Ձեր վստահելի աղբյուրը

Այսօր Ազգային ժողովի քառօրյա նիստերի մեկնարկին ԱԺ «Ժառանգություն» խմբակցության անդամ Զարուհի Փոստանջյանի հայտարարության նախագիծը՝ Գյումրիում Ավետիսյանների ընտանիքի հետ կատարված ողբերգության վերաբերյալ, քվեարկությամբ հետաձգվեց մեկ տարով. 42 կողմ, 0 դեմ, 1 ձեռնպահ ձայների հարաբերակցությամբ նախագիծը չընդգրկվեց նիստերի օրակարգ:

Ազգային ժողովում բոլոր խմբակցությունները միաձայն կողմ էին նախագծին: Հայտարարության նախագծի քվեարկությանը չմասնակցեց միայն Հանրապետական խմբակցությունը:

ԱԺ ՀԱԿ խմբակցության անդամ Հրանտ Բագրատյանը մինչև քվեարկությունը հայտարարեց, որ անհասկանալի է գործադիրի վարքագիծը այս հարցում և կոչ արեց «երկչոտություն» չցուցաբերել ու կողմ քվեարկել նախագծին:

«Եկեք համարձակ լինենք, կողմ քվեարկենք», -ասաց նա:

Իսկ «Ժառանգություն» խմբակցության անդամ Ալեքսանդր Արզումանյանը նկատեց, որ թեպետ հայտարարության տեքստը որոշ տարընթերցումների տեղիք է տալիս, բայց դա չի խանգարում ընդունել այն, իսկ թերությունները ժամանակի ընթացքում կարելի է հարթել:

«Սա քաղաքական ուղերձ է մեր ռուս գործընկերներին, այն մասին, որ այս հարցը կարևոր է ու մեծ հնչեղություն ունի Հայաստանում, և ՀՀ ԱԺ-ն չի կարող անմասն մնալ դրանից», -հայտարարեց Արզումանյանը:

ՀԱԿ խմբակցության ղեկավար Լեւոն Զուրաբյանն էլ նկատեց, որ ՀԱԿ-ը կողմ կքվեարկի հայտարարությունը օրակարգում ներառելու համար, քանի որ այն լայն կոնտեքստի մեջ պետք է քննարկվի:

Հայտարարության նախագծին կողմ էին նաև «Օրինաց երկիր», Դաշնակցություն և «Բարգավաճ Հայաստան» խմբակցությունները:

Ավելի վաղ Panorama.am-ը տեղեկացրել էր, որ Ազգային ժողովի Պետաիրավական հարցերի մշտական հանձնաժողովում Գյումրիում Ավետիսյանների ընտանիքի հետ կատարված ողբերգության վերաբերյալ ԱԺ պատգամավոր Զարուհի Փոստանջյանի հայտարարությունը դեռ մարտի 20-ի նիստում չէր ընդունվել. կողմ էին քվեարկել 4 պատգամավոր, իսկ հինգ հանրապետական պատգամավոր էլ ձեռնպահ էին:

Հայտարարության նախագծի տեքստում նշվում էր. «...Հայաստանի Հանրապետության Ազգային ժողովը ՀԱՅՏԱՐԱՐՈՒՄ Է՝ հետամուտ է լինելու եղեռնագործության բացահայտմանը, ակնկալում է հանուն արդարության, օրինականության վերականգնման և հայ-ռուսական ռազմավարական դաշնակցության՝ Ռուսաստանի Դաշնությունից ողջամիտ որոշում Հայաստանի Հանրապետության քաղաքացիների օրինական պահանջը բավարարելու համար առանձնապես ծանր հանցագործության մեջ մեղադրվող Վալերի Պերմյակովին անհապաղ փոխանցել Հայաստանի Հանրապետության իշխանություններին»: