«Facebook»-ն արգելում է վիրավորել Քեմալ Աթաթուրքին
«Facebook» սոցիալական ցանցի հիմնադիր Մարկ Ցուկենբերգը հայտարարել է, որ կայքում թարմացվում են արգելափակումների չափանիշները, որոնք բաժանված են 11 կատեգորիաների: Դրանց շարքում են ատելություն պարունակող թեմաները, բռնության տեսարանները, մերկ լուսանկարները և այլն:
Ermenihaber.am-ը հայտնում է, որ կատարվելիք թարմացումներից հետո, ըստ «CnnTürk» լրատվական ծառայության, կարգելափակվեն Թուրքիայի Հանրապետության հիմնադիր և առաջին նախագահ Մուստաֆա Քեմալ Աթաթուրքի հասցեին արված բոլոր վիրավորանքները, անգամ եթե դրանց դեմ բողոքողներ չլինեն:
Ցուկենբերգը նշել է, որ Աթաթուրքի հասցեին վիրավորանքն ընդգրկված է «ատելություն» կատեգորիայի մեջ:
«Facebook»-ը հրապարակել է նաև կայքից բովանդակություն հեռացնելու վերաբերյալ տարբեր երկրների կառավարություններից ստացված պահանջագրերի մասին վերաբերյալ 2014թ. կիսամյակային զեկույցը:
Պարզվել է, որ Թուրքիան 3.624 պահանջ է ներկայացրել և այս ցուցանիշով Հնդկաստանից հետո երկրորդն է: Երրորդ տեղում Գերմանիան է, որը «Facebook»-ին ներկայացրել է 60 պահանջ: