Ձեր վստահելի աղբյուրը

«Հայաստանի նախագահի և երիտասարդ գիտնականների հանդիպումն, ընդհանուր առմամբ, անցավ շատ կառուցողական մթնոլորտում ի տարբերություն նախորդ հանդիպումների: Բարձրաձայնված սուր հարցերին նախագահը, կրթության և գիտության նախարարը, ներկա պատգամավորներն ըմբռնումով էին մոտենում, ի տարբերություն նախկին հանդիպումների, երբ տարատեսակ բանավեճեր էին ծավալվում»,- լրագրողների հետ հանդիպման ժամանակ ասաց ՀՀ ԳԱԱ թղթակից անդամ, ֆիզիկամաթեմատիկական գիտությունների դոկտոր, պրոֆեսոր Արթուր Իշխանյանը:

Հիշեցնենք, որ մարտի 11-ին նախագահ Սերժ Սարգսյանը ՀՀ գիտությունների ազգային ակադեմիայում հանդիպում է ունեցել երիտասարդ գիտնականների հետ: Երիտասարդ գիտնականների աջակցության ծրագրի (ԵԳԱԾ) պատասխանատուները Հանրապետության նախագահին ներկայացրել են ծրագրի երկրորդ փուլի՝ 2013թ. հուլիսից 2015թ. փետրվարն ընկած ժամանակահատվածի արդյունքները, ընթացիկ աշխատանքներն ու առաջիկա ծրագրերը:

Նրա կարծիքով, առհասարակ, «Երիտասարդ գիտնականների աջակցության» ծրագիրը (ԵԳԱԾ) երևութային ծրագիր է  իր կառավարման մոդելով, սկզբունքներով նորություն է, ինչպես նաև որոշումների ընդունման մեխանիզմի հիմքում դրված է կոնսենսուսի սկզբունքը:

Ա. Իշխանյանի դիտարկմամբ, կառուցողական հանդիպմանը նպաստեց նախքան հանդիպումը ԳԱԱ-ում բացված ԵԳԱԾ շահառուների գործունեությունը ներկայացնող ցուցահանդեսի դիտումը, ինչպես նաև երիտասարդ գիտնականների կողմից բարձրաձայնված սուր հարցադրումները. «Նրանք շատ լավ էին պատրաստվել, ավելի շատ բարձրաձայնում էին ռազմավարական նշանակության կարևորագույն խնդիրները, հիմնավորում էին դրանց անդրադառնալու անհրաժեշտությունը, միաժամանակ առաջարակում էին լուծման եղանակաները»:

Ա. Իշխանյանը նշեց, որ հանդիպման ընթացքում բարձրաձայնված հարցերը վերաբերել են հիմնականում գիտության ոլորտի ցածր ֆինանսավորումը: Միաժամանակ երիտասարդ գիտնականները մատնանշել են, որ 2010 թվականին կառավարության կողմից ընդունված Գիտության ոլորտի զարգացման ռազամավարությունը, որով նախատեսվում է 2020 թվականին գիտության ոլորտի ֆինանսավորումը հասցնել եվրոպական միջին, տապալվել է, այս տարիների ընթացքում որևէ քայլ չի իրականացվել:

Նա առանձնացրեց նաև հնչեցված սուր հարցերից մի քանիսը, ապա նշեց. «Բոլոր դեպքերում ըմբռնողական մոտեցում էր: Հիմնականում համաձայնվում էր: Հասկանալի էր, որ բազմաթիվ թերացումներ կան: Նախարար Աշոտյանին հանձնարարվեց հետևել բարձրաձայնված խնդիրների օրենսդրական մասի կատարմանը: Դրական քայլ էր, որ հենց տեղում նախագահը խոստացավ «Երիտասարդ գիտնականների աջակցության» ծրագրից առանձին ֆինանսավորում հայթայթել ազդեցության գործակից ունեցող պարբերականներում երիտասարդ գիտնականների գիտական հոդվածների տպագրության համար»:

Ա. Իշխանյանը նշեց, որ հանդիպման ընթացքում որևէ կոնկերտ թիվ չի նշվել, թե որքանով կբարձրանա ծրագրի ֆինանսավորումը, ինչն, իհարկե, բացասական է: Հանդիպման դրական կողմն էլ, ըստ նրա, այն էր, որ օրենսդրական դաշտը կարգավորման հստակ հանձնարարական տրվեց:

«Հանդիպման ժամանակ ի ցույց տրվեցին այն բոլոր թերացումները, որոնք այսօր կան գիտության ոլորտի կազմակերպման հարցում: Չկային առարկություններ, չէին կարողանում որևէ հակափաստարկ ներկայացնել»,- ասաց նա:

Նախորդող հրապարակումներ՝
Սերժ Սարգսյան. Պետությունը շարունակելու է աջակցել գիտությանը, այդ թվում՝ երիտասարդ գիտնականներին
Երիտասարդ հայ գիտնականներ. «Թեկուզ սակավ գումարով աշխատել և օգուտ բերել քո հայրենիքին»