Ձեր վստահելի աղբյուրը

««Կարեն Ջանիբեկյան» Վիքիպեդիայի էջում կինոֆիլմերի թվագրությունն ավարտվում է 2013-ով: Մինչդեռ Կարեն Ջանիբեկյանի անունը կա «Պարալլելս Ֆիլմ» կինոընկերության 2013-2016թթ. բոլոր երեք ֆիլմերում:

«Փասիանի Որսորդը»` 2013, «Կիսալուսնի Ծովածոցը»` 2014, ֆիլմերում Կարեն Ջանիբեկյանը Սոս Ջանիբեկյանի հետ խաղում են հայր և որդի, որ միասին աշխատեցնում են իրենց ընտանեկան բենզալցակայանը: «Լուսավոր Շրջան»՝ 2016, ֆիլմում Ջանիբեկյանը պետք է խաղար հերոսի հոր դերը: Ցավոք, «Լուսավոր Շրջանի» տիտրերում Կարեն Ջանիբեկյանի անունը կգրվի շրջանակի մեջ»,- ֆեյսբուքյան իր էջում գրել է կինոռեժիսոր, սցենարիստ, պրոդյուսեր, «Պարալլելս ֆիլմ» կինոընկերության հիմնադիր  Հովհաննես Գալստյանը:

«Կինոյի դերասանները ունեն բացառիկ արտոնություն` նրանք մնում են մարդկանց սրտերում, հիշողության մեջ այնպիսին, ինչպիսին էկրանին են: Մեզ` Կարենի հետ նկարահանման հրապարակում աշխատած մարդկանց համար, Ջանիբեկյանը կմնա որպես հսկայական տաղանդի տեր, բացսիրտ, անկեղծ ու լուսավոր մարդ:

«Պարալլելս Ֆիլմի» ողջ անձնակազմը ցավակցում է Սոս Ջանիբեկյանին, մեծ Դերասանի ընտանիքին, կոլեգաներին, բոլորիս` Կարեն Ջանիբեկյանի մահվան կապակցությամբ:

«Պարալլելս Ֆիլմը» կանի առավելագույնը, որպեսզի Կարեն Ջանիբեկյանի վերջին ֆիլմերի մասին տեղեկությունը թարմացվի, իսկ ֆիլմերը հասնեն հեռուստադիտողին»,- գրառման շարունակության մեջ նշել է Հ. Գալստյանը:

Հիշեցնենք, որ մարտի 22-ին, երկարատև հիվանդությունից հետո 77 տարեկանում, կյանքից հեռացել է ՀՀ ժողովրդական արտիստ Կարեն  Ջանիբեկյանը:

Լուսանկարները՝ Հովհաննես Գալստյանի ֆեյսբուքյան էջից: 

Նախորդող հրապարակումներ՝

Կարեն Ջանիբեկյանին կհուղարկավորեն Երևանի քաղաքային պանթեոնում
Կյանքից հեռացել է ՀՀ ժողովրդական արտիստ Կարեն Ջանիբեկյանը