոզված է, որ միասնական արժույթի շուտափույթ կիրառումը լուրջ խնդիրներ կառաջացնի, արժույթը կարգավորվում է այդ երկրի դրամավարկային քաղաքականությամբ, իսկ մինչ այդ պետք է Եվրասիական տնտեսական միությունն ունենա Կենտրոնական բանկ, որը կիրականացնի միասնական դրամավարկային քաղաքականություն:

«Դա նվազագույնը մի քանի տարվա աշխատանք է: Այսօր ընդամենը խոսվում է մաքսային ընդհանուր կանոնների ներդրման մասին, պատկերացրեք մեկ ընդհանուր ֆինանսական համակարգ, հարկային օրենսդրություն, տնտեսական այլ հարաբերություններ: Այս ամենի կարգավորումը քանի դեռ չի հասել վերջնական փուլին, դեռ վաղ է խոսել միասնական արժույթի ներդրման մասին»,-ասաց նա:

Ինչ վերաբերում է միասնական արժույթի ներդրման հետևանքով հնարավոր ցնցումներին, ապա Մ. Առաքելյանը, դրանք չբացառեց. «Փոքր երկրները, որոնք ինտեգրվում են երկրի դրամավարկային քաղաքականությանը, այս պարագայում Ռուսաստանին, կարող են պատրաստ չլինել անցում կատարելու միասնական արժույթին: Դրա օրինակը մենք ունենք Եվրոպայում, եվրոյի հետ կապված խնդիրներ կան Հունաստանում, որը բերեց եվրոյի արժեզրկմանը, տարիներ առաջ նման խնդիրներ առաջացան Իսպանիայում, Պորտուգալիայում»:

Նախորդող հրապարակումներ՝
Միասնական արժույթի մասին դեռ վաղ է խոսել. Վիլեն Խաչատրյան
Ռազուվաև. Միասնական արժույթը ռուբլուն կարող է փոխարինել 2016-ի հունվարի 1-ից
Պուտինը հանձնարարել է ուսումնասիրել ԵՏՄ-ում միասնական տարադրամի սահմանման հնարավորությունները
«Նախկին խորհրդային երկրներն այժմ զգում են Պուտինի ռուբլու ցավը». Bloomberg