«Ես հայ եմ՝ ընտրությամբ». Դանիել Դեքերը սիրահաված է հայ ժողովրդին
«Ամերիկացի երգիչ, կոմպոզիտոր Դանիել Դեքերը մեկ ամիս առաջ ինձ նամակ էր ուղարկել՝ խնդրելով, որ ես միջնորդեմ, որպեսզի ինքը Հայաստանի քաղաքացի դառնա: Շատ լավ առիթ է, որ հրավիրենք նրան Հայաստան և հենց ապրիլի 24-ին Ծիծեռնակաբերդում Հայաստանի անձնագիր հանձնենք: Շատ կարևոր ու լավ քայլ կլինի»,- Panorama.am-ի հետ զրույցում ասաց երաժիշտ, երգահան Արա Գևորգյանը:
Նա պատմեց, որ Դանիել Դեքերի հետ սկսել է համագործակցել 2001 թվականի վերջից. «Նա եկավ Հայաստան ու խնդրեց, որ իմ «Մուշ» ստեղծագործության հիման վրա բառեր գրի, երգի: Սիրով տրամադրեցի նոտաներ: Երևանից գնաց և մեկ ամիս անց զանգահարեց ինձ ու ներկայացրեց իր երգը: Շատ հավանեցի և առաջարկեցի գալ Հայաստան ու Սարդարապատում իմ համերգի ժամանակ կատարի այդ ստեղծագործությունը: Երգը Նոյան տապանի մասին էր, որն իջել է Արարատի գագաթին: Արարատը՝ Հայաստանն է: Այդ օրը ներկայացրեցի նաև «Ադանա» ստեղծագործությունը: Նա ցանկություն հայտնեց դրա հիման վրա էլ բառեր գրել: Առաջարկեցի գրել Հայոց ցեղասպանության թեմայով: Համաձայնվեց: Մեկ տարի անհետացավ: Այդ ընթացքում նա հասցրել էր Հայոց ցեղասպանության մասին ամեն ինչ իմանալ՝ տեքստ գրելու համար: Դանիել Դեքերը գրել էր երգ, որը շատ դիպուկ էր ու ազդեցիկ: Թարգմանեցի 20 լեզվով»:
Արա Գևորգյանն ու Դանիել Դեքերը տարբեր երկրներում հանդես են եկել համերգներով՝ ներկայացնելով նաև «Ադանա» երգը, որը բոլոր դահլիճներում հոտնկայս ծափահարությունների է արժանացել:
«Հայոց ցեղասպանության 100-րդ տարելիցի կապակցությամբ նոր ստեղծագործություն եմ գրել, տեքստի հեղինակը Դանիել Դեքերն է: Կոչվում է «Remember»: Հայաստանի ազգային ֆիլհարմոնիկ նվագախմբի (գեղարվեստական ղեկավար Էդուարդ Թոփչյան) և Ազգային ակադեմիական երգչախմբի (գեղարվեստական ղեկավար՝ Հովհաննես Չեքիջյան) հետ ձայնագրեցինք այդ երգը: Այնուհետև «Իմ Հայաստան» փառատոնի շրջանակում սփյուռքի նախարարության հրավերով երգչախմբեր էին եկել Հայաստան: Նրանց մասնակցությամբ Ծիծեռնակաբերդում երգի հիման վրա տեսահոլովակ նկարահանվեց: Լևոն Բլբուլյանը երգի բառերը թարգմանեց հայերեն: Նախագիծը կոչվում էր «Սև ապրիլ»»,- պատմեց Արա Գևորգյանը:
Նրա խոսքով, Դանիել Դեքերը շատ մեծ գործ է արել Հայաստանի համար, սիրահարված է հայ ժողովրդին:
«Նա ձայնասկավառակ է թողարկել, որի վրա գրված է՝ «Ես հայ եմ՝ ընտրությամբ»: Ձայնասկավառակում ներկայացված են հայերեն ստեղծագործություններ»,- ասաց Արա Գևորգյանը:
Նախորդող հրապարակում՝
Շատ ազդեցիկ կլինի ՀՀ անձնագիր հանձնել Դանիել Դեքերին հենց ապրիլի 24-ին Ծիծեռնակաբերդում. Արա Գևորգյան
Լրահոս
Տեսանյութեր
Արցախի ղեկավարությունը Բաքվում է, որովհետև նրանք առաջնորդել են մեր քաղաքական պայքարը. Բեգլարյան
