Ձեր վստահելի աղբյուրը

Սպիտակ տունը Իսրայելին բացահայտ նախազգուշացրել է, որ պետք է վերջ դնի պաղեստինյան տարածքների օկուպացիային, իսկ վարչապետ Բենիամին Նեթանյահուն` հասարակական իր քարոզարշավին: Այս մասին հայտնում է The Daily Star-ը` հղում կատարելով France Presse գործակալությանը:

Սպիտակ տան աշխատակազմի ղեկավար Դենիս Մաքդոնաֆը նշել է, որ 50 տարվա օկուպացիային պետք է վերջ դրվի: Նա քննադատել է Պաղեստին պետության ստեղծումը թույլ չտալու Նեթանյահուի նախընտրական խոստումը:

«Մենք չենք կարող պարզապես ձևացնել, որ այդ մեկնաբանությունները երբեք չեն եղել կամ չեն բարձրացնում վարչապետի` ուղիղ բանակցությունների միջոցով խաղաղության հասնելու պարտավորվածության մասին հարցը»,-ասել է նա` ավելացնելով, որ պաղեստինցի ժողովուրդն ունի սեփական ինքնիշխան պետությունում ապրելու և ինքնակառավարվելու իրավունք:

Նրա խոսքով` երկու պետության ստեղծումը ԱՄՆ-ի արտաքին քաղաքականության հիմնարար սկզբունքն է:

Հիշեցնենք, որ ավելի վաղ ԱՄՆ նախագահ Բարաք Օբաման Իսրայելի վարչապետ Բենիամին Նեթանյահուին սպառնացել է վերանայել մերձավորարևելյան իր դաշնակցի հետ հարաբերությունները, եթե վերջինս չփոխի իր վերաբերմունքը Պաղեստին պետության ստեղծման հարցի շուրջ: